បើទោះជាគណបក្សឆ្ពោះទៅមុខ(Move Forward )បានឈ្នះការបោះឆ្នោតសកលកាលពីថ្ងៃអាទិត្យជាមួយនឹង អាសនៈ១៥២និងគ្រោងបង្កើតរដ្ឋាភិបាលចម្រុះ៦គណបក្សដែលមានអាសនៈសរុប៣១០ក៏ដោយវានៅតែមិនមានសំឡេងគ្រប់គ្រាន់សម្រាប់មេដឹកនាំគណបក្សលោកPita ធ្វើ ជានាយករដ្ឋមន្ត្រីទី ៣០របស់ប្រទេសថៃដែរ។
Pita នឹងត្រូវការសំឡេងគាំទ្រភាគច្រើនយ៉ាងហោចណាស់ ៣៧៦ ពីសភាតំណាងរាស្រ្ត ៥០០អាសនៈ ដើម្បីទុកជាមោឃៈនូវសម្លេង២៥០ពីព្រឹទ្ធសភាដែលតែងតាំងដោយយោធាលោកប្រាយុទ្ធ ចាន់អូចា។
ដោយមើលឃើញពីភាពជាប់គាំនេះទូរទស្សន៍ថៃ Nation TV បានលើកយកសេណារីយោចំនួនបួនដែលអាចកើតមានសម្រាប់ការបង្កើតរដ្ឋាភិបាលថ្មីហើយមានតែសេណារីយោពីរប៉ុណ្ណោះដែលមានលោក Pita Limjaroenrat ជាក្លាយនាយករដ្ឋមន្ត្រី។នេះបើយោងតាមការចេញផ្សាយរបស់កាសែតថៃThe Nation កាលពីថ្ងៃពុធទី១៧ខែឧសភាឆ្នាំ២០២៣។
សេណារីយ៉ូទាំងបួនសម្រាប់ការបង្កើតរដ្ឋាភិបាលបន្ទាប់មានដូចខាងក្រោម៖
១-រដ្ឋាភិបាលសេរីដែលមានលោកPita ជានាយករដ្ឋមន្ត្រី
តាមរូបមន្តនេះ លោក Pita នឹងដឹកនាំសមាជិកសភាចម្រុះចំនួន ៣១០រូប មកពីគណបក្សឆ្ពោះទៅមុខរបស់លោក (១៥២) ភឿថៃ (១៤១) ប្រាឆាឆាត (៩) ថៃសាងថៃ (៦) សេរីរាមាថៃ (១) និងគណបក្សយុត្តិធម៌ (១)។
សេណារីយោនេៈគណបក្សឆ្ពោះទៅមុខត្រូវបានគេរាយការណ៍ថាកំពុងពិភាក្សាជាមួយភាគីទាំងនេះរួចហើយដើម្បីធានាថាព្រឹទ្ធសភាដែលត្រូវបានតែងតាំងដោយរបបយោធាមិនរារាំងចលនារបស់ខ្លួនក្នុងការបង្កើតរដ្ឋាភិបាល។ទោះយ៉ាងណាក៏ដោយ វាត្រូវការ៦៦អាសនៈមកពីគណបក្សផ្សេងទៀត ដើម្បីធានាថាលោក Pita ទទួលបានការងារកំពូលដឹកនាំរដ្ឋាភិបាល។
២-មោឃភាពព្រឹទ្ធសភា២៥០ ដោយលោក Pita ជានាយករដ្ឋមន្ត្រី
រូបមន្តនេះត្រូវរកសមាជិកសភាសរុបឲ្យបានចំនួន៣៨០ គឺពីគណបក្សឆ្ពោះទៅមុខ(១៥២) ភឿថៃ(១៤១) ប្រាឆាឆាត(៩) ថៃសាងថៃ (៦) សេរីរាមាថៃ (១) យុត្តិធម៌ (១) បូកនឹង ភូមិចៃថៃ(៧០)។
សេណារីយ៉ូនេះនឹងធានាថាលោក Pita ក្លាយជានាយករដ្ឋមន្ត្រីបន្ទាប់។ ទោះជាយ៉ាងណាក៏ដោយ ការចរចាដើម្បីបង្កើតសម្ព័ន្ធនេះនឹងប្រឈមមុខនឹងឧបសគ្គ ខណៈដែលគណបក្សឆ្ពោះទៅមុខនិងភូមិចៃថៃពីមុនបានបដិសេធមិនសហការដោយសារតែជម្លោះអំឡុងពេលការពិភាក្សាកន្លងមក។
៣-បង្កើតរដ្ឋាភិបាលសំឡេងភាគតិចដោយលោកAnutin Charnvirakul ធ្វើជានាយករដ្ឋមន្ត្រី
រូបមន្តនេះផ្តល់ឱ្យរដ្ឋាភិបាលសំឡេងភាគតិចនៃសមាជិកសភាចំនួន ១៨៣នាក់ មកពីគណបក្សឆ្ពោះ ភូមិចៃថៃ(៧០), ផាឡាង ប្រាឆារ៉ាត់(៤០), រួមរួមជាតិថៃ (៣៦), ប្រធាធិបតេយ្យ(២៥), ឆាតថៃបាតាណា (១០) និង ឆាតបាតាណាខ្លា(២) ។
សេណារីយ៉ូនេះត្រូវបានស្នើឡើងមុនការបោះឆ្នោតសកលថ្ងៃទី១៤ឧសភាក្រោមការសន្មត់ថានឹងមិនមានផ្លូវសម្រាប់គណបក្សចម្រុះរដ្ឋាភិបាលអាចទទួលបានអាសនៈច្រើនជាងគណបក្សប្រឆាំង។
ដើម្បីទប់ទល់នឹងជ័យជម្នះដ៏លើសលប់របស់គណបក្សប្រឆាំង គណបក្សចម្រុះរដ្ឋាភិបាលនឹងទាញយកអត្ថប្រយោជន៍ពីសំឡេងព្រឹទ្ធសភាចំនួន២៥០ដើម្បីទទួលបានបេក្ខជននាយករដ្ឋមន្ត្រីរបស់ពួកគេជាប់ឆ្នោតនិងបង្កើតរដ្ឋាភិបាលសំឡេងភាគតិច។
៤-រដ្ឋាភិបាលថ្មីអភិរក្សនិយម ដែលមានបេក្ខជនបក្សភឿថៃជានាយករដ្ឋមន្ត្រី
រូបមន្តនេះផ្តល់ឱ្យសមាជិកសភាសរុបចំនួន ២៨៨នាក់មកពីគណបក្សភឿថៃ (១៤១)ភូមចៃថៃ(៧០), ផាឡាង ប្រាឆារ៉ាត់(៤០), គណបក្សប្រជាធិបតេយ្យ (២៥), ឆាតថៃបាតាណា (១០) និង ឆាតបាតាណាខ្លា(២) ។
ប្រធានគ្រួសារភឿថៃ ឬមហាសេដ្ឋីអចលនទ្រព្យ Srettha Thavisin លោកស្រី Paetongtarn Shinawatra អាចត្រូវបានជ្រើសរើសជានាយករដ្ឋមន្ត្រីបន្ទាប់។
ទោះជាយ៉ាងនេះក្តី សេណារីយ៉ូនេះត្រូវបានគេមើលឃើញថា ទំនងតិចតួចបំផុតខណៈដែលភឿថៃបានសន្យារួចហើយថានឹងមិនចាប់ដៃជាមួយ ផាឡាង ប្រាឆារ៉ាត់។
ប៉ុន្តែប្រសិនបើវាក្លាយជាការពិត នយោបាយថៃនឹងប្រែក្លាយទៅជាសមរភូមិរវាងអ្នកអភិរក្សនិយមនិយមដឹកនាំដោយបក្សភឿថៃ និងសេរីនិយមដឹកនាំដោយចលនាឆ្ពោះទៅមុខ។
គណបក្សប្រជាធិបតេយ្យគាំទ្រលោក Pita តែដាក់លក្ខខ័ណ្ឌ
សមាជិកគណបក្សប្រជាធិបតេយ្យសំខាន់ៗពីររូបបាននិយាយថា គណបក្សរបស់ពួកគេនឹងបោះឆ្នោតឱ្យមេដឹកនាំគណបក្ស ឆ្ពោះទៅមុខលោក Pita Limjaroenrat ជានាយករដ្ឋមន្ត្រីបន្ទាប់ ប្រសិនបើគណបក្សនេះប្រមូលសំឡេងគាំទ្រពីសភាភាគច្រើន និងការពារស្ថាប័នរាជវង្ស។
លោក Chanin Rungsaeng អគ្គលេខាធិការរងគណបក្ស បានសរសេរនៅលើ Facebook កាលពីថ្ងៃពុធថា នឹងមិនមានបញ្ហាអ្វីទេប្រសិនបើសមាជិកសភាគណបក្សប្រជាធិបតេយ្យគាំទ្របេក្ខជននៃគណបក្សដែលទទួលបានអាសនៈសភាច្រើនជាងគេ។
លោកបានបន្តថាតើអ្នកអាចសន្យា និងបញ្ជាក់បានទេថា មាត្រា១១២នឹងមិនត្រូវបានដកហូតទេ និងមិនមានវិសោធនកម្មដើម្បីអនុញ្ញាតឱ្យនរណាម្នាក់ធ្វើការចោទប្រកាន់លើស្ថាប័នព្រះបរមរាជវាំង។សូមកុំក្បត់ថៃ និងប្រជាជន។ សំខាន់កុំប៉ះពាល់ ឬប្រមាថដល់ស្ថាប័នដែលប្រជាជនថៃគោរព។ នោះនឹងមិនអាចអត់ឱនបានទេ។
ចំណែកឯលោក Alongkorn Ponlabutr អនុប្រធានស្តីទីគណបក្សប្រជាធិបតេយ្យបាននិយាយថាគណបក្សរបស់លោកនឹងគោរពជម្រើសរបស់អ្នកបោះឆ្នោត ដោយគាំទ្រលោក Pita ជានាយករដ្ឋមន្ត្រីបន្ទាប់ ដោយមិនតម្រូវឱ្យមានការចូលរួមក្នុងរដ្ឋាភិបាលចម្រុះថ្មីជាថ្នូរនោះទេ៕