សាស្ត្រាចារ្យ Duncan McCargo នាយកវិទ្យាស្ថានសិក្សាអាស៊ី នៅសាកលវិទ្យាល័កCopenhagen ប្រទេសដាណឺម៉ាកបាននិយាយថាការតែងតាំងនាយករដ្ឋមន្ត្រីនៅក្នុងប្រទេសថៃនឹងក្លាយជាឧបសគ្គសម្រាប់គណបក្សប្រឆាំងបន្ទាប់ពីពួកគេឈ្នះភ្លូកទឹកភ្លូកដីនៅក្នុងការបោះឆ្នោតសកលកាលពីថ្ងៃទី ១៤ឧសភា។
លោកបានកត់សម្គាល់ថាសមាជិកសភាដែលទើបជាប់ឆ្នោតថ្មីចំនួន៥០០នាក់ នឹងត្រូវបោះឆ្នោតជ្រើសរើសនាយករដ្ឋមន្ត្រីថ្មី រួមជាមួយនឹងសមាជិកព្រឹទ្ធសភាចំនួន២៥០នាក់ដែលត្រូវបានតែងតាំងដោយឧត្តមសេនីយ៍យោធាប្រាយុទ្ធ ចាន់អូចាដែលបានធ្វើរដ្ឋប្រហារទម្លាក់លោកស្រីយីងឡាក់កាលពីឆ្នាំ ២០១៤។
លោកបានប្រាប់ទូរទស្សន៍ CNA កាលពីថ្ងៃចន្ទថា អ្នកត្រូវការសំឡេងភាគច្រើននៅក្នុងសភា ដើម្បីផ្តួលសំឡេងសមាជិកព្រឹទ្ធសភា ប្រសិនបើពួកគេទាំងអស់គ្នាបោះឆ្នោតរួមគ្នាតែមួយសម្រាប់បេក្ខជនជាក់លាក់ណាមួយដូចអ្វីដែលពួកគេបានធ្វើកាលពីលើកមុន។
លោកបានកត់សម្គាល់ថាសមាជិកសភាមកពីបក្សប្រឆាំង៦(រដ្ឋាភិបាលចម្រុះ)មានអាសនៈ៣០៩ក៏នៅតែលំបាកដើម្បីទទួលបានបេក្ខភាពនាយករដ្ឋមន្ត្រីប្រសិនបើសមាជិកសភារដ្ឋាភិបាលបច្ចុប្បន្នទាំងអស់បានបោះឆ្នោតរួមជាមួយនឹងសមាជិកព្រឹទ្ធសភា។
ចំណែកឯលោកស្រី Pongkwan Sawasdipakdi សាស្ត្រាចារ្យនៅមហាវិទ្យាល័យវិទ្យាសាស្ត្រនយោបាយនៃសាកលវិទ្យាល័យThammasatរបស់ប្រទេសថៃបានមានប្រសាសន៍ថាស្ថានការណ៍នេះមិនមានសុទិដ្ឋិនិយមខ្លាំងសម្រាប់គណបក្សប្រឆាំងច្រើនពេកនោះទេ។
លោកស្រីបានបន្តថាបញ្ហាចោទនៅត្រង់ថាតើពួកគេ (សមាជិកព្រឹទ្ធសភា) នឹងបោះឆ្នោតឱ្យគណបក្សឆ្ពោះទៅមុខ ឬពួកគេនឹងបោះឆ្នោតអនុបវាទ។ ឥឡូវនេះ វាហាក់ដូចជា ពួកគេគ្រាន់តែរំពឹងថាសមាជិកសភានឹងបង្កើតសម្ព័ន្ធដ៏ធំមួយអោយបានច្រើនជាងពាក់កណ្តាលនៃសមាជិកសភាទាំងមូល។ពួកគេបានដាក់សម្ពាធនិងការទទួលខុសត្រូវកាន់តែច្រើនទៅលើសមាជិកសភានិងគណបក្សឆ្ពោះទៅមុខមានន័យថាពួកគេប្រហែលជាមិនមានឆន្ទៈបោះឆ្នោតឱ្យគណបក្សផ្លាស់ទីទៅមុខទេ។
និយាយដោយសង្ខេបខ្លីដើម្បីក្លាយជានាយករដ្ឋមន្ត្រីថៃក្រោមច្បាប់រដ្ឋម្មនុញ្ញ យោធាឆ្នាំ២០១៧ មានសេណារីយោ២គឺទី១ រកសំឡេងពីសភាជាន់ទាប(រដ្ឋសភា)អោយបាន៣៧៦និងទី២រកសំឡេងពីសភាទាំងពីរ(រដ្ឋសភានិងព្រឹទ្ធសភាដែលមាន៧៥០អាសនៈ)អោយបាន៣៧៦អាសនៈ។
បេក្ខជននាយករដ្ឋមន្ត្រីរបស់គណបក្សភឿថៃ អំពាវនាវឱ្យគណបក្សផ្សេង គាំទ្រលោកPita
លោក Srettha Thavisin បេក្ខជន នាយករដ្ឋមន្ត្រីរបស់គណបក្សភឿថៃបានអំពាវនាវឱ្យគណបក្សផ្សេងទៀតជាពិសេស Bhumjaithai និងគណបក្សប្រជាធិបតេយ្យគាំទ្រលោកPita Limjaroenrat មេដឹកនាំគណបក្សឆ្ពោះទៅមុខជានាយករដ្ឋមន្ត្រី និងជៀសវាងតម្រូវការសម្រាប់ការគាំទ្រពីសមាជិកព្រឹទ្ធសភាដែលត្រូវបានតែងតាំងដោយយោធា។
លោកបានថ្លែងថានៅក្រោមរដ្ឋធម្មនុញ្ញឆ្នាំ២០១៧ បានចែងថា ដើម្បីអនុម័តតំណែងនាយករដ្ឋមន្ត្រីយ៉ាងហោចណាស់ត្រូវការ ៣៧៦ សំឡេង។ នេះមានន័យថា លោក Pita នឹងត្រូវការសន្លឹកឆ្នោតបន្ថែមពីគណបក្សផ្សេងទៀត ឬពីសមាជិកព្រឹទ្ធសភា។
លោក លោក Srettha Thavisin ថា មានប្រសាសន៍ថា លោកសង្ឃឹមថាគ្រប់ភាគីទាំងអស់នឹងបង្ហាញស្មារតីនយោបាយ និងការប្រកាន់ខ្ជាប់នូវសំឡេងប្រជាពលរដ្ឋ តាមរយៈការបោះឆ្នោតជូនលោក Pita។
លោកបានថ្លែងថា៖ «សម្រាប់ខ្ញុំគឺជាអ្នកគាំទ្រលោក Pita នៃគណបក្សឆ្ពោះទៅមុខឲ្យកាន់តំណែងដោយគុណធម៌។លោកបន្ថែមថាឥឡូវនេះវាដល់ពេលហើយសម្រាប់អ្នកដើម្បីបញ្ជាក់ជំហររបស់អ្នកដោយបោះឆ្នោតឱ្យលោក Pita ធ្វើជានាយករដ្ឋមន្ត្រីទី ៣០ ក្នុងលទ្ធិប្រជាធិបតេយ្យពិតប្រាកដដោយមិនចាំបាច់ពឹងផ្អែកលើការបោះឆ្នោតពីសមាជិកព្រឹទ្ធសភា ២៥០ រូប។
លោក ប្រាយុទ្ធ នៅស្ងៀមអំពីអនាគតនយោបាយ និងអំពាវនាវឲ្យមានការរួបរួមគ្នា
ក្នុងអំឡុងដឹកនាំកិច្ចប្រជុំគណៈរដ្ឋមន្ត្រីចាំផ្ទះកាលពីថ្ងៃអង្គារនាយករដ្ឋមន្ត្រីផុតអាណត្តិ លោក ប្រាយុទ្ធ ចាន់អូចា បានរក្សាភាពស្ងៀមស្ងាត់អំពីអនាគតនយោបាយរបស់លោក បន្ទាប់ពីបរាជ័យយ៉ាងធ្ងន់ធ្ងរការបោះឆ្នោតសកលកាលពីថ្ងៃអាទិត្យ ។
លោកប្រាយុទ្ធធ្លាប់បាននិយាយថាលោកនឹងចាកចេញពីសង្វៀននយោបាយប្រសិនបើគណបក្សរបស់លោកទទួលបានសំឡេងគាំទ្រតិច។លទ្ធផលឆ្នោតបណ្តោះអាសន្នដែលប្រកាសដោយគណៈកម្មាការបោះឆ្នោតបានអោយដឹងថាគណបក្សរបស់លោកទទួលបានត្រឹមតែ ៣៦អាសនៈ។
អ្នកកាសែតសួរថាតើលោកនឹងឈប់ធ្វើនយោបាយឬអត់? លោកប្រាយុទ្ធ ញញឹមហើយនិយាយថាគ្មានយោបល់ទេ។
លោកបន្តនៅស្ងៀមនៅពេលអ្នកកាសែតសួរថាតើលោកនឹងបន្តស្នាក់នៅជាមួយនឹងគណបក្ស United Thai Nation ឬយ៉ាងណា។
ទោះបីលោកមិននិយាយក៏ដោយអនុប្រធានបក្សជាតិថៃរួបរួម លោក Thanakorn Wangboonkongchana នៅថ្ងៃទី១៥ ខែឧសភា បានអះអាងថា លោកប្រាយុទ្ធ ចន្ទអូចា បេក្ខជននាយករដ្ឋមន្រ្តីបក្សជាតិថៃរួបរួម អាចនឹងដើរចេញពីនយោបាយក្រោយពីចាញ់ការបោះឆ្នោតរើសសមាជិករដ្ឋសភា។
ពាក់ព័ន្ធទៅនឹងការបង្កើតរដ្ឋាភិបាលចម្រុះថ្មីលោកឧត្តមសេនីយ៍ ប្រាយុទ្ធ បាននិយាយថា លោកសប្បាយចិត្តជាមួយនឹងដំណើរការបង្កើតរដ្ឋាភិបាលថ្មី។
លោកនាយករដ្ឋមន្ត្រីបានមានប្រសាសន៍ថា “ខ្ញុំសប្បាយចិត្តនឹងរឿងនោះ ហើយចង់ឲ្យប្រជាជនថៃទាំងអស់ សហការ និងលើកកម្ពស់ការរួបរួម និងស្ថិរភាពក្នុងប្រទេស ដោយគ្មានជម្លោះ និងរួមគ្នាអភិវឌ្ឍប្រទេសជាតិ។លោកបន្តថា នេះគឺដើម្បីសន្តិសុខ វិបុលភាព និងនិរន្តរភាព។ ប្រកាន់ខ្ជាប់នូវសន្តិសុខនៃស្ថាប័នសំខាន់ៗរបស់ប្រទេសជាតិ សម្រាប់ការអភិវឌ្ឍជាតិនិងអនាគតរបស់ប្រជាជនថៃទាំងអស់៕