អាមេរិក៖លោកគួច ខេវិន ដែលជាជនជាតិខ្មែរ សញ្ញាតិអាមេរិក ម្នាក់នោះបានចេញទៅវិស្សមកាលនៅអាមេរិកកាលពីថ្ងៃទី៣ តុលា ឆ្នាំ២០២៣ ដើម្បីសម្រាកលម្ហែអារម្មណ៍ ពីការមមាញឹកនឿយហត់ការងារក្នុងស្រុក ក្រោយពីលោកអាកខានចេញចូលប្រទេសមហាអំណាចមួយនេះតាំងពីផ្ទុះកូវីដ ម្លេះ។ប៉ុន្ដែភាពរីករាយទាំងនោះត្រូវបានលោកខេវិន អះអាងថាទៅជាស្រងូតស្រងាត់ទៅវិញ បន្ទាប់ពីលោកទទួលដំណឹងថាលោកឧកញ៉ាចិត្តធ័មឈាង រ័ត្ន បានទទួលមរណភាពដោយការធ្វើអត្តឃាតកាលពីថ្ងៃទី១១ ខែតុលា ឆ្នាំ២០២៣ ក្នុងអាយុ៤០ឆ្នាំ ។លោកគួច ខេវិន ក៍បានបង្ហាញការភ្ញាក់ផ្អើលផងដែរចំពោះដំណឹងថាលោកឧកញ៉ាឈាង រ័ត្ន និងភរិយាមានបញ្ហាមិនចុះសម្រុងគ្នា ព្រោះទោះជាធ្លាប់ជួបនិងរាប់អានគ្នាយ៉ាងណាតែលោកមិនដែលដឹងរឿងមួយនេះឡើយ។
លោកគួច ខេវិន បានថ្លែងសារពីអាមេរិកថា”ខ្ញុំកំពុងសម្រាកលម្ហែវិស្សមកាលនៅសហរដ្ឋអាម៉េរិក ឆ្ងាយពីមាតុភូមិកំណើត ភាពសប្បាយ រីករាយត្រូវរសាយអស់ទៅវិញហើយក្តីក្តុកក្តួលជាមួយនឹងសេចក្តីសោកស្តាយជាទីបំផុតបានកើតឡើងនៅពេលដែលទទួលដំណឹងថាលោកឧកញ៉ាឈាង រ័ត្ន អតីតស្វាមីស្រីអូន បានទទួលមរណភាពដោយអត្តឃាតដែលមិននឹកស្មានដល់ទាល់តែសោះ។ ខ្ញុំបានស្គាល់ រាប់អាននិងតែងកោតសរសើរចំពោះគូស្វាមីភរិយានេះដែលស្តុកស្តម្ភដោយទ្រព្យសម្បត្តិ មានកិត្តិយសនិងមានទឹកចិត្តសប្បុរសធ័មបានបរិច្ចាគលុយកាក់សន្ធឹកសន្ធាប់លើកិច្ចការសង្គមខ្មែរជាច្រើននាពេលកន្លងទៅ។ ខ្ញុំមិនធ្លាប់ដឹងទាល់សោះថាគូស្វាមីភរិយានេះមានបញ្ហាជីវិតមិនចុះសម្រុង ទើបតែគ្រាដែលមានដំណឹងមរណភាពរបស់លោកឧកញ៉ាឈាង រ័ត្ន ទើបខ្ញុំឮពីការឃ្លាតពីគ្នាដែលស្ទើរតែមិនជឿ?។ ពេលនេះអ្វីៗកន្លងហួសដោយមិនអស់ចិត្ត ព្រោះគ្មានអ្វីដែលត្រូវវិលត្រឡប់មករកហេតុ រកបច្ច័យ រកផល ដើម្បីដំណោះស្រាយល្អនោះទៀតឡើយសម្រាប់គូស្នេហ៍ដែលធ្លាប់ល្អូកល្អិននេះគឺមានតែក្តីសោកស្តាយ អាឡោះអាល័យ និងការជួយរំលែកនូវក្តីទុក្ខសោកចំពោះក្រុមគ្រួសារទាំងសង្ខាងប៉ុណ្ណោះ ! សូមបួងសួងដល់គុណបុណ្យ នៃអំពើល្អដែលលោកឧកញ៉ាបានសន្សំ ជួយដឹកនាំគាំពារដួងវិញ្ញាណខ័ន្តលោកឈាង រ័ត្ន បានសោយសុខនាសុគតិភព។ខ្ញុំសូមជួយជាកម្លាំងចិត្តចំពោះប្អូនស្រី ស្រីអូន សូមតាំងជំហរឲ្យរឹងមាំ តាំងចិត្តឲ្យខ្លាំងក្លាពុះពារបន្តដំណើរជីវិតទៅមុខទៀតប្រកបដោយជោគជ័យ “។
គូររំលឹកថាលោកឧកញ៉ាឈាង រ័ត្ន ត្រូវបានមហាជនជាច្រើន រួមទាំងសិល្បករទូទៅគោរពលោកនិងចាត់ទុកថាជាឧកញ៉ាចិត្តធ័មម្នាក់ព្រោះលោកតែងតែជួយដល់អ្នកមានជីវភាពខ្វះខាត និងធើ្វការងារសប្បុរសធ័មជាបន្ដបន្ទាប់។សម្រាប់លោកគួច ខេវិន ដែលជាអតីតអគ្គនាយករងទូរទស្សន៍CTN ,SEA TV និងEV រាប់អាននិងជួបជាមួយលោកឧកញ៉ាឈាង រ័ត្ន ជាញឹកញាប់ ប៉ុន្ដែលោកមិនដែលដឹងថាលោកឧកញ៉ាមានបញ្ហាក្នុងគ្រួសារឡើយ។លោកឧកញាឈាង រ័ត្ន បានទទួលមរណភាពដោយធ្វើអត្តឃាតក្នុងអាយុ៤០ឆ្នាំ កាលពីថ្ងៃទី១១ ខែតុលា ឆ្នាំ២០២៣ វេលាម៉ោង១៤ និង៥០នាទី នៅផ្ទះលេខ១៤២ ផ្លូវR12 ស្ថិតនៅគម្រោងរ៉ូសវីល បុរីប៉េង ហួត ភូមិវាលស្បូវ សង្កាត់វាលស្បូវ ខណ្ឌច្បាអំពៅ រាជធានីភ្នំពេញ។ប្អូនថ្លៃលោកឧកញ៉ាឈាង រ័ត្ន គឺលោកម៉ៅ ស៊ីវន បានប្រាប់អ្នកសារព័តមានថាលោកឧកញ៉ាមានវិបត្តិផ្លូវចិត្តលែងលះគ្រួសារថ្មីៗ មិនទាន់ដាច់ស្រេច ។នៅថ្ងៃកើតហេតុលោកនិងក្រុមគ្រួសារបានទៅធ្វើបុណ្យនៅខេត្តព្រៃវែង ចំណែកបងថ្លៃលោកឧកញ៉ាឈាង រ័ត្ន មិនទៅជាមួយឡើយ ដោយថាជាប់រវល់ទៅជួបគ្រូចិនសែ នៅខេត្តកំពង់ចាម ។លុះពេលលោកត្រឡប់មកផ្ទះវិញនៅម៉ោង១៤ និង៥០នាទីឃើញរថយន្ដលោកឧកញ៉ាចតនៅមុខផ្ទះ ហើយពេលលោកចាក់សោរដើរចូលទៅក្នុងផ្ទះ និងដើរទៅក្រោយផ្ទះ ក៍ប្រទះឃើញបងថ្លៃឧកញ៉ាឈាង រ័ត្ន ចងកនិងខ្សែអង្រឹងជាប់ជណ្ដើរទ្វាក្រោយផ្ទះ ស្លាប់បាត់ទៅហើយ។ក្រោយផ្ទុះរឿងលោកឧកញ៉ាធ្វើអត្តឃាតនេះដែរនៅលើបណ្ដាញសង្គមានការបញ្ចេញសារឆ្លងឆ្លើយរបស់លោកឧកញ៉ាឈាង រ័ត្ន និងភរិយាលោកស្រីអូន ជាបន្ដបន្ទាប់ក្នុងនោះលោកមិនចង់បែកពីភរិយាឡើយ…។
សពលោកឧកញ៉ាឈាង រ័ត្ន ត្រូវបានក្រុមគ្រួសារធ្វើបុណ្យតាមប្រពៃណីនៅផ្ទះកើតហេតុខាងលើ ហើយនៅព្រឹកថ្ងៃទី១៣ បានដង្ហែរទៅបញ្ចុះនៅស្រុកកំណើតលោក នៅឃុំមេសរប្រចាន់ ស្រុកពារាំង ខេត្តព្រៃវែង ដោយមានក្រុមការងារ និងសិល្បករជាច្រើនចូលរួម។លោកគួច ខេវិន បានប្រាប់អ្នកយកព័តមានយើងតាមឆាតហ្វេសបុកថាលោកក៍មានការសោកស្ដាយដែរដែលមិនបានចូលរួមពិធីបុណ្យសពលោកឧកញ៉ាឈាង រ័ត្ន ដោយផ្ទាល់ ព្រោះជាង១សប្ដាហ៍ទៀតទើបលោកវិលមកខ្មែរវិញ៕