ភ្នំពេញ៖តន់ ច័ន្ទសីម៉ា និងរ៉េត ស៊ូហ្សាណា សុទ្ធតែជាអតីតបេក្ខភាពThe Voice Cambodia រដូវកាលទី២ ដូចគ្នាហើយពេលនេះស្រីស្រស់ទាំងពីរដួងកំពុងតែអុកឡុកនៅផលិតកម្ម២ផ្សេងគ្នានោះគឺនាងច័ន្ទសីម៉ា ជាតួឯករបស់Galaxy ខណៈដែលស៊ូហ្សាណា ជាតារាវ័យក្មេងដែលលេចធ្លោជាងគេនៅហង្សមាស ។
តើតន់ ច័ន្ទសីម៉ា -រ៉េត ស៊ូហ្សាណា ១ណាទៅដែលនឹងក្លាយទៅជាតារាវ័យក្មេងលេចធ្លោបំផុតប្រចាំឆ្នាំ២០២៤ ?
តន់ ច័ន្ទសីម៉ា បានក្លាយទៅជាតារាស្រីឈានមុខគេរបស់ផលិតកម្មGalaxy ជាង៤ឆ្នាំមកហើយដែលប៉ុន្មានឆ្នាំចុងក្រោយនេះនាងសីម៉ា មានដៃគូល្អជាងគេដែលគ្មានតារាស្រីរូបណាអាចធ្វើបានដូចនាងព្រោះព្រាប សុវត្ថិ ,ខេមរៈ សិរីមន្ដ និងខេម ស្ថិតក្នុងកណ្ដាប់ដៃនាងតែម្នាក់ដែលអាចច្រៀងឆ្លងឆ្លើយបានគ្រប់ពេល។ស្រីស្រស់ម្នាក់នេះត្រូវអ្នកគ្រប់គ្រងផលិតកម្មកំណត់តម្លៃខ្លួនច្រៀងConcerts ធំៗ១កម្មវិធីស៊ីថ្លៃដល់ទៅ៥ពាន់ដុល្លារតាំងពីឆ្នាំ២០២០ មកម្លេះដែលធ្វើឲ្យអ្នកដឹកនាំកម្មវិធីសិល្បៈភាគច្រើនគ្មានលទ្ធភាពជួលនាងច្រៀងទេ ព្រោះហៅនាងម្នាក់ស្មើតារាល្បីល្មមៗជិត១០នាក់ ទើបធ្វើឲ្យនាងបាត់បង់ឱកាសច្រៀងតាមStudio តាមឆាកទូរទស្សន៍ស្ទើតែទាំងស្រុង។ប៉ុន្ដែរយៈពេលចុងក្រោយនេះគេឃើញបទចម្រៀងនាងសីម៉ា មិនសូវមានផ្ទុះដូចមុនទេ ហើយចំនួនViews ក៍ធ្លាក់ចុះទើបធ្វើឲ្យនាងលែងសូវឡើងកូដខ្លាំងដូចមុន ដែលបញ្ហានេះត្រូវបានគេសន្និដ្ឋានថាមកពីមុននេះនាងចេញមុខការពារថៅកែស្ទួនៗពេក។ទោះជាយ៉ាងណាអ្នកជំនាញសិល្បៈបានលើកឡើងថាក្នុងករណីដែលថៅកែGalaxy នៅតែមិនព្រមទិញតារាស្រីជើងខ្លាំងរូបណាមកប្រជែងនាងសីម៉ា នោះទេ នារីតូចតន់រូបនេះនៅតែជាតួឯកដដែល។
ចំពោះនាងរ៉េត ស៊ូហ្សាណា វិញនាងនៅតែជាតារាស្រីវ័យក្មេងដែលលេចធ្លោជាងគេនៅហង្សមាសបើទោះជាមិនស្ថិតក្នុងចំណោមតារាដែលអាចប្រជែងតំណែងតារាជើងខ្លាំងៗជូរមុខរបស់ហង្សមាសមានដូចជាឱក សុគន្ធកញ្ញា ,ពេជ្រ សោភា និងសុគន្ធ និសា ជាដើមក្ដី តែហ្សាណា មានទីផ្សារសិល្បៈជាប្រចាំទាំងការច្រៀងសម្ដែងតាមConcerts និងស្ពតពាណិជ្ជកម្ម។តារាមានត្រេមុខស្រដៀងកូនកាត់ជប៉ុនរូបនេះគ្មានដៃគូច្បាស់លាស់ឡើយនៅឆ្នាំ២០២៤ នេះក្រោយនាងនិងសុវត្ថិ មុនីនាគ កូនប្រុសឧកញ៉ាព្រាប សុវត្ថិ លែងចាប់ដៃគ្នា។ហ្សាណា សាកល្បងច្រៀងដៃគូជាមួយលោកលីម តិចម៉េង ១ប្រាវក៍បាត់ទៅវិញ ហេតុនេះបើនិយាយពីដៃគូនាងមិនអាចប្រៀបធៀបជាមួយនាងសីម៉ា បានជាដាច់ខាតនាពេលបច្ចុបន្ន ។ប្រភពពីអ្នកដឹកនាំកម្មវិធីប្រគុំតន្រ្ដីបានឲ្យដឹងថានាងស៊ូហ្សាណា ច្រៀង១កម្មវិធីស៊ីថ្លៃក្បែ២ពាន់ដុល្លារ ហេតុនេះហើយបានជានាងចេញមុខញឹញញាប់ ព្រោះតម្លៃនេះភាគច្រើនអ្នកដឹកនាំការប្រគុំតន្រ្ដីមានលទ្ធភាពទៅរួច ។ទោះជាយ៉ាងណាសម្រាប់ឆ្នាំ២០២៤ នេះនាងហ្សាណា មិនទាន់មានបទអ្វីលេចធ្លោខ្លាំងទេ ហេតុនេះបើចង់វ៉ា នាងសីម៉ា ប្រាកដជារឿងពិបាកនឹងទៅរួច ។
អ្នកជំនាញសិល្បៈលោកនូ ស៊ឹប ធ្លាប់ប្រាប់អ្នកយកព័តមានយើងថាតន់ ច័ន្ទសីម៉ា និងតារាវ័យក្មេងៗមួយចំនួនទៀតនាពេលបច្ចុប្បន្នសុទ្ធតែមានទេពកោសល្យល្អ មានសម្ថភាពខ្លាំងរៀងៗខ្លួន។លោកថានៅពេលដែលសីម៉ា ច្រៀងដៃគូជាមួយលោកព្រាប សុវត្ថិ អ្នកឡើងកូដគឺជានាង។ដោយឡែកលោកមិញ សុធីវណ្ណ វិញធ្លាប់ប្រាប់ដែរថាចំណុចខ្លាំងរបស់រ៉េត ស៊ូហ្សាណា គឺនៅលើរូបសម្រស់និងការច្រៀងបទជាភាសារបរទេស ។ប៉ុន្ដែការច្រៀងបទខ្មែរវិញលោកថាហ្សាណា នៅត្រូវការពេលវេលាច្រើនបន្ថែមទៀត។
តន់ ច័ន្ទសីម៉ា អាយុ២៥ឆ្នាំបានទទួលស្គាល់ថានាងបានកែសម្រស់៣ផ្នែកគឺធ្វើច្រមុះ ,ចាក់ចង្កា និងពត់ធ្មេញ ។ស្រីស្រស់រូបនេះធ្លាប់លេចឭថានាងមានឧកញ៉ាពោះម៉ាយម្នាក់តាមស្នេហា តែចុងក្រោយគ្រប់ពេលវេលានាងតែងតែថ្ងូរដូចព្រាបថារកតែក្ដិបសង្សារ១បណ្ដើរដូចគេមិនបានទៅវិញ។ចំណែកនាងរ៉េត ស៊ូហ្សាណា វិញឆ្នាំនេះអាយុ២៤ឆ្នាំ មិនដែលលេចឭថាបានកែកុនរូបសម្រស់ផ្នែកណាមួយនោះទេ ។ក្រោយឈប់ស្និតស្នេហ៍សុវត្ថិ មុនីនាគ ជាង១ឆ្នាំហ្សាណា មិនធ្លាប់ណ្ដើរបុរសណាដោយបើកចំហបែបជាគូសង្សារឡើយ ។ច័ន្ទសីម៉ា -ស៊ូហ្សាណា មានម្ដាយតាមជាប់ជាប្រចាំដូចគ្នាហេតុនេះប្រុសដែលចង់លេងស្ទីលស្នេហ៍បែបឆក់កណ្ដៀតប្រាកដជាមិនអាចទៅរួចឡើយ ៕