សហរដ្ឋអាមេរិក ៖ អគ្គិភ័យ បានឆាបឆេះផ្សារទំនើបមួយ ក្នុងទីក្រុងដាលឡាស (Dallas) រដ្ឋតិចសាស់ សហ រដ្ឋអាមេរិក នៅជិតតំបន់ហាងលក់សត្វចិញ្ចឹម បណ្តាលឲ្យសត្វចិញ្ចឹម ជាង ៥៧៩ក្បាល បានថប់ដង្ហើមងាប់។តាមប្រភពបណ្តាញព័ត៌មាន បរទេស បានរាយការណ៍នៅថ្ងៃទី០៦ ខែមករា ឆ្នាំ២០២៥ ថា អគ្គិភ័យ បានកើត ឡើងនៅមជ្ឈមណ្ឌលផ្សារទំនើប ផ្លាហ្សា ឡាទីណា (Plaza Latina) ក្នុងទីក្រុងដាលឡាស រដ្ឋតិចសាស់ សហរដ្ឋអាមេរិក នៅពេលព្រឹក មុនពេលផ្សារទំនើបបើក។ ទីតាំងដែលឆាបឆេះ ជាកន្លែងលក់សត្វចិញ្ចឹម។ ទោះបីជាភ្លើងមិនបានរាលដាលដល់សត្វ ក៏ដោយ ប៉ុន្តែផ្សែងពីភ្លើង បានបណ្តាលឲ្យសត្វ ចំនួន ៥៧៩ក្បាល ថប់ដង្ហើមងាប់ ភាគច្រើនជាសត្វស្លាបតូចៗ ដូចជា មាន់ សេក និងកណ្តុរហែមស្ទើរ ក្រៅពីនេះ មានសត្វឆ្កែ ២ក្បាល និងឆ្មា ២រក្បាល បានងាប់ ដោយសារឈ្លក់ផ្សែង។
មន្ត្រីជំនាញអគ្គិភ័យ បានប្រើពេលជាង ២ម៉ោង ទើបអាចគ្រប់គ្រងស្ថានការណ៍បាន មុននឹងព្យាយាមជួយសត្វរងគ្រោះ ហើយក៏បានរកឃើញថា សត្វទាំងអស់នៅក្នុងហាង បានងាប់អស់៥៧៩ក្បាល។ ជាសំណាងល្អដែលមិនមានមនុស្សណាម្នាក់រងរបួស ឬស្លាប់ដោយសារភ្លើងឆេះនេះ ព្រោះពេលកើតហេតុ មិនទាន់ដល់ម៉ោងបើកផ្សារ ។ ចំណែករចនាសម្ព័ន្ធនៃអគារផ្សារទំនើប មួយជាន់ បានទទួលរងការខូចខាតយ៉ាងធ្ងន់ ជាមួយនឹងផ្នែកនៃដំបូល បាក់រលំផងដែរ។ ចំណែកមូលហេតុនៃអគ្គិភ័យនេះ កំពុងស្ថិតក្នុងការស៊ើបអង្កេតនៅឡើយ ៕
