ភ្នំពេញ៖លោកTonyson Tong ដែលកំពុងរស់នៅអាមេរិកនិងអះអាងថាជាកូនច្បងរបស់លោកធឹង សុន ម្ចាស់ផលិតកម្មឆ្លងដែន នោះបានចេញសារនៅលើហ្វេសបុករបស់លោកកាលពីថ្ងៃទី២១ មេសា ថាលោកមិនដែលស្គាល់ម្ចាស់ឆ្លងដែនថ្មី(មុន្នី)ដែលអះអាងថាជាកូនរបស់ឪពុកលោកនោះទេ ហើយលោកថែមទាំងនិយាយទាំងឈឺចាប់ថាផលិតកម្មឆ្លងដែនដែលលោកឪពុករួមទាំងលោកបានបង្កើតឡើងនោះ ពេលនេះកំពុងតែមានចោរមកប្លន់ដោយឥតអៀនខ្មាស ហើយលោកថែមទាំងដាក់សំណួរទៅអ្នកពាក់ព័ន្ធក៍ដូចជាឲ្យមហាជនពិចារណាថារយៈពេល៤០ឆ្នាំនៅអាមេរិក ឪពុកលោកធឹង សុន មកលេងនៅខ្មែរតែ២ខែគត់ តើអាចទេដែលត្រឹម៦០ថ្ងៃឪពុកលោកមានកូនដល់ទៅ៩នាក់នៅខ្មែរ?
លោកTonyson Tong បានចេញសារភ្ជាប់ជាមួយរូបភាពឡូហ្គូផលិតកម្មឆ្លងដែនថា”នេះជាស្នាដៃលោកប៉ារបស់ខ្ញុំនិងខ្ញុំបានបង្កើតឡើង ឥឡូវមានចោរមកប្លន់ ដោយឥតអៀនខ្មាស អួតអាងថាខ្លួនជាកូនរបស់លោកប៉ាខ្ញុំ មនុស្សអត់ចេះអៀនខ្មាស បើអ្នកជាកូនរបស់លោកប៉ាខ្ញុំមានអីជាសំអាង?លោកប៉ារបស់ខ្ញុំទៅស្រុកខ្មែរតែ២ខែក្នុងរយៈពេល៤០ឆ្នាំ ,២ខែលោកមានកូនដល់ទៅ៩នាក់ នៅខ្មែរ តើអាចមានដែរ?បើចង់កុហកពិភពលោក លើកក្រោយរៀបផ្លូវកុហក់ឲ្យបានល្អមុនផ្សព្វផ្សាយ អាអូនបើថាចង់បានប្រាប់ខ្ញុំត្រង់ៗ ខ្ញុំឲ្យFree បានតើ អត់យល់? សូមបងប៊ី ប៊ុនធួក ជាបងជីដូនមួយរបស់ខ្ញុំ ត្រូវជាក្មួយបង្កើតប៉ា ហើយក៍ជាអ្នកនិពន្ធបទចម្រៀងប្រចាំផលិតកម្មឆ្លងដែនដ៍ច្នើម បងខុន បងឈឿម ជាអ្នកនៅផ្ទាល់ជាមួយលោកប៉ាគ្រប់ជំហ៊ាន ពួកលោកដូចជាបងប្រុសរបស់ខ្ញុំស្ទើរមួយជីវិតទៅហើយ តើក្នុងរយៈពេលលោកឪពុកនៅមានជីវិតអាក្អូននៅទីណា?ហេតុអីទើបតែរៈ កុហក់ថ្ងៃនេះ ប្រឌិតរឿងឥតអៀនខ្មាស យ៉ាងនឹងអាអូន?”។
អ្នកយកព័តមានយើងបានទូរស័ព្ទទៅលោកម៉ានី ដែលជាម្ចាស់ផលិតកម្មឆ្លងដែនថ្មីទាក់ទងលោកTonyson Tong ចោទលោកថាជាចោរប្លន់ផលិតកម្មប៉ារបស់លោក ហើយនិយាយប្រឌិតរឿងឥតអៀនខ្មាសដោយអះអាងថាជាកូនរបស់លោកធឹង សុន នោះតែលោកថាមិនដឹងបកស្រាយយ៉ាងណាទេ ព្រោះអ្វីៗលោកចាំបំភ្លឺគ្រប់ចម្ងល់នៅថ្ងៃធ្វើសន្និសីទកាសែតដែលបងស្រីរបស់លោកមកពីអាមេរិកនឹងរៀបចំឆ្លើយសំណួររបស់អ្នកសាព័រមាននៅអំឡុងខែ៩ ខាងមុខនេះ។លោកម៉ានី បន្ថែមថាម្យាងលោកមិនទាន់បានឃើញសំណេររបស់លោកTonyson Tong ទេ អីចឹងអត់ដឹងនិយាយថាម៉េច។ប៉ុន្ដែក្នុងបទសម្ភាសន៍មុននេះម្ចាស់ផលិតកម្មឆ្លងដែនថ្មីរូបនេះថាលោកក៍ធ្លាប់បានឭឈ្មោះលោកTonyson Tong ដែរ តែអត់ដែលបានទាក់ទង,និយាយគ្នា ឬជួបមុខគ្នាដោយផ្ទាល់ឡើយទោះជារួមឪពុកក្ដី។លោកថាដោយសារតែមានការណែនាំពីបងស្រីរបស់លោកនៅអាមេរិកថាកុំអាលទាន់និយាយរឿងនេះ ហេតុនេះហើយលោកសូមមិនធ្វើប្រតិកម្មតបចំពោះការលើកឡើងរបស់លោកTonyson Tong នាពេលនេះឡើយ តែលោកនឹងឆ្លើយរាប់គ្រប់សំណួរនៅថ្ងៃសន្និសីទកាសែតនៅដើមខែ៩ ។
ដោយឡែកលោកស្រីកញ្ញា បានប្រាប់តាមទូរស័ព្ទនៅថ្ងៃទី២៣ មេសា ថាចង់អ្នកណានិយាយអីតាមចិត្តចុះ ព្រោះលោកស្រីបានប្រាប់ហើយថានៅថ្ងៃទី៩ ខែ៩ ឆ្នាំ២០២៣ នឹងធ្វើសន្និសីទកាសែតទ្រង់ទ្រាយធំ អីចឹងរឿងនេះនឹងត្រូវបានលាតត្រដាងការពិត អត់មានអីជាអាថ័កំបាំងឡើយ។លោកស្រីកញ្ញា នៅតែអះអាងថាលោកម៉ានី ជាកូនរបស់លោកធឹង សុន ពិតប្រាកដមែន ហើយមានសាក្សីសំខាន់ក្នុងរឿងនេះមួយទៀតនោះគឺអ្នកនិពន្ធនៅឆ្លងដែនចាស់គឺលោកប៊ី ប៊ុនធួក ដែលកំពុងរស់នៅអាមេរិក។លោកស្រីបន្ថែមថាសូមឲ្យគ្រប់គ្នាពិចារណាផងបើអ្នកអះអាងថាជាកូនរបស់លោកធឹង សុន ពិតម៉េចមិនបន្ដមរតករបស់ឪពុក បើកឆ្លងដែនឡើងវិញ ?ម៉េចបានអ្នកដែលគេចោទថាជាកូន”កែងក្លាយ”ជាអ្នកធ្វើឆ្លងដែនឲ្យតំណើរការបាននាពេលនេះទៅវិញ?
លោកស្រីកញ្ញា ក៍ធ្លាប់ប្រាប់ក្នុងជំនួបតាមទូរស័ព្ទលើកមុនថាលោកធឹង សុន បានផ្ដាំឲ្យលោកម៉ានី បើកឆ្លងដែនឡើងវិញផងដែរ ហើយនៅពេលអ្នកយកព័តមានយើងសួរថាតើថៅកែឆ្លងដែនផ្ដាំលោកមុន្នី នៅឆ្នាំណានោះលោកស្រីអះអាងថានៅពេលដែលលោកនៅមានជីវិតហើយក្រៅពីលោកស្រីក៍មានមនុស្សមួយចំនួនទៀតដែលស្និតលោកធឹង សុន បានដឹងឭរឿងនេះដែរ។
តែតាមព័តមានពីអ្នកស្និតស្នាលលោកប៊ី ប៊ុនធួក បានបង្ហើបប្រាប់អ្នកយកព័តមានយើងកាលពីពេលថ្មីៗនេះថាពួកគេបានឆាតសួរអតីតអ្នកនិពន្ធរបស់ឆ្លងដែនរូបនេះពាក់ព័ន្ធរឿងលោកមុន្នី ចេញមុខអះអាងថាជាកូនរបស់លោកធឹង សុន នេះហើយលោកប៊ុនធួក ឆ្លើយតបយ៉ាងខ្លីទាំងហួសចិត្តថា”កុហក់១០០%”។ចំណែកលោកគួច ខេវិន អតីតអគ្គនាយករងទូរទស្សន៍CTN ,Seatv និងEtv ដែលធ្លាប់សាងស្នាដៃជាច្រើនក្នុងការដឹកនាំសម្ដែងMV នៅឆ្លងដែនរាប់ពានបទ ហើយក៍ជាអ្នកធ្លាប់រាប់អានគ្នាយ៉ាងស្និតស្នាលជាមួយលោកធឹង សុន ក៍ដូចជាលោកTonyson Tong នោះបានចេញសារមុននេះថា”អស់សំណើច!អាក្អូន ម្នាក់ នេះបាននិយាយប្រាប់គេថា៖រូបគេជាកូនប្រុសរបស់លោកអ៊ុំ ធឹង សុន ដែលពុំទាំងដឹងថាឪពុក អាយុប៉ុន្មាននៅ ពេលដែលគាត់ទទួលអនិច្ចកម្ម? ហើយបច្ចុប្បន្នរូបគេជាអ្នកស្នងមរតកផលិតកម្ម”ឆ្លងដែន”ដែលល្បីល្បាញតាំង តែពីទសវត្សឆ្នាំ៨០មកម្លេះ ។ បើគយគន់ទៅមើលរូបឆោមរបស់បុរសនេះធៀបគ្នាទៅនឹងលោកអ៊ុំធឹង សុន ឬជាមួយនឹងកូនៗរបស់លោកធឹង សុន បីនាក់កំពុងរស់នៅអាម៉េរិក គឺដូចគ្នា មេឃហើយនឹងដី?។ តាមពិតទៅលោកអ៊ុំធឹង សុន មានកូនតែបីនាក់គត់នឹងមានទំនាក់ទំនងយ៉ាងស្និតជាមួយខ្ញុំដូចបងប្អូនបង្កើត ទោះជាខ្ញុំចាកចេញពីអាម៉េរិកក្រែលឆ្នាំហើយក្តី ក៏យើងនិយាយគ្នាបានព្រឹកល្ងាច! ហើយបីនាក់នោះបដិសេដថា មិនស្គាល់អន្ទិតម្នាក់ហ្នឹងទាល់សោះ។បើកូនបង្កើតមិនស្គាល់បងប្អូនបង្កើត តើមានបងៗប្អូនៗតារាចម្រៀងដែលធ្លាប់ច្រៀងឲ្យផលិតកម្មឆ្លងដែន ណាខ្លះស្គាល់អន្ទិតម្នាក់នេះថាជាកូនលោកអ៊ុំធឹង សុន? មេត្តាជួយប្រាប់ផង! ។ តាំងតែពីមុនលោកអ៊ុំធឹង សុន អនិច្ចកម្មខ្ញុំបានទទួលសិទ្ធិពេញលេញក្នុងការផលិតនិងដំណើរការផលិតកម្ម”ឆ្លងដែន”បន្ទាប់ពីលោកណាំ គឹមឡេង គ្រប់គ្រងផលិតកម្ម”រស្មីនាគមាស”ដែលបំបែកចេញពីផលិតកម្មឆ្លងដែន(មិនបាច់បញ្ជាក់ឆ្នាំព្រោះបទចម្រៀងដែលដាក់ឈ្មោះខ្ញុំដឹកនាំផលិតមានរាប់ពាន់បទ)តែខ្ញុំមិនដែល មិនធ្លាប់ស្គាល់អាក្អូនម្នាក់ហ្នឹងទាល់សោះ ឬអត់អាលីងហ្មង ថាជាកូនលោកអ៊ុំធឹង សុន? មើលទៅ គិតទៅ ពិចារណាទៅ !ខ្ញុំអស់សំណើច! ប៉ុន្តែបើយោងទៅរកទិដ្ឋភាពផ្លូវច្បាប់ ទំនងជាពិបាកសើចចំពោះករណីនេះ! បើឈប់បានឈប់ទៅ?ហើយសុំទោសសាធារណជនផង ណាអាក្អូន!”។
គូររំលឹកថាក្រោយលោកម៉ានី អះអាងថាជាកូនលោកធឹង សុន ម្ចាស់ផលិតកម្មឆ្លងដែន ហើយប្ដេជ្ញាបើកផលិតកម្មមួយនេះតំណើរការឡើងវិញក្រោយបិទទ្វារអស់រយៈពេលជាង២០ឆ្នាំនោះក៍មានប្រតិកម្មពីកូនរបស់លោកធឹង សុន គឺលោកTonyson Tong ដែលកំពុងរស់នៅរដ្ឋកាលីហ្វ័ញ៉ា សហរដ្ឋអាមេរិកថារឿងនេះជាការបោកប្រាស់ភ្នែកទស្សនិក ព្រោះលោកមានបងប្អូនតែ៣នាក់គត់គឺទី១៖រូបលោក(Tonyson Tong)ជាកូនច្បង,ប្អូនទី២៖ព្រំដែន និងប្អូនទី៣៖ឆ្លងដែន ។ប៉ុន្ដែទោះជាមានការបញ្ជាក់បែបនេះក្ដី ក៍លោកម៉ានី នៅតែអះអាងថាលោកជាកូនថៅកែឆ្លងដែន យ៉ាងពិតប្រាកដដដែល ព្រមទាំងត្រៀមខ្លួនលាតត្រដាងរឿងនេះឲ្យច្បាស់លាស់នៅថ្ងៃជួបជុំអ្នកកាសែតនៅថ្ងៃទី៩ ខែកញ្ញា ឆ្នាំ២០២៣ ដែលកម្មវិធីនោះរៀបចំដោយលោកស្រីកញ្ញា មកពីរដ្ឋTexas សហរដ្ឋអាមេរិក ដែលគាត់ថាជាអ្នកស្និតស្នាលម្នាក់ជាមួយលោកធឹង សុន ក៍ដូចជាបានដឹងរឿងរ៉ាវរបស់លោកមុន្នី យ៉ាងស៊ីជម្រៅ។
ដោយឡែកវីដេអូមួយរបស់លោកធឹង សុន ក្នុងបទសម្ភាសន៍នៅទូរទស្សន៍CTN កាលពីប៉ុន្មានឆ្នាំមុនអំឡុងពេលលោកមកលេងនៅខ្មែរដែលមានលោកជុំ កុសល ជាពិធីករនោះលោកបានអះអាងថាលោកមានកូនតែ៣នាក់គឺកូនទី១៖Tonyson ទី២៖ព្រំដែន សុន និងទី៣៖ឆ្លងដែន សុន ៕