ភ្នំពេញ៖ការកែសម្ផស្សដល់ទៅ៣កន្លែងគឺច្រមុះ ,ចង្ហា និងពត់ធ្មេញ បានធ្វើឲ្យនាងតន់ ច័ន្ទសីម៉ា មានប្រែប្រួលសម្រស់ស្ទើតែទាំងស្រុងបើប្រៀបធៀបកាលពី៨ឆ្នាំមុនអំឡុងពេលដែលនាងជាបេក្ខភាពThe Voice Cambodia រដូវកាលទី២ ឆ្នាំ២០១៦ ។ប៉ុន្ដែវាមិនទាន់បានធ្វើឲ្យស្រីស្រស់រូបនេះក្លាយទៅជានារីដែលមានមន្ដស្នេហ៍បំផុតនោះទេ ព្រោះគ្រប់ពេលវេលានាងតែងតែថ្ងូរអត់សង្សារ បើទោះជាពាក្យពេជ្រន៍ទាំងនេះគេជឿថាគ្រាន់តែជាDrama ក្ដី តែក៍អាចធ្វើឲ្យអ្នកខ្លះគិតថាបើសិនជាសីម៉ា នៅតែរកសង្សារអត់បាន១គ្រាប់ធ្វើថ្នាំបែបនេះនាងគួរតែទៅកែសម្រស់ថែមទៀត ឬអាចនិយាយបានថាសម្រស់ប៉ុណ្ណឹងនៅមិនទាន់គ្រប់គ្រាន់សម្រាប់រូបនាងដើម្បីឲ្យប្រុសមើលឃើញថាជាស្រីស្អាតឡើយ ។តែនាងច័ន្ទសីម៉ា បែជាមិនហ៊ានកែកុនថែមទៀតទៅវិញ ពោលគឺស្ងាត់រឿងនាងកែសម្រស់ជាង២ឆ្នាំទៅហើយ ខណៈដែលកន្លែងពិសេស(សុដន់)ដែលស្រីៗភាគច្រើននិយមកែពង្រីកដើម្បីឲ្យកាន់តែទាក់ទាញនោះ មិនមានដំណឹងនាងសីម៉ា បានកែកន្លែងនោះទេ ។
សូមបញ្ជាក់ថានាងតន់ ច័ន្ទសីម៉ា មិនសូវមានសន្ទុះខ្លាំងក្លាដូចមុនទេ នារយៈពេលចុងក្រោយនេះ បើទោះជាតារាប្រុសលំដាប់ជូរមុខទាំង៣ដួងគឺព្រាប សុវត្ថិ ,ខេម និងខេមរៈ សិរីមន្ដ ស្ថិតនៅក្នុងកណ្ដាប់ដៃនាងធ្វើជាដៃគូឆ្លងឆ្លើយផ្ដាច់មុខនៅGalaxy ក្ដី តែតាំងពីសីម៉ា សកម្មចេញមុខការពារថៅកែស្ទួនៗនោះអ្នកគាំទ្រខ្លះធ្វើពហិការលែងស្ដាប់ចម្រៀងនាងតែម្ដង ។ទោះជាយ៉ាងណារៀមច្បងក្នុងសិល្បៈមួយចំនួនបានលើកឡើងថាបើមិនឲ្យនាងច័ន្ទសីម៉ា ការពារថៅកែទេតើឲ្យនាងកាន់ជើងអ្នកណាទៅ ?ការលើកឡើងបែបនេះដោយសារតែគេយល់ថានាងសីម៉ា ពីមុននឹងបច្ចុប្បន្នមានខ្សែជីវិតខុសគ្នាដូចមេឃ និងដី ព្រោះកាលមិនទាន់ល្បីនាងធ្លាប់ជិះម៉ូតូទៅច្រៀងពេលរាត្រី១យប់បានតែជាង១០ដុល្លារ និងរស់នៅបន្ទប់ជួល១ខែ៦០ដុល្លារ នៅម្ដុំស្ដុបDN តែពេលនេះនាងច្រៀងកម្មវិធីធំ១ស៊ីថ្លៃ៥ពាន់ដុល្លារ និងមានផ្ទះប្រណិតផ្ទាល់ខ្លួន ព្រមទាំងជិះរថយន្ដល្បីៗផ្លាស់ប្ដូរជាបន្ដបន្ទាប់ ហេតុនេះបើមិនមានថៅកែជួយតើអ្នកណាអាចធ្វើឲ្យនាងល្បីនិងហ៊ឺហាបែបនេះ ?យ៉ាងណាចុងក្រោយនេះគេឃើញនាងសីម៉ា បន្ថយសកម្មភាពចេញមុខការពារថៅកែដោយបើកចំហដូចមុនដែលចំណុចនេះគេជឿរថាមកពីនាងមិនចង់មានបញ្ហាចម្រូងចម្រាសជាមួយFan ថែមទៀត។
តន់ ច័ន្ទសីម៉ា ជាតារាដែលមានភាពក្លាហានហ៊ានសារភាពរឿងកែសម្រស់ដែលខុសពីតារាខ្លះទៀតកែច្រើនផ្នែកលើសនាងផង ប៉ុន្ដែពួកគេអត់ដែលទទួលស្គាល់ម្ដងណាឡើយ ។ទាំងអ្នកក្នុងនិងក្រៅសិល្បៈសុទ្ធតែមិន ជឿរថានាងច័ន្ទសីម៉ា ល្បីប៉ុណ្ណឹងដែររកសង្សារម្នាក់មកអោបរឹតដូចគេមិនបាននោះទេ ប៉ុន្ដែនាងសីម៉ា នៅតែថាការនិយាយរបស់នាងនោះគឺជាការពិត តែនាងដឹងមុនថាប្រាកដជាគ្មានអ្នកណាម្នាក់ជឿរជាក់លើនាងនិយាយយ៉ាងនេះឡើយ ។
ក្រៅពីតន់ ច័ន្ទសីម៉ា តារាដែលគេជឿរថាមានសង្សារហើយតែនៅថ្ងូរអត់សង្សារនៅឆ្នាំ២០២៤ នេះមានដូចជាសុខ ពិសី និងសុខ សោម៉ាវត្តី ជាដើម ។សម្រាប់នាងច័ន្ទសីម៉ា វិញទើបតែមានវ័យ២៥ឆ្នាំ ទេ ហេតុនេះបើនៅឆ្នាំ២០២៤ នេះនាងនៅតែគ្មានយីអ៊ុនស្នេហ៍ដូចមាត់មែននោះស្រីស្រស់នៅមានពេលច្រើនទៀតដើម្បីជ្រើសប្រុសស្នេហ៍ឲ្យបានដូចតារាស្រីល្បីៗផ្សេងទៀតដែលពេលនេះពួកគេមិនកម្សត់ដូចសីម៉ា នោះទេ ។
គួររំលឹកថាមុននាងតន់ ច័ន្ទសីម៉ា ប្រកាសថាបេះដូងនាងនៅទំនេរនោះធ្លាប់លេចឭថាមានឧកញ៉ាពោះម៉ាយម្នាក់តាមស្នេហ៍នាងយ៉ាងប្រកិតបំផុត តែជាង១ឆ្នាំហើយដែលដំណឹងនេះក៍បានស្ងប់ស្ងាត់ទៅវិញព្រោះលោកឧកញ៉ារកបានគូស្នេហាថ្មីជាអ្នកមេម៉ាយកូន១ទៅហើយ។សម្រាប់នាងសីម៉ា គេជឿរថាភាពល្បីរបស់នាងប្រាកដជាអតីតអ្នកស្មូតជាប់លេខ១ ប្រចាំខេត្តតាកែវរូបនេះមានជម្រើសស្នេហ៍ច្រើន គ្រាន់តែនាងជ្រើសផ្លូវលាក់មុខគូស្នេហ៍ប៉ុណ្ណោះ៕
