ភ្នំពេញ៖លោកយ៉ែម សំអូន បានជប់លៀងខួបកំណើតជូនភរិយារបស់លោកអ្នកនាងយ៉ាន លីនដា គម្រប់អាយុ៤១ឆ្នាំ កាលពីរាត្រីថ្ងៃទី២១ ខែ១ ដោយមានតែអ្នកសិល្បៈជិតដិតបំផុតប៉ុណ្ណោះដែលលោកហៅឲ្យចូលរួម។តែគេចាប់អារម្មណ៍ថានៅថ្ងៃពិសេសរបស់ប្រពន្ធនោះលោកសំអូន បានជូនកាដូក្រវិលពេជ្រឲ្យអ្នកនាងលីនដា ផងដែរដែលនេះបញ្ជាក់ពីការយកចិត្តទុកដាក់របស់លោកចំពោះភរិយា ខណៈនៅចំពោះមុខភ្ញៀវលោកសំអូន បានជូនបាច់ផ្កាព័ណផ្កាឈូកទៅអ្នកនាងលីនដា ហើយថើបថ្ពាល់នាងដោយបិតភ្នែកទាំងពីរនាក់នាំឲ្យសម្លេងហ៊ោពីអ្នកចូលរួមលាន់ពេញបន្ទប់ពិធី ។នៅថ្ងៃនោះដែរគេឃើញលោកសាយ សៀរ៉ា ដែលធ្លាប់ត្រូវបានអ្នកនាងយ៉ាន លីនដា ប្រចណ្ឌជាមួយលោកសំអូន កាលពីឆ្នាំ២០១៥ នាំឲ្យនាងនិងប្ដីបែកបាក់គ្នាអស់៩ឆ្នាំ នោះលោកក៍បានចូលរួមដែរ ដោយថែមទាំងចេញសារជូនពរអ្នកនាងលីនដា ថា«រីករាយថ្ងៃខួបកំណើត បងស្រីយ៉ាន លីនដា ជូនពរបងមានសុខភាពល្អ សំណាងល្អ ជោគជ័យការងាររហូត » ។
អ្វីដែលគួរឲ្យកត់សម្គាល់នៅថ្ងៃខួបកំណើតអ្នកនាងយ៉ាន លីនដា ឆ្នាំនេះបុគ្គលិករបស់ក្រុមហ៊ុនលោកយ៉ែម សំអូន បានហៅនាងថាអគ្គនាយិកាក្រុមតន្រ្ដីDara Entertainment ដែលបញ្ជាក់ថាតួនាទីថ្មីនេះលោកសំអូន ទើបតែតំឡើងឲ្យប្រពន្ធក្រោយពួកគេត្រូវរ៉ូវគ្នាវិញបានជាង៨ខែនេះ ។តំណែងនេះក៍មានន័យថារាល់សេវាកម្មកម្សាន្ដរបស់ក្រុមហ៊ុនយ៉ែម សំអូន អ្នកនាងយ៉ាន លីនដា ជាអ្នករៀបចំជំនួសប្ដីទាំងដាក់តួ និងទូទាត់តម្លៃឲ្យតារាពេលដែលលោកសំអូន ជាប់រវល់ ។
គួររំលឹកថាលោកយ៉ែម សំអូន បានចាប់ដៃជាមួយអ្នកយ៉ាន លីនដា ជាង១០ឆ្នាំបានកូនស្រី១ឈ្មោះសំអូន វិថាណា ក៍បានចែកផ្លូវគ្នាកាលពីឆ្នាំ២០១៥ បន្ទាប់ពីផ្ទុះរឿងចម្រូងចម្រាសថាអ្នកនាងលីនដា ឆេះដុំប្រចណ្ឌប្ដីមានប្រុស ទើបនាងនាំកូនស្រីទៅរស់នៅប្រទេសអូស្រា្ដលីអស់រយៈពេល៩ឆ្នាំ ក៍ព្រមផ្សះផ្សារស្នេហាជាថ្មីជាមួយលោកសំអូន កាលពីខែ៥ ឆ្នាំ២០២៤ នឹងបានរៀបការជាលើកទី២ នៅថ្ងៃទី១៤ ខែសីហា ឆ្នាំ២០២៤ ។លោកសំអូន ធ្លាប់ប្រាប់អ្នកយកព័តមានយើងថាលោកហ៊ានធ្វើអ្វីគ្រប់បែបយ៉ាងទាំងអស់ដើម្បីកូនស្រី។ប៉ុន្ដែនៅពេលដែលលោកសំអូន ផ្អែមល្ហែមស្នេហ៍ជាថ្មីជាមួយអ្នកនាងយ៉ាន លីនដា នេះកូនធ័មរបស់លោកសំអូន ឈ្មោះសំអូន ជលសារ បានខ្ទាតចេញពីលោកហើយថែមទាំងនាំតារាចម្រៀងស្និតលោកសំអូន នាងចាន់ឡៃ វលក្ខណ៍ ទៅធ្វើការនៅក្រុមហ៊ុនកម្សាន្ដរបស់លោកអាឡិច ចាន់ត្រា ដែលជាការរកស៊ីប្រជែងជាមួយលោកសំអូន ជាឪធ័មខ្លួនទៀតផង ។លោកសំអូន ធ្លាប់ប្រាប់ថារឿងលោកជាមួយជលសារ មិនទាន់ដល់ពេលវេលាដែលលោកត្រូវនិយាយទេ ប៉ុន្ដែលោកហាក់បង្ហាញអារម្មណ៍ឈឺចាប់ដែលធ្វើគ្រប់បែបយ៉ាងទាំងអស់ដើម្បីកូនធ័ម ចុងក្រោយគេរត់ចោលលោក។ចំណែកនាងចាន់ ឡៃវលក្ខណ៍ វិញធ្លាប់ប្រាប់អ្នកយកព័តមានយើងថានាងមិនចង់និយាយអ្វីទាំងអស់ពាក់ព័ន្ធជាមួយលោកយ៉ែម សំអូន ហើយថែមទាំងហាមមិនឲ្យសារព័តមានសរសេរចំណងជើងភ្ជាប់ឈ្មោះនាងជាមួយលោកសំអូន ទៀតផង ។
ប្រភពខ្លះថារឿងលោកយ៉ែម សំអូន ត្រូវគ្នាវិញជាមួយប្រពន្ធហាក់ដូចជាមានអាថ័កំបាំងច្រើន ព្រោះមើលទៅពួកគេដូចជាធ្វើត្រូវគ្នាដើម្បីចាប់ដៃគ្នាជាថ្មីក្នុងការរកស៊ីក្រុមហ៊ុនកម្សាន្ដរបស់លោកសំអូន ឲ្យកាន់តែមានការចាប់អារម្មណ៍ជាជាងលោកសំអូន ជួលពិធីការិនីស្រីផ្សេងមកជំនួស ។តែលោកសៀរ៉ា ជឿថាលោកយ៉ែម សំអូន និងប្រពន្ធពិតជាត្រូវគ្នាវិញមែន ហើយលោកសប្បាយចិត្តដែលឃើញលោកសំអូន ត្រូវរ៉ូវគ្នាជាមួយប្រពន្ធវិញ ហើយលោកនៅតែស្និតជាមួយលោកសំអូន និងអ្នកនាងយ៉ាន លីនដា ជាធម្មតាក្នុងនាមជាបងប្អូនរួមអាជីព មិនខ្លាចលីនដា ប្រពន្ធលោកជាលើកទី២ឡើយ ។
គេចាំមើលថាដើម្បីលាងជម្រះមន្ទិលសង្ស័យថាលោកយ៉ែម សំអូន កំពុងលេងបិទពួនជាមួយប្រពន្ធនោះ តើលោកហ៊ានយកកូនទី២ជាមួយអ្នកនាងលីនដា ឬអត់ ?
