កាលពីថ្ងៃសុក្រទី ៧កក្កដា អាជ្ញាធរគយចិន បាននិយាយថា ខ្លួននឹងហាមឃាត់ការនាំចូលអាហារពីខេត្តទាំង ១០ របស់ជប៉ុនជុំវិញផែនការរបស់ទីក្រុងតូក្យូបញ្ចេញទឹកសំណល់នុយក្លេអ៊ែរដែលត្រូវបានព្យាបាលរួចរាល់ទៅក្នុងមហាសមុទ្រ។
ផែនការបង្ហូរទឹកដែលប្រមូលទុកជាច្រើនទសវត្សរ៍ របស់ជប៉ុនចេញពីរោងចក្រនុយក្លេអ៊ែរ Fukushima ដែលត្រូវបានបំផ្លិចបំផ្លាញដោយរលកយកស៊ូណាមិកាលពីឆ្នាំ ២០១១ត្រូវបានអនុម័តដោយទីភ្នាក់ងារថាមពលបរមាណូអន្តរជាតិ (IAEA) ក្នុងសប្តាហ៍នេះបន្ទាប់ពីជប៉ុនបានដែលបំពេញតាមស្តង់ដារពិភពលោក។ការបង្ហូរទឹកនេះត្រូវបានគេរំពឹងថានឹងចាប់ផ្តើមនៅក្នុងខែស៊ីហានេះប៉ុន្តែត្រូវបានជំទាស់ដោយប្រទេសជិតខាងក្នុងតំបន់មួយចំនួនជាពិសេសទីក្រុងប៉េកាំងបានថ្កោលទោសយ៉ាងខ្លាំងចំពោះផែនការនេះ ក៏ដូចជាសហគមន៍នេសាទមួយចំនួននៅ Fukushimaដែលខ្លាចអតិថិជននឹងលែងទិញកសិផលនេសាទរបស់ពួកគេ។ក្រសួងការបរទេសចិនកាលពីថ្ងៃព្រហស្បតិ៍បាននិយាយថា របាយការណ៍របស់ IAEA មិនអាចប្រើជាភ្លើងខៀវ សម្រាប់ផែនការបញ្ចេញទឹកហើយបានព្រមានពីហានិភ័យដែលដែលកើតឡើងចំពោះសុខភាពមនុស្ស។ប្រទេសចិនកាលពីថ្ងៃសុក្របាននិយាយថាប្រទេសជប៉ុននៅតែមានបញ្ហាជាច្រើនទាក់ទងនឹងភាពស្របច្បាប់នៃការបោះចោលមហាសមុទ្រភាពជឿជាក់នៃឧបករណ៍បន្សុតនិងភាពពេញលេញនៃផែនការត្រួតពិនិត្យ។
ជាមួយគ្នានេះដែរអាជ្ញាធរគយរបស់ប្រទេសចិនកាលពីថ្ងៃសុក្របាននិយាយថាខ្លួននឹងហាមឃាត់ការនាំចូលគ្រឿងឧបភោគបរិភោគពីខេត្តទាំងដប់របស់ប្រទេសជប៉ុន រួមទាំងហ្វូគូស៊ីម៉ា ដោយសារការព្រួយបារម្ភអំពីសុវត្ថិភាពនិងធ្វើតេស្ដវិទ្យុសកម្មយ៉ាងតឹងរ៉ឹងលើអាហារពីតំបន់ផ្សេងទៀតនៃប្រទេសជប៉ុន។អាជ្ញាធរបាននិយាយនៅក្នុងសេចក្តីថ្លែងការណ៍របស់WeChat ថាគយចិននឹងរក្សាការប្រុងប្រយ័ត្នខ្ពស់តែមិនបញ្ជាក់ពីបញ្ជីខេត្តរបស់ជប៉ុនដែលរងផលប៉ះពាល់ដោយការហាមឃាត់នេះ ៕