មីយ៉ាន់ម៉ា ៖ កងទ័ពមីយ៉ាន់ម៉ា បានបាញ់ទៅលើក្បួនរថយន្តនាំយកជំនួយទៅកាន់តំបន់រងគ្រោះដោយរញ្ជួយដី កាលពីយប់ថ្ងៃអង្គារ ទី១ ខែមេសា ឆ្នាំ២០២៥ ស្របពេលដែលចំនួនអ្នកស្លាប់ដោយគ្រោះរញ្ជួយដីនៅមីយ៉ាន់ម៉ា បានកើនឡើងដល់ ២៨៨៦នាក់ របួស៤៦៣៩នាក់ និងបាត់ខ្លួន ៣៧៣នាក់ ។
តាមប្រភពទីភ្នាក់ងារព័ត៌មាន BBC បានរាយការណ៍ថា កងទ័ពរំដោះជាតិ TNLA ដែលជាក្រុមឧទ្ទាមប្រដាប់ អាវុធ បាននិយាយថា ទាហានបានបាញ់ទៅលើក្បួនរថយន្តចំនួន៩ ដោយកាំភ្លើងយន្តធុនធ្ងន់ ខណៈរថយន្តកំពុងធ្វើដំណើរឆ្លងកាត់ទីក្រុង ងួងថូ (Nguang Tho) នៃរដ្ឋ សាន (Shan) ភាគខាងជើងឆ្ពោះទៅកាន់ទីក្រុងម៉ាន់ដាឡេ (Mandalay)។
TNLA បាននិយាយថា ក្បួនរថយន្តបានជូនដំណឹងដល់កងទ័ព អំពីផ្លូវនិងផែនការផ្តល់ជំនួយ។ ប៉ុន្តែកងទ័ពមីយ៉ាន់ម៉ា បាននិយាយថា ពួកគេមិនត្រូវបានជូនដំណឹងថាក្បួនរថយន្តនឹងឆ្លងកាត់ផ្លូវនោះទេ ហើយបានបាញ់ប្រហារ ដោយសារក្បួនរថយន្តមិនបានឈប់។ ទោះយ៉ាងណា កងទ័ពអះអាងថា មិនមាននរណាម្នាក់រងរបួសនោះទេ។ ករណីនេះ កងទ័ពកំពុងស៊ើបអង្កេត។
តាមបប្រភពទីភ្នាក់ងារព័ត៌មានចិន ស៊ីនហួរ (Xinhua) បានរាយការណ៍នៅថ្ងៃទី២ ខែមេសា ឆ្នាំ២០២៥ ដោយដកស្រង់ព័ត៌មានពីក្រុមព័ត៌មានរដ្ឋបាលរដ្ឋមីយ៉ាន់ម៉ា ថា ចំនួនអ្នកស្លាប់ដោយសារគ្រោះរញ្ជួយដី នៅមីយ៉ាន់ម៉ា ចំនួនអ្នកស្លាប់ បានកើនឡើងដល់ ២៨៨៦នាក់ របួស៤៦៣៩នាក់ និងបាត់ខ្លួន ៣៧៣នាក់ ។ មន្ត្រីអង្គការសហប្រ ជា ជាតិដែលធ្វើការស្ទាបស្ទង់ការខូចខាតរញ្ជួយដីនៅក្នុងប្រទេសមីយ៉ាន់ម៉ា បានអំពាវនាវឱ្យជំនួយអន្តរជាតិ បង្កើនជំនួយ មុនពេលរដូវខ្យល់មូសុង កាន់តែខិតជិតមកដល់ ធ្វើឱ្យស្ថានភាពកាន់តែអាក្រក់ទៅៗ។
លោក Marcoluigi Corsi អ្នកសម្របសម្រួលមនុស្សធម៌ស្តីទី បានថ្លែងថា តាមការលើកឡើងរបស់អ្នកស្រុក បន្ទាប់ពីលោកបានធ្វើទស្សនកិច្ចនៅមីយ៉ាន់ម៉ា រយៈពេល ២ថ្ងៃ គឺទឹកស្អាត អាហារ ទីជម្រក និងថ្នាំពេទ្យ គឺជាតម្រូវការសំខាន់បំផុត។ បន្ទាប់ពីអគារ ផ្លូវ និងស្ពាន រងការខូចខាតយ៉ាងខ្លាំង។
ឧត្តមសេនីយ៍ មីន អោងហ្លាំង (Min Aung Hlaing) មេដឹកនាំរដ្ឋាភិបាលយោធាមីយ៉ាន់ម៉ា បានច្រានចោលការផ្តល់បទឈប់បាញ់បណ្តោះអាសន្ន ពីកងកម្លាំងឧទ្ទាម ក្នុងគោលបំណងសម្របសម្រួលប្រតិបត្តិការជួយសង្គ្រោះ និងការផ្តល់ជំនួយដល់តំបន់ដែលរងផលប៉ះពាល់ដោយរញ្ជួយដី។
ពីមុន រដ្ឋាភិបាលរួបរួមជាតិ (NUG) គឺជារដ្ឋាភិបាលស្រមោល ដែលប្រឆាំងនឹងរដ្ឋាភិបាលយោធាមីយ៉ាន់ម៉ា បានប្រកាសបទឈប់បាញ់ រយៈពេលពីរសប្តាហ៍ បន្ទាប់ពីការរញ្ជួយដីកម្រិត 7.7រ៉ិចទ័រ ដែលបានសម្លាប់មនុស្សជាង ២៧០០នាក់។
យោងតាមសេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុក ឲ្យដឹងថា កងទ័ពមីយ៉ាន់ម៉ា បានបន្តធ្វើការវាយប្រហារនៅទូទាំងប្រទេស ក្នុងរយៈពេលប៉ុន្មានថ្ងៃថ្មីៗនេះ រួមទាំងការបើកការបាញ់ប្រហារលើភូមិនានា ក្នុងតំបន់ដែលរងគ្រោះដោយការរញ្ជួយដី ដែលសង្ស័យជាជំរំរបស់ពួកឧទ្ទាមប្រឆាំងរដ្ឋាភិបាល៕