ទម្រង់​សិល្បៈ​អត្ត​សញ្ញាណ​ជាតិ​ខ្មែរ បង្ហាញ​អន្តរ​ជាតិ​នៅ​សិង្ហ​បុរី

សិង្ហបុរី ៖ ទម្រង់សិល្បៈចម្រុះគ្រប់ប្រភេទ ដែលជាអត្តញ្ញាណវប្បធម៌ជាតិខ្មែរ បានសម្តែង ជូនអន្តរជាតិទស្សនា និងបានសម្តែងការកោតសរសើរស្ញប់ស្ញែងក្នុងព្រឹត្តិការណ៍ក្បួនដង្ហែឈីង ហ្គេ២០១៧ (Chingay 2017) នៅទីក្រុង សាំងហ្គាពួរ ប្រទេសសិង្ហបុរី ដែលប្រារឰធ្វើពី ថ្ងៃទី១០ ដល់១៣ ខែកុម្ភៈ ឆ្នាំ២០១៧។

កាលពីថ្ងៃទី០៩ ខែកុម្ភៈ ឆ្នាំ២០១៧ គណៈប្រតិភូកម្ពុជាដឹកនាំដោយលោកស្រីភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ រួមជាមួយលោកហ៊ុន ម៉ានី ប្រធានសហភាព សហព័ន្ធយុវជនកម្ពុជា និងក្រុមសិល្បករ សិល្ប- ការិនីកម្ពុជា សរុប៧៤នាក់ បានអញ្ជើញទៅ កាន់ទីក្រុងសាំងហ្គាពួរ ប្រទេសសិង្ហបុរី ដើម្បី ចូលរួមព្រឹត្តិការណ៍ “ឈីងហ្គេ ឆ្នាំ២០១៧” (Chingay 2017)។

នៅថ្ងៃទី១០ ខែកុម្ភៈ ឆ្នាំ២០១៧ ក្រុម សិល្បៈចម្រុះរបស់កម្ពុជា ចំនួន៥០នាក់ បាន បង្ហាញទស្សនីយភាព “សុខដុម ក្នុងភាពចម្រុះ វប្បធម៌” ជូនទស្សនិកជនមកពីបណ្តាប្រទេស នានា រួមទាំងម្ចាស់ផ្ទះសិង្ហបុរី នូវក្បាច់រាំចម្រុះ ដ៏រស់រវើក មានរបាំអប្សារា ក្បាច់គុនល្បុក្កតោ ល្ខោនស្បែកធំ និងរបាំនាគ ជាដើម ដែលសុទ្ធ តែជាទម្រង់សិល្បៈអត្តសញ្ញាណវប្បធម៌ជាតិ ខ្មែរ ដែលធ្វើឱ្យអន្តរជាតិមានការរំភើបស្ញប់ ស្ញែង ខណៈក្នុងព្រឹត្តិការណ៍នោះ ក៏មានសិល្បករ សិល្បការិនី មកពីបណ្តាប្រទេសនានា សរុប ជិត១ម៉ឺននាក់ បានមកចូលរួមសម្តែងផងដែរ។

កាលពីយប់ថ្ងៃទី១០ ខែកុម្ភៈ ឆ្នាំ២០១៧ នេះដែរ ក្រោយពីក្បួនឈីងហ្គេ ត្រូវបានបញ្ចប់ នៅថ្ងៃទី០១ គណៈប្រតិភូកម្ពុជា ដែលដឹកនាំ ដោយលោកស្រីភឿង សកុណា រដ្ឋមន្ត្រីក្រសួង វប្បធម៌ និងវិចិត្រសិល្បៈ រួមជាមួយលោកហ៊ុន ម៉ានី ប្រធានសហភាពសហព័ន្ធយុវជនកម្ពុជា បានចូលរួមសម្តែងការគួរសមជាមួយលោកលី ស៊ានឡុង នាយករដ្ឋមន្ត្រីសិង្ហបុរី និងភរិយា ផងដែរ។

គួរបញ្ជាក់ថា ក្បួនដង្ហែឈីងហ្គេ ជាក្បួន ដង្ហែព្យុហយាត្រាសិល្បៈទស្សនីយភាពដ៏ធំជាង គេមួយនៅអាស៊ីដែលរៀបចំឡើងជារៀងរាល់ ឆ្នាំ ដោយសមាគមប្រជាជនសាធារណរដ្ឋសិង្ហបុរី (People’s Association Singapore)។ កម្មវិធីនេះត្រូវបានផ្តួចផ្តើមដោយអតីតនាយក រដ្ឋមន្ត្រី លី ក្វាន់យូ ដើម្បីបង្ហាញពីភាពអស្ចារ្យ ភាពស្រស់បំព្រង និងភាពសម្បូរបែបនៃវប្បធម៌ ចម្រុះ។ ព្រឹត្តិការណ៍ក្បួនដង្ហែឈីងហ្គេ ធ្វើឱ្យ មានសំឡេងកងរំពងជាមួយភាពសប្បាយរីករាយ ក៏ដូចជាការអប់អរសាទរបុណ្យចូលឆ្នាំថ្មី របស់ខ្លួន ដើម្បីបណ្តេញឧបទ្រពចង្រៃចេញឱ្យ ឆ្ងាយ ជំនួសឱ្យការដុតផាវ ដែលត្រូវបានហាម ឃាត់។

ព្រឹត្តិការណ៍ក្បួនដង្ហែឈីងហ្គេ ឆ្នាំ២០១៧ បានប្រារឰឡើងចាប់ពីថ្ងៃទី១០ ដល់ថ្ងៃទី១១ ខែកុម្ភៈ ហើយប្រធានបទនៃក្បួនដង្ហែនៅឆ្នាំ នេះ គឺ “Soundwaves of Chingay, Wecare Singapore”។ ក្បួនដង្ហែព្យុហយាត្រា នៃប្រជាជនសិង្ហបុរី នឹងត្រូវបានបង្ហាញលើចម្ងាយផ្លូវ វែង នៅក្នុងទម្រង់លក្ខណៈស្រស់បំព្រង ជាមួយនឹងប្រឡាយទឹកប្រវែង 360m ស្របជា- មួយវេទិកាសម្តែងដែលធ្វើឱ្យអ្នកទស្សនាទទួល អារម្មណ៍រំភើបជាមួយការប្រលែងលេងរបស់ សិល្បករ សិល្បការិនីជាមួយនឹង ទឹក ភ្លើង ព្រម ទាំងព្រិលទឹកកកផ្សេងៗ។

កម្មវិធីទាំងមូលត្រូវបានបែងចែកជា៧វគ្គ

(រួមបញ្ចូលទាំងការបើកនិងបិទកម្មវិធី) ដែលក្នុងនោះ វគ្គទីបី គឺជាវគ្គនៃការបង្ហាញពី វប្បធម៌ផ្សេងៗពីសំណាក់បណ្តាប្រតិភូអន្តរជាតិ។

ប្រទេសកម្ពុជា មានកិត្តិយស ត្រូវបាន អញ្ជើញឱ្យទៅសម្តែងនៅក្នុងវគ្គនេះក្នុងទម្រង់២ ក្នុង ១-ទម្រង់២ ក្នុង១ គឺនឹងមានន័យថា មាន ប្រទេស២ផ្សេងគ្នាធ្វើការសម្តែងក្នុងតំបន់តែ១ (ដោយប្រើប្រាស់ផ្ទៃប្រមាណ100m) សម្រាប់ រយៈពេល៣នាទីកន្លះ។ គ្នុងរយៈពេល៣នាទី កន្លះនេះ គឺត្រូវបែងចែកជាពីរវគ្គ ដែលក្នុងនោះ វគ្គ២ នាទីដំបូង គឺជាការចាប់ភ្លេងអមដំណើរ ក្រុមអ្នកសិល្បៈ ចូលទៅកាន់ទីតាំង ហើយវគ្គ ១នាទីកន្លះទៀត គឺជាការបង្ហាញនូវការសម្តែង។ ប្រទេសម៉ាឡេស៊ី ជាដៃគូសម្តែងរបស់កម្ពុជា ក្នុងឆ្នាំនេះ។

ទស្សនីយភាព ដែលកម្ពុជា នាំយកទៅ បង្ហាញក្នុងព្រឹត្តិការណ៍ឈីងហ្គេ មានចំណងជើង ថា “សុខដុមក្នុងភាពចម្រុះផ្នែកវប្បធម៌” ត្រូវ បានសិល្បករ សិល្បការិនីកម្ពុជា ចំនួន៥០នាក់ នាំយកទៅបង្ហាញទស្សនិកជនមកពីគ្រប់ទិសទី ក្នុងព្រឹត្តិការណ៍ដ៏ធំមួយនេះ ក្រោមប្រធានបទ ៖ “អត្តសញ្ញាណវប្បធម៌ ការការពារវប្បធម៌ និង ការអភិវឌ្ឍវប្បធម៌ ការអភិរក្សដើម្បីអភិវឌ្ឍ និងការអភិវឌ្ឍដើម្បីអភិរក្ស”។

“សុខដុមក្នុងភាពចម្រុះផ្នែកវប្បធម៌” ជា ក្បាច់រាំចម្រុះ និងរស់រវើក ហើយជាក្បាច់រាំ ដែលមានលាយ របាំ អប្សរា (អត្តសញ្ញាណ វប្បធម៌) ល្បុក្កតោ (ការការពារវប្បធម៌) និង ប្រភេទនៃចលនាសិល្បៈកម្ពុជាក្នុងនោះ រួមទាំង ល្ខោនស្បែកធំ (ការអភិវឌ្ឍវប្បធម៌) ដែល បង្ហាញពីអត្តសញ្ញាណវប្បធម៌របស់ប្រទេស កម្ពុជា ការការពារវប្បធម៌ ការអភិវឌ្ឍវប្បធម៌ និងភាពរុងរឿងនៃប្រទេសនេះ។ ការរួមបញ្ចូល នូវរតនសម្បត្តិ វប្បធម៌របស់ប្រទេសកម្ពុជា មានដូចជា ៖

អប្សរាជាតួអង្គអាទិទេពនៅសម័យបុរាណ មានភាពស្រស់ស្អាត បរិសុទ្ធ និងស្រស់ឆើតឆាយ តំណាងឱ្យវប្បធម៌ដ៏រុងរឿង និងព្រលឹងជាតិ ដែលបង្ហាញថា កម្ពុជាជាព្រះរាជាណាចក្រ ដែលមានសន្តិភាព និងសម្បូរបែបផ្នែកវប្បធម៌ បុរាណ និងអរិយធម៌ដ៏រុងរឿង។

ល្បុក្កតោ ជាទម្រង់វប្បធម៌ដ៏មានវ័យ ចំណាស់មួយ រួមបញ្ចូលសក្តានុពល និងការ ប្តេជ្ញាចិត្តរបស់ប្រជាជនខ្មែរ ដែលជឿជាក់លើ ប្រទេសកម្ពុជានិងទទួលខុសត្រូវ ដើម្បីធ្វើឱ្យ ប្រទេសនេះរីកចម្រើណទៅមុខ

របាំស្រមោល (ល្ខោនស្បែកធំ) ជាសិល្បៈ ប្រពៃណីបុរាណរបស់ប្រទេសកម្ពុជា ដែលបាន បង្កើតឡើងដំបូងនៅសតវត្សរ៍ទី១ ដែលការ សម្តែងនេះ រៀបរាប់ពីរឿងទេវកថាជាច្រើន របស់ប្រជាពលរដ្ឋក្នុងតំបន់ រួមទាំងរឿងរាមកេរ្តិ៍ និងខ្សែជីវិតរបស់ព្រះសមណគោតម មុន ពេលព្រះអង្គត្រាស់ដឹងជាព្រះពុទ្ធ។

កញ្ឆែ ជាឧបករណ៍គោះមួយ ដែលត្រូវ បានគេយកមកប្រើនៅក្នុងរបាំ “កន្តែរ៉ែ” និង របាំ “ត្រុដិ”។ ឧបករណ៍យ៉ាងសាមញ្ញោនះ ធ្វើ ពីប្ញស្សីដែលមានរនាបប្ញស្សីតូចឆ្មារពត់ឱ្យង នៅខាងចុងហៅថា “ជម” ត្រូវូបានពត់ចេញជា រាងកន្ត្រក ដែលបានចងកណ្តឹង និងក្រណាត់ ចម្រុះពណ៌នៅកន្លែងនោះ។

នាគ ជាសត្វក្នុងរឿងទេវកថាបុរាណ នៅ ក្នុងជំនឿរបស់ប្រជាជនខ្មែរ ដែលតំណាងឱ្យ កម្លាំង និងអំណាចអស្ចារ្យ នៃអាណាចក្រដែន ទឹកដ៏ខ្លាំងពូកែ។ នាគត្រូវបានគេជឿថា មាន ទំនាក់ទំនងយ៉ាងខ្លាំង ទៅនឹងប្រភពដើម នៃ ប្រជាជនខ្មែរ នៅក្នុងរឿងព្រេងទេវកថា ព្រះថោងនាងនាគ។ ចលនារបស់នាគ ដែលមាន ចលនាទៅមុខនៅក្នុងការសម្តែងតំណាងឱ្យ និមិត្តរូបនៃសាមគ្គីភាពនៅក្នុងវប្បធម៌ដ៏សម្បូរ បែបរបស់យើងឆ្ពោះទៅរកអនាគតប្រកបដោយ ភាពសុខដុមរមនា និងវិបុលភាព។

ភាពចម្រុះនៃសិល្បៈ និងចលនាទាំងនេះ រួមគ្នាបង្កើតបានជារបាំដ៏អស្ចារ្យមួយ ដោយ ប្រមូលផ្តុំនូវអត្តសញ្ញាណសាមគ្គីភាព និងកម្លាំង របស់ប្រជាជនកម្ពុជា ដែលឈរជាខែលយ៉ាង រឹងមាំដើម្បីការពារនិងលើកតម្កើងភាពរុងរឿង នៃវប្បធម៌និងអរិយធម៌បុរាណរបស់ប្រទេស។ ក្បាច់រាំនេះ បញ្ជាក់ពីប្រធានបទ នៃការសម្តែង របស់យើង គឺអត្តសញ្ញាណ ការការពារ ហើយ ការអភិវឌ្ឍវប្បធម៌ខ្មែរត្រូវបានដាក់តាំងបង្ហាញ នៅក្នុងការសម្តែងរួមគ្នាតែមួយ ដែលមានចំណង ជើងថា “សុខដុមក្នុងភាពចម្រុះផ្នែកវប្បធម៌”។

ក្នុងព្រឹត្តិការណ៍ក្បួនដង្ហែ “ឈីងហ្គេ” ឆ្នាំ ២០១៧ នេះ មានការចូលរួមពីក្រុមអ្នកសម្តែង ទាំងសិង្ហបុរី ជាម្ចាស់ផ្ទះ និងអន្តរជាតិរួមមាន ប្រទេសអង់ហ្គោឡា អូស្ត្រាលី ប៊ូតាន កម្ពុជា កាណាដា ចិន ដាណីម៉ាក អេហ្ស៊ីប បារាំង ហ្គាណា ក្រិក ឥណ្ឌា ឥណ្ឌូនេស៊ី អៀរឡង់ អ៊ីតាលី ជប៉ុន កូរ៉េ ម៉ាឡេស៊ី ម៉ិកស៊ិក មីយ៉ាន់ម៉ារ នូវែល ហ្សេឡង់ ហ៊្វីលីពីន រុស្សី សីស្ហែល ស្លូវេនី អាហ្វ្រិក ខាងត្បូង ស្រីលង្កា តាហ៊ីទី តៃវ៉ាន់ ថៃឡង់ ទួរគី ចក្រភពអង់គ្លេស សហរដ្ឋអាមេរិក និង វៀតណាម។

ក្បួនដង្ហែឈីងហ្គេ បានទាក់ទាញប្រព័ន្ធ ផ្សព្វផ្សាយយ៉ាងវិសេសវិសាលឥតខ្ចោះទាំងក្នុង និងក្រៅប្រទេសជាមួយនឹងសក្តានុពលនៃការ ផ្សព្វផ្សាយទៅកាន់មហាជនជាង១ពាន់លាន នាក់ ដោយរួមទាំងការផ្សាយនៅក្នុងទីតាំង កម្មវិធី តាមកញ្ចក់ទូរទស្សន៍ សារព័ត៌មាន បោះពុម្ពព្រមទាំងទស្សនិកជនតាមប្រព័ន្ធអ៊ីនធើរណេត។ ក្បួនដង្ហែ “ឈីងហ្គេ” កាលពីឆ្នាំ ២០១៦ ត្រូវបានផ្សព្វផ្សាយលើទូរទស្សន៍ជាតិ របស់សាធារណរដ្ឋសិង្ហបុរី Media Corp nig Channel News Asia (អន្តរជាតិ) ដែល មានវិសាលភាពនៃការផ្សព្វផ្សាយគ្របដណ្តប់ ទូទាំងតំបន់អាស៊ី។

ព្រះរាជាណាចក្រកម្ពុជា មានមោទនភាព ចំពោះការនាំយកទស្សនីយភាពសិល្បៈចម្រុះ គ្រប់ប្រភេទដែលបញ្ជាក់ពីអត្តសញ្ញាណវប្បធម៌ ជាតិ ទៅបង្ហាញលើឆាកអន្តរជាតិ នៅក្នុងព្រឹត្តិការណ៍ឈីងហ្គេ២០១៧ នៅប្រទេសសិង្ហបុរី ហើយបានទទួលការកោតសរសើរស្ញប់ស្ញែងពី ម្ចាស់ផ្ទះសិង្ហបុរី និងបណ្តាប្រទេសនានា នូវ ភាពអស្ចារ្យ និងរស់រវើក នៃសិល្បៈវប្បធម៌ដ៏ សម្បូរបែបរបស់កម្ពុជា៕

ខៀវ ទុំ