សហរដ្ឋអាមេរិកនិងជប៉ុនកាលពីថ្ងៃព្រហស្បតិ៍បានព្រមព្រៀងគ្នាដើម្បីបង្កើនកិច្ចសហប្រតិបត្តិការយោធាត្រីភាគីជាមួយកូរ៉េខាងត្បូងប្រឆាំងនឹងកូរ៉េខាងជើងបន្ទាប់ពីការបាញ់បង្ហោះផ្កាយរណបចារកម្មយោធា របស់ទីក្រុងព្យុងយ៉ាងបរាជ័យ។
សារព័ត៌មានជប៉ុនក្យូដូបានរាយការណ៍ថា រដ្ឋមន្ត្រីការពារជាតិអាមេរិក លោក Lloyd Austin បានជួបជាមួយរដ្ឋមន្ត្រីការពារជាតិជប៉ុន លោក Yasukazu Hamada ក្នុងទីក្រុងតូក្យូដើម្បីពិភាក្សាអំពីការជំរុញកិច្ចសហប្រតិបត្តិការយោធា។
លោកAustinបានទៅដល់ប្រទេសជប៉ុនក្នុងជើងទីមួយនៃដំណើរទស្សនកិច្ចបួនប្រទេសគឺឥណ្ឌា បារាំង និងសិង្ហបុរីផងដែរ។
យោងតាមរបាយការណ៍បានឱ្យដឹងថា មន្ត្រីការពារជាតិទាំងពីរបានព្រមព្រៀងគ្នាក្នុងការពង្រឹងកិច្ចសហប្រតិបត្តិការរបស់ពួកគេជាមួយកូរ៉េខាងត្បូង និងអូស្ត្រាលី ដើម្បីបង្កើនសមត្ថភាពទប់ស្កាត់ និងឆ្លើយតបបន្ថែមទៀត រួមទាំងសមត្ថភាពវាយប្រហារគោលដៅក្នុងទឹកដីសត្រូវ(កូរ៉េខាងជើង)។
ទីភ្នាក់ងារខាងលើនេះបានដកស្រង់សម្តីលោក Austin ដែលបាននិយាយក្នុងអំឡុងសន្និសីទសារព័ត៌មានរួមគ្នាជាមួយសមភាគីរបស់គាត់ថាសហរដ្ឋអាមេរិកនឹងចាត់វិធានការចាំបាច់ទាំងអស់ដើម្បីការពារសន្តិសុខខ្លួនឯង និងសម្ព័ន្ធមិត្តរបស់ខ្លួន។
លោក Hamada បាននិយាយថា ប្រទេសជប៉ុន និងសហរដ្ឋអាមេរិកនឹងមិនអត់ឱនចំពោះការប៉ុនប៉ងឯកតោភាគីណាមួយដើម្បីផ្លាស់ប្តូរស្ថានភាពរបស់ប្រទេសណាមួយ ។
កាលពីថ្ងៃពុធ ប្រទេសកូរ៉េខាងជើងបានបាញ់បង្ហោះគ្រាប់រ៉ុក្កែតផ្ទុកផ្កាយរណបឈ្លបយកការណ៍ប្រភេទថ្មីឈ្មោះ Chollima-1ដែលបានធ្លាក់ចូលសមុទ្រភាគខាងលិចនៃប្រទេសកូរ៉េខាងត្បូង។សហរដ្ឋអាមេរិកជប៉ុននិងកូរ៉េខាងត្បូងបានថ្កោលទោសយ៉ាងខ្លាំងចំពោះការបាញ់បង្ហោះចុងក្រោយរបស់កូរ៉េខាងជើង ហើយបានហៅវាថាជាការរំលោភយ៉ាងធ្ងន់ធ្ងរលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ៕