ភ្នំពេញ ៖ អតីតតារាចម្រៀងថោន កញ្ញា ជុំ រចនាពេជ្រ ហៅបេប៊ី បានឲ្យដឹងថា សម្រាប់ពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ ២០២៥ នេះ នាងគ្មានគម្រោងចេញច្រៀងសម្ដែងនៅទីណាទេ ដោយមូលហេតុគឺធ្វើបទថ្មីមិនទាន់ អត់មានបទថ្មីច្រៀង ទើបនាងយកពេលដែលទំនេរនៅឆ្នាំនេះ ដើរលេងជាមួយក្រុមគ្រួសារវិញ ដោយសារតែឆ្នាំមុនៗ ជាប់រវល់ច្រៀងសម្ដែង មិនដែលមានពេលវេលាជាមួយម្ដាយ ដូច្នេះឆ្នាំនេះ នាងនឹងនាំម្ដាយ ដើរកម្សាន្ដឲ្យអស់ដៃ ។ ប៉ុន្តែបេប៊ី ថានៅមិនទាន់កំណត់ពីទីតាំងថា ត្រូវចេញទៅដើរលេងនៅកន្លែងណាខ្លះឡើយ ខណៈដែលម្ដាយនាង អ្នកស្រីប៊ុន ណារី មានស្រុកកំណើតនៅខេត្តតាកែវ ។
បេប៊ី ប្រាប់ «នគរធំ» នៅថ្ងៃទី១ ខែមេសា ឆ្នាំ២០២៥ ថា «ខ្ញុំរៀបចំបទថ្មី អត់ទាន់ ហេតុនេះ ចូលឆ្នាំហ្នឹង មិន បានចេញច្រៀងតាមឆាកនានាដូចឆ្នាំមុនទេ ។ ទីផ្សារសិល្បៈ ពេលនេះក៏មិនដូចមុនដែរ មានបញ្ហាពិបាកច្រើន ពិសេសការផលិតបទចម្រៀង។ ប៉ុន្ដែខ្ញុំមានក្រុម(Team) ផលិតចម្រៀងផ្ទាល់ខ្លួន អ៊ីចឹងមានន័យថា ពេលដែលយើងចាំបាច់ត្រូវតែចេញបទថ្មី គឺនឹងរៀបចំបានភ្លាម»។
ក្រៅពីទទួលស្គាល់ថា ការផលិតបទចម្រៀង មានបញ្ហាយឺតយ៉ាវ ឬមិនដិតដល់លើទីផ្សារ រហូតត្រតូវចោលលុយធំ នៅរដូវបុណ្យចូលឆ្នាំថ្មី ប្រពៃណីជាតិ ខាងមុខនេះ បេប៊ី បង្ហើបថាក៏មានហេតុផលមួយសំខាន់ទៀតដែរ នោះគឺពេលនេះនាងឡើងគីឡូជ្រុលបន្ដិច ពោលគឺឡើងដល់ទៅ ៥៥គ.ក្រ អីចឹងត្រូវការសម្រកជាបន្ទាន់ ដែលគីឡូនាងស្រលាញ់ត្រឹមតែ ៤៥គ.ក្រ ទេ ។នាងថា មិនមែនញ៉ាំមិនគិត ឬចេះតែញ៉ាំ បានធ្វើឲ្យឡើងគីឡូនោះទេ ប៉ុន្ដែវ័យនាងពេលនេះ មិនដឹងម៉េច ទោះជាញ៉ាំតិច ក៏នៅតែឡើងគីឡូដែរ ។
បេប៊ី បានផ្អាកសិល្បៈ ៣ឆ្នាំ គឺទើបតែចាប់កាន់ក្បាលមីក្រូ សាជាថ្មី កាលពីចុងឆ្នាំ២០២៣ ដោយធ្វើជាតារា ចម្រៀងឯករាជ្យ មិនចូលផលិតកម្មណាទេ ។ បញ្ហានេះហើយ ធ្វើឲ្យបេប៊ី ជួបផលវិបាកច្រើន ដូចជាត្រូវការចំណាយថវិការផ្ទាល់ខ្លួន ទាំងជួលអ្នកនិពន្ធបទចម្រៀង, អ្នកដឹកនាំសម្ដែង MV និងក្រុមរាំ ជាដើម ។ ប៉ុន្តែរចនាពេជ្រ ថារឿងនេះនាងបានដឹងច្បាស់ ព្រោះមុនចូលថោន នាងក៏ធ្លាប់ធ្វើបទខ្លួនឯងដែរ ។ នាងថា បើទោះជាទីផ្សារចម្រៀងកាន់តែមានការប្រកួតប្រជែងគ្នាស្វិតស្វាញយ៉ាងណាក៏ដោយ ប៉ុន្ដែនាងគ្មានគម្រោងវិលទៅរកអាជីពចាស់ តាមរយៈការសម្ដែងភាពយន្ដ និងធ្វើ MC វិញទេ ។
បេប៊ី ជាតារាម្នាក់ដែលត្រូវម្ដាយតាមជាប់ជានិច្ច តាំងពីនាងចូលសិល្បៈដំបូងម៉្លេះ ហេតុនេះហើយបានជាធ្វើឲ្យប្រុសៗមួយចំនួន ដែលចង់ឆក់ស្នេហ៍ បរាជ័យ។
ឆ្លើយតបសំណួរថា តើបេប៊ី គិតថាដល់វេលាដែលត្រូវយកប្ដីហើយឬនៅ នាឆ្នាំ២០២៥ នេះ ? ស្រីស្រស់វាចាលាយសំណើចថា «ឆ្នាំហ្នឹង ខ្ញុំមានអាយុ ២៨ឆ្នាំហើយ! អត់ដឹងថា គូព្រេងនៅឯណាទេបងអើយ! ខ្ញុំមិនអាចនិយាយបានថា អាយុប៉ុន្មាន ឬប៉ុន្មានឆ្នាំទៀត ទើបយកប្ដីបានទេ ព្រោះបើគូព្រេងដល់ ការប្ដីស្អែកក៏ថាបានដែរ…(សើច)» ។
អ្នកស្រី ប៊ុន ណារី ម្ដាយរបស់បេប៊ី ធ្លាប់ប្រាប់អ្នកយកព័ត៌មានយើងថា គាត់មានការព្រួយបារម្ភ ខ្លាចជីវិតស្នេហាកូនស្រី «អ្នកក្រមិនហ៊ាន អ្នកមានមិនចូល»។ ប៉ុន្ដែលោកស្រីថារឿងអ្នកតាមញ៉ែនោះ មិនចេះខ្វះ គឺមានទាំងក្នុងនិងក្រៅស្រុក តែអត់មានម្នាក់ណាច្បាស់លាស់ទេ ។
អ្នកគាំទ្រ (Fan) របស់ជុំ រចនាពេជ្រ បានលើកឡើងថា ប្រសិនបើលើកនេះ បេប៊ី ផ្អាកច្រៀងរាំ លើកទី២ ដល់ទៅ៣ឆ្នាំ ម្ដងទៀត នោះច្បាស់ជាកាន់តែពិបាកស្ដារមុខជាមិនខាន តែបេប៊ី ថានៅពេលដែលនាងធ្វើបទថ្មីរួច ហើយគីឡូស្រកបាន ១០គ.ក្រ (៥៥-៤៥គ.ក្រ) នោះនាងនឹងចេញមុខតាមឆាកតន្រ្ដី ជាធម្មតាវិញហើយ ៕
