ភ្នំពេញ៖រយៈពេលជាង៣ឆ្នាំមកហើយដែលពេជ្រ សោភា ច្រៀងដោយគ្មានដៃគូច្បាស់លាស់ទេ បន្ទាប់ពីព្រាប សុវត្ថិ បានដើរចេញពីហង្សមាសគឺនាងច្រើនតែចេញបទទោល និងច្រៀងជាមួយតារាវ័យក្មេងជាងខ្លួនដូចជាថ្មីៗនេះចេញបទចូលឆ្នាំខ្មែរនាងចាប់ដៃជាមួយលោកលីម តិចម៉េង ,នាង ដាវីន ,ស៊ឹម ច័ន្ទពន្លឺ និងថុល សុភិទិ ជាដើម ។ប៉ុន្ដែនៅដើមឆ្នាំ២០២៤ នេះដែរពេជ្រ សោភា រកបានដៃគូថ្មីច្បាស់លាស់ជំនួសព្រាប សុវត្ថិ ហើយនោះគឺតារាចម្រៀងរោមទ្រូងច្រើនលោកឆន សុវណ្ណារាជ ដែលនេះមិនមែនជាការចាប់ដៃគូគ្នាជាលើកដំបូងបំផុតនោះទេ ព្រោះអ្នកទាំងពីរក៍ធ្លាប់ធ្វើជាដៃគ្នាកាលពីឆ្នាំ២០១៥ -២០១៦ ផងដែរ។អ្វីដែលគួរឲ្យកត់សម្គាល់ពេជ្រ សោភា និងឆន សុវណ្ណារាជ មកលើកនេះមិនដូចពីមុននោះទេ ពោលគឺហាក់លើសពីដៃគូធម្មតា ព្រោះមានពេលខ្លះអ្នកទាំងពីរអោបថើបគ្នាលើឆាកទៅតាមអត្ថន័យបទចម្រៀងតែម្ដង ដែលធ្វើឲ្យFan ទាំងសងខាងស្រឡាំងកាំង ។សោភា ដែលមានអាយុ៤១ឆ្នាំ បងសុវណ្ណារាជ ២ឆ្នាំ (៣៩ឆ្នាំ)នោះនាងធ្លាប់សរសើរលោកព្រាប សុវត្ថិ ថាបានជួយនាងច្រើនតាមរយៈការចាប់ដៃគូគ្នាកន្លងមកដែលនាងជាអ្នកតោងកាលីពលោកឧកញ៉ាស្នាយ ។ប៉ុន្ដែសោ ភា ក៍ធ្លាប់និយាយលើកពីគុណសម្បត្តិរបស់សុវណ្ណារាជ ដែរថាអំឡុងពេលនាងធ្លាក់កូដនៅឆ្នាំ២០១៥ ហើយពេលនោះសុវណ្ណារាជ កំពុងតែឡើងល្បីល្បាញខ្លាំងគឺមានតែរាជ នេះហើយដែលព្រមចាប់ដៃគូជាមួយនាង ។ពេលនេះរំលងបានជាង៨ឆ្នាំ សោភា -រាជ បានវិលមកចាប់ដៃគូគ្នាសារជាថ្មីម្ដងទៀត ខណៈដែលថ្មីៗនេះបទចម្រៀងរបស់សុវណ្ណារាជ រងការរិះគន់ដូចទឹកបាក់ទំនប់នោះសោភា បានចេញមុខភ្លាមៗដើម្បីការពារនិងលើកទឹកចិត្តបុរសរោមទ្រូងច្រើនរូបនេះយ៉ាងពេញទំហ៊ឹងតែម្ដង។
សូមរំលឹកថាក្រៅពីព្រាប សុវត្ថិ តារាវ័យ៤១ឆ្នាំពេជ្រ សោភា ធ្លាប់បានចាប់ដៃគូជាមួយតារាប្រុសមួយចំនួនទៀតមានដូចជាលោកងួន ចាន់ដេវីត ,Step ,ហ្សូណូ និងឈឿន ជាលឿយ ជាដើម ប៉ុន្ដែអ្នកជំនាញសិល្បៈបានអះអាងថាក្នុងចំណោមនោះសោភា ជោគជ័យខ្លាំងបំផុតគឺច្រៀងចង្វាក់រ៉េបជាមួយងួន ចាន់ដេវីត ។ដោយឡែកសម្រាប់ការវិលរកបានដៃគូចាស់វិញរបស់សោភា នាពេលនេះគេមិនទាន់អាចសន្និដ្ឋានបានទេថាទីផ្សារចម្រៀងរបស់អ្នកទាំងពីរនឹងបោះពួយទៅមុខទៀត ឬយ៉ាងណាឡើយ ព្រោះបច្ចុប្បន្នតារាវ័យក្មេងរបស់ហង្សមាសមានបរិមាណកាន់តែច្រើនពោលគឺឡើងគជាន់ជើងគ្នា ហើយសោភា ធ្លាប់ប្រាប់អ្នកយកព័តមានយើងថានៅពេលនាងមានអាយុច្រើនជាងនេះបន្ដិចនោះនឹងប្រឹងនិពន្ធបទចម្រៀងឲ្យតារាក្មេងៗនៅហង្សមាសច្រៀងហើយនាងអង្គុយស្ដាប់វិញម្ដង។
គេកត់សម្គាល់ថាអំឡុងពេលដែលពេជ្រ សោភា ចាប់ដៃលោករាជ សារជាថ្មីដោយមានពេលខ្លះអ្នកទាំងពីរអោបថើបគ្នាលើឆាកយ៉ាងស្អិតល្មូតនោះគូដណ្ដឹងរបស់នាងលោកឆឹម សក្កដា ឯណ្ណោះវិញបែជាចេញសារយ៉ាងចម្លែកៗដែលបង្ហាញសញ្ញាថាចំណងស្នេហារបស់ពួកគេអាចនឹងមានការប្រែប្រួល។កាលពីថ្ងៃទី៣ ខែមេសា លោកសក្កដា ទម្លាយសារថាលោកចង់ធ្វើអត្តឃាត ហើយនៅពេលមិត្តភក្ដិសួររកហេតុផលនៃការចង់បញ្ចប់ជីវិតនោះលោកថា”រស់នៅគ្មានន័យ” ។ប៉ុន្ដែនៅពេលដែលអ្នកយកព័តមានយើងសួរសោភា ពាក់ព័ន្ធរឿងលោកសក្កដា ចង់ជ្រើសផ្លូវបិទភ្នែកជារៀងរហូតលែងដកដង្ហើមនេះនាងបែជាថាមិនដឹងរឿងអ្វីទាំងអស់ទៅវិញ ដោយលើកហេតុផលថារវល់ការងារសិល្បៈនិងលេងហ្វេសុបកផ្ដោតតែលើការធ្វើបទចម្រៀងនិងការច្រៀងសម្ដែងប៉ុណ្ណោះ។អ្វីដែលគូរឲ្យកត់សម្គាល់ផងដែរនៅថ្ងៃនាងដួង ម៉ានិច្ច រៀបការប្ដីនៅឆ្នេរមួយនៅខេត្តព្រះសីហនុដែលតារាភាគច្រើនបណ្ដើរគ្នាជាគូទៅចូលរួមរៀងៗខ្លួននោះគេឃើញលោកសក្កដា ទៅបង្ហាញខ្លួនតែម្នាក់ឯងនិងដោយទឹកមុខក្រៀមក្រំហាក់គ្មានអារម្មណ៍ក្នុងខ្លួនទៅវិញ។Fan របស់សោភា បារម្ភថាបើតារាហង្សមាសរូបនេះនៅតែពន្យាពេលរៀបការជាមួយលោកឆឹម សក្កដា តទៅទៀតនោះចំណងស្នេហាមួយនេះអាចនឹងក្រឡាប់ចាក់ជាមិនខាន ។
មជ្ឈដ្ឋានមហាជនបានលើកឡើងថាពេជ្រ សោភា ដែលយកការងារសិល្បៈធំជាងស្នេហានោះអាចនឹងជួបវិបត្តិស្នេហ៍ជាលើកទី៣ ប្រសិនបើនាងនិងសង្សារកាន់តែរយាលៗគ្នាបែបនេះតទៅទៀត។តែសោភា វិញបែជាថាសព្វថ្ងៃក្រៅពីផ្ដោតលើការងារសិល្បៈនាងគ្មានគិតលើរឿងអ្វីផ្សេងទៀតនោះទេ ពិសេសគឺរឿងរៀបការអត់ទាន់បានត្រៀមខ្លួននៅឆ្នាំ២០២៤ នេះឡើយ៕
