ប៉ាគីស្ថាន៖ តុលាការក្នុងប្រទេសប៉ាគីស្ថានបានដាក់បម្រាមហាមមិនឲ្យប្រារព្ធទិវានៃក្តីស្រលាញ់ជាសាធារណៈក្នុងរដ្ឋធានីអ៊ីស្លាម៉ាបាដឡើយ ដោយលើកឡើងថាវាមិនមែនជាផ្នែកមួយនៃវប្បធម៌សាសនាមូស្លីមឡើយ ។
តុលាការជាន់ខ្ពស់ក្រុងអ៊ីស្លាមម៉ាបាដបានចេញសេចក្តីសម្រេចហាមមិនឲ្យមានការប្រារព្ធថ្ងៃបុណ្យនៃក្តីស្រលាញ់នៅក្នុងការិយាល័យរដ្ឋាភិបាលនិងទីសាធារណៈឡើយដែល វានឹងចូលជាធរមាន(ដោយប្រញាប់) ភ្លាមៗបន្ទាប់ពីចុះហត្ថលេខា។
មួយវិញទៀតបម្រាមនេះផងដែរក៏ជាសេចក្តីជូនដំណឹងដោយផ្ទាល់មួយដល់បណ្តាញសារព័ត៌មានមិនឲ្យផ្សព្វផ្សាយឬដាក់លើទំព័រមុខអំពីព្រឹត្តការណ៍ឡើយ ។ ម្យ៉ាងទៀតសេចក្តីបង្គាប់របស់តុលាការជាន់ខ្ពស់មួយនេះគឺជាការឆ្លើយតបមួយនឹងការដាក់ញ្ញាត្តិជាឯកជនមួយដែលបានជំទាស់ថាថ្ងៃបុណ្យនៃក្តីស្រលាញ់គឺផ្ទុយពីការប្រៀនប្រដៅនៃសាសនាអ៊ីស្លាម។
យោងតាមកាសែតពេលព្រឹកផ្សាយថាការដាក់ញ្ញាត្តិជំទាស់នឹងទិវានៃក្តីស្រលាញ់នេះបានផ្សព្វផ្សាយផ្ទុយនឹងសីលធម៌ អាក្រាតនិយមនិងភាពមិនសមរម្យក្រោមការលាតត្រដាងនៃសេចក្តីស្នេហា ។
គួររំលឹកថាថ្ងៃបុណ្យនៃក្តីស្រលាញ់បានរីកសាយភាយក្នុងបណ្តាទីក្រុងជាច្រើនក្នុងប្រទេសប៉ាគីស្ថានកាលពីប៉ុន្មានទសវត្សរ៍មុន ប៉ុន្តែក្រុមសាសនាមួយចំនួនបានប្រកាសមិនយល់ស្របចំពោះទិវានេះដោយលើកឡើងថាជាការធ្វើឲ្យអាប់ឱនមួយ។
ប្រែសម្រួលដោយ៖ អុីវ វិចិត្រា