បាងកក (ថៃ) ៖ ករណីរញ្ជួយដី បណ្តាលឲ្យបាក់រលំសំណង់អគារ ៣០ជាន់ នៅកណ្តាលទីក្រុងបាងកក កាលពីថ្ងៃទី២៨ ខែមីនា ឆ្នាំ២០២៥ នោះ គិតមកដល់ត្រឹមវេលាម៉ោង ៥:៣០នាទីល្ងាច ថ្ងៃទី១ ខែមេសា ឆ្នាំ២០២៥ ក្រុមសង្គ្រោះបានរកសពជនរងគ្រោះម្នាក់ទៀត នៅក្រោមគំនរបាក់បែកនៃសំណង់អគារការិយាល័យសវនកម្មរដ្ឋ ដែលធ្វើឱ្យចំនួនអ្នកស្លាប់ បានកើនដល់ ១៤នាក់។
តាមប្រភពបណ្តាញព័ត៌មានថៃ បានរាយការណ៍នៅថ្ងៃទី១ ខែមេសា ឆ្នាំ២០២៥ ថា ចូលដល់ថ្ងៃទី៥ នៃការស្វែងរកអ្នកបាត់ខ្លួនដែលជាប់នៅក្រោមគំនរបាក់បែកនៃអគារសវនកម្មរដ្ឋ ដែលបានបាក់រលំដោយសារ គ្រោះរញ្ជួយដី កាលពីថ្ងៃទី២៨ ខែមីនា ឆ្នាំ២០២៥ នោះ ក្រុមសង្គ្រោះថៃ បានសហការជាមួយក្រុមសង្គ្រោះអាមេរិក បានប្រើម៉ាស៊ីនថតកាំរស្មីអ៊ិច ស្កែនរកឃើញសាកសពមនុស្សម្នាក់ជាប់ក្នុងគំនរបាក់បែកនៃអគារនោះបន្ថែមទៀត ហើយសាកសពទី១៤ ត្រូវបានយកចេញពីក្រោមគំនរបាក់បែក។
សពជនរងគ្រោះ ត្រូវបានយកទៅពិនិត្យ និងធ្វើកោសល្យវិច័យ ដើម្បីរកអត្តសញ្ញាណ។ ដូច្នេះសរុបក្នុងមនុស្សចំនួន ៩៦នាក់ ដែលជាប់ក្នុងសំណង់អគារបាក់រលំនោះ គិតត្រឹមវេលាខាងលើ ត្រូវបានរកឃើញស្លាប់ ចំនួន១៤នាក់ (ប្រុស ៨នាក់ និងស្ត្រី ៦នាក់) របួសចំនួន ៩នាក់ និងបាត់ខ្លួន ចំនួន៧៣នាក់។
ទោះបីជាយ៉ាងណា បេសកកម្មរុករកជនរងគ្រោះដែលជាប់ក្នុងអគារបាក់រលំនេះ នៅមិនទាន់បញ្ចប់នៅឡើយ ដោយក្រុមសង្គ្រោះថៃ និងអាមេរិក កំពុងបន្តរុករកយ៉ាងសកម្ម៕
