ភ្នំពេញ ៖ ក្រោយមានបណ្តាញសង្គមមួយចំនួន បានបង្ហោះជាសាធារណៈថា ទីតាំង ឌីអិន ស្ប៉ា និងម៉ាស្សា មានបង្កប់ល្បែងស៊ីសងខុសច្បាប់គ្រប់ប្រភេទ កម្លាំងគណៈបញ្ជាការឯកភាពខណ្ឌ ៧មករា បានចុះដល់ទីតាំង និងត្រួតពិនិត្យជាក់ស្តែង។
![](https://norkorthom.com/wp-content/uploads/2024/02/c1-27-1024x576.jpg)
សូមជម្រាបជូនថា ប្រតិបត្តិការចុះត្រួតពិនិត្យនេះ ធ្វើឡើងកាលពីរសៀលថ្ងៃទី២១ ខែកុម្ភៈ ឆ្នាំ២០២៤ មានការបញ្ជាពីលោកថេង សុថុល អភិបាលខណ្ឌ៧មករា បានចាត់ឱ្យលោកកេត ឧត្តម អភិបាលរងខណ្ឌ ដឹកនាំកម្លាំងគណៈបញ្ជាការឯកភាពខណ្ឌ ចុះត្រួតពិនិត្យផ្ទាល់ នៅចំណុចទីតាំង ឌីអិន ស្ប៉ានិងម៉ាស្សា ស្ថិតនៅតាមបណ្តោយផ្លូវ លេខ១២២ កែងផ្លូវលេខ១៧១ សង្កាត់មិត្តភាព ខណ្ឌ៧មករា តែពុំឃើញមានអ្វីពាក់ព័ន្ធបទល្មើសនិងល្បែងស៊ីសងឡើយ។
![](https://norkorthom.com/wp-content/uploads/2024/02/c4-8-1024x576.jpg)
នៅក្នុងការចុះត្រួតពិនិត្យនេះផងដែរ អាជ្ញាធរ បានអប់រំណែនាំដល់ម្ចាស់គ្រប់គ្រងទីតាំង និងបានធ្វើការកិច្ច សន្យា ចំពោះមុខសមត្ថកិច្ច មិនឱ្យមានបង្កប់ល្បែងស៊ីសងគ្រប់ប្រភេទ និងបទល្មើសផ្សេងៗដែលខុសច្បាប់ ការជួញដូរមនុស្ស និងសារធាតុញៀន ជាដើម។ ក្នុងករណីមិនអនុវត្តតាមកិច្ចសន្យា អាជ្ញាធរនឹងអនុវត្តតាមច្បាប់។
![](https://norkorthom.com/wp-content/uploads/2024/02/c5-4-1024x576.jpg)
សូមបញ្ជាក់ផងដែរ កាលពីថ្ងៃទី១៤ ខែកុម្ភៈ ឆ្នាំ ២០២៤ កន្លងមកនេះ សម្តេចហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ចេញបញ្ជាឱ្យអភិបាលរាជធានី-ខេត្តទាំងអស់ នៅទូទាំងប្រទេស ត្រួតពិនិត្យជាបន្ទាន់លើទីតាំងល្បែងផ្សងសំណាង និងល្បែងស៊ីសងខុសច្បាប់គ្រប់ប្រភេទ ត្រូវតែបង្ក្រាប។
![](https://norkorthom.com/wp-content/uploads/2024/02/c8-2-1024x576.jpg)
ក្នុងនោះដែរ លោកឃួង ស្រេង អភិបាលរាជធានីភ្នំពេញ កាលពីរសៀលថ្ងៃទី១៤ ខែកុម្ភៈ ឆ្នាំ២០២៤ បានដាក់ដាក់បញ្ជាឱ្យអាជ្ញាធរខណ្ឌ ទាំង១៤ ក៏ដូចជាប្រធានផ្សារ ទាំង២៥ គឺមិនអនុញ្ញាតឱ្យមានល្បែងស៊ីសងខុសច្បាប់គ្រប់ប្រភេទ បន្តមាននៅក្នុងមូលដ្ឋានរបស់ខ្លួនឡើយ៕
![](https://norkorthom.com/wp-content/uploads/2024/02/c9-2-1024x576.jpg)
![](https://norkorthom.com/wp-content/uploads/2024/02/c16-1-1024x576.jpg)
![](https://norkorthom.com/wp-content/uploads/2024/02/c13-1024x576.jpg)
![](https://norkorthom.com/wp-content/uploads/2024/02/c15-1024x576.jpg)