មីយ៉ានម៉ា ៖ ចំនួនមនុស្សស្លាប់ក្នុងប្រទេសមីយ៉ាន់ម៉ា (ភូមា) ដោយសារគ្រោះរញ្ជួយដី ដ៏ខ្លាំងបានកើនឡើងដល់ ៣០៨៥នាក់ ។
តាមប្រភពទីភ្នាក់ងារព័ត៌មានបរទេស បានរាយការណ៍នៅថ្ងៃទី៤ ខែមេសា ឆ្នាំ២០២៥ ថា អង្គការផ្តល់ជំនួយជាច្រើន បានព្រមានកាលពីថ្ងៃព្រហស្បតិ៍ ទី៣ ខែមេសា ឆ្នាំ២០២៥ ថាអាកាសធាតុនឹងក្តៅខ្លាំង ហើយភ្លៀងនឹងធ្លាក់ខ្លាំង អាចបណ្តាលឱ្យមានការផ្ទុះឡើងនូវជំងឺ ក្នុងចំណោមអ្នកស្រុកមីយ៉ាន់ម៉ា ដែលបានរួចរស់ជីវិតពីការ រញ្ជួយដីដ៏សាហាវ កាលពីសប្តាហ៍មុន ពួកគេនៅតែត្រូវបោះជំរំ និងដេកនៅខាងក្រៅ រហូតមកដល់ពេលនេះ បន្ទាប់ពីគ្រោះរញ្ជួយដីកម្រិត ៧.៧រ៉ិចទ័រ ដែលបានកើតឡើងកាលពីថ្ងៃទី២៨ ខែមីនា ឆ្នាំ២០២៥ បណ្តាលឱ្យខូច ខាតទូទាំងប្រទេសមីយ៉ាន់ម៉ា អគារជាច្រើន រួមទាំងផ្ទះ និងមន្ទីរពេទ្យមួយចំនួន ត្រូវបានបំផ្លាញឲ្យខូចខាត ខណៈដែលសហគមន៍មួយចំនួន ដែលរងផលប៉ះពាល់ដោយការរញ្ជួយដី អ្នកភូមិត្រូវបានទុកចោលដោយគ្មានទីជម្រក អាហារ និងទឹក។
រដ្ឋាភិបាលយោធាមីយ៉ាន់ម៉ា បាននិយាយកាលពីថ្ងៃព្រហស្បតិ៍ ថាចំនួនអ្នកស្លាប់ដោយសារការរញ្ជួយដី បានកើនឡើងដល់យ៉ាងតិច ៣០៨៥នាក់ ខណៈដែលមនុស្សចំនួន ៤៧១៥នាក់បានរងរបួស និង ៣៤១នាក់ កំពុងបាត់ខ្លួននៅឡើយ។
អង្គការសុខភាពពិភពលោក (WHO) បានព្រមានអំពីហានិភ័យនៃជំងឺ ដូចជាជំងឺអាសន្នរោគ និងជំងឺផ្សេងៗទៀត រីករាលដាលនៅក្នុងសហគមន៍ដែលរងការខូចខាតខ្លាំងបំផុតដោយការរញ្ជួយដី ដូចជាតំបន់ម៉ាន់ដាឡេ (Mandalay) សាហ្គាង (Sagaing) និងរដ្ឋធានីណៃពិដោ (Naypyitaw) កំពុងកើនឡើងជាលំដាប់។
មនុស្សកំពុងរស់ក្នុងតង់នៅខាងក្រៅ ក្រោមកម្តៅ ៣៨អង្សាសេ ដោយសារពួកគេខ្លាចមិនហ៊ានចូលទៅក្នុងផ្ទះរបស់ពួកគេវិញ ព្រោះខ្លាចគ្រោះការរញ្ជួយដីបន្តបន្ទាប់ទៀត។
លោកវេជ្ជបណ្ឌិត អេលេណា វូឡូ (Elena Vuolo) នាយករងនៃសាខាអង្គការសុខភាពពិភពលោក នៅមីយ៉ាន់ម៉ា បានថ្លែងថា វិបត្តិរយៈពេលវែង ដូចដែលកំពុងកើតមានក្នុងប្រទេសមីយ៉ាន់ម៉ា បច្ចុប្បន្ន អាចបង្កឱ្យមានជំងឺរាតត្បាតជាច្រើន រួមទាំងជំងឺស្បែក ជំងឺគ្រុនចាញ់ និងជំងឺគ្រុនឈាម ប៉ុន្តែជំងឺអាសន្នរោគ នៅតែជាជំងឺដែលពួកគាត់ព្រួយបារម្ភជាពិសេស ព្រោះវាបានរីករាលដាលនៅទីក្រុងម៉ាន់ដាឡេ កាលពីឆ្នាំមុន៕
