សហរដ្ឋអាមេរិក ៖ អ្នកនាំពាក្យសេតវិមាន បានបញ្ជាក់ថា សហរដ្ឋអាមេរិក នឹងចាប់ផ្តើមអនុវត្តពន្ធគយ ទៅវិញទៅមក នៅថ្ងៃទី៩ ខែមេសា ឆ្នាំ២០២៥ (ម៉ោងក្នុងស្រុក) ដោយប្រទេសចិនប្រឈមមុខនឹងពន្ធសរុបចំនួន 104% សម្រាប់ការមិនដកវិធានការសងសឹកប្រឆាំងនឹងសហរដ្ឋអាមេរិក។
តាមប្រភព BBC បានរាយការណ៍នៅថ្ងៃទី៩ ខែមេសា ឆ្នាំ២០២៥ ថា នៅថ្ងៃទី៨ ខែមេសា ឆ្នាំ២០២៥ លោកស្រីខារ៉ូលីន ឡេវីត្ត (Caroline Levitt) លេខាធិការសារព័ត៌មានសេតវិមាន សហរដ្ឋអាមេរិក បានបញ្ជាក់នៅក្នុងសេចក្តីប្រកាសព័ត៌មានថា ការលើកទឹកចិត្តពន្ធរបស់ប្រធានាធិបតី ដូណាល់ ត្រាំ (Donald Trump) នឹងចូលជាធរមាន នៅម៉ោង ០០:០១នាទីព្រឹក ម៉ោងក្នុងស្រុក នៅថ្ងៃទី៩ ខែមេសា ឆ្នាំ២០២៥។ ប្រទេសចិន នឹងទទួលរងនូវពន្ធ ១០៤% ។
គួរបញ្ជាក់ថា នៅថ្ងៃពុធ ទី២ ខែមេសា ឆ្នាំ២០២៥ លោកដូណាល់ ត្រាំ បានប្រកាសពីវិធានការដើម្បីប្រមូលពន្ធទៅវិញទៅមក លើទំនិញពីប្រទេសរាប់សិប ដែលសហរដ្ឋអាមេរិក មានឱនភាពពាណិជ្ជកម្មចំនួនច្រើនបំផុត ក្នុងអត្រាផ្សេងគ្នា ក្នុងនៅប្រទេសចិន នឹងត្រូវគិតពន្ធ ៣៤% និងកម្ពុជា ៤៩%។
ទោះជាយ៉ាងណាក៏ដោយ ប្រទេសចិន បានរងការវាយប្រហារពីពន្ធគយ ២០% ពីសហរដ្ឋអាមេរិក រួចហើយ ចាប់តាំងពី ២ខែមុន ដែលបណ្តាលឱ្យពន្ធជាក់ស្តែងដែលចិន នឹងត្រូវប្រឈមគឺ ៥៤% ។ ចិន ប្រកាសវិធានការសងសឹក រាល់ទំនិញដែលនាំចូលពីសហរដ្ឋអាមេរិក នឹងត្រូវយកពន្ធក្នុងអត្រា ៣៤% ចាប់ពីថ្ងៃទី១០ ខែមេសា ឆ្នាំ២០២៥។
ប៉ុន្តែនៅថ្ងៃចន្ទ (៧ មេសា) លោក ដូណាល់ ត្រាំ បានគំរាមដំឡើងពន្ធលើទំនិញចិន ៥០% ទៀត ប្រសិនបើចិន មិនដកវិធានការសងសឹកត្រឹមថ្ងៃអង្គារ។ ប៉ុន្តែចិន ទទូចថា ខ្លួននឹងតស៊ូដល់ទីបញ្ចប់ ហើយនឹងអនុវត្តវិធានការតបត ប្រសិនបើអាមេរិក នៅតែជ្រើសរើសដើរលើផ្លូវខុសដូចនេះ។
សេចក្តីថ្លែងការណ៍របស់លោកស្រី ឡេវីត្ត បានបញ្ជាក់ថា លោកដូណាល់ ត្រាំ បានសម្រេចចិត្តអនុវត្តតាមការគំរាមកំហែងរបស់គាត់ ក្នុងការដាក់ពន្ធលើការនាំចូលរបស់ចិន មួយចំនួនដែលសរុបរហូតដល់ ១០៤% ។ ប្រធានាធិបតី Trump ជឿថា ចិន ចង់ធ្វើកិច្ចព្រមព្រៀងមួយ ហើយវាជាកំហុសរបស់ចិនសម្រាប់ការជ្រើសរើសសងសឹក។
នៅពេលត្រូវសួរថា តើលក្ខខណ្ឌអ្វីខ្លះ ដែលលោកត្រាំ នឹងមានសម្រាប់កិច្ចពិភាក្សាជាមួយមេដឹកនាំចិន ស៊ី ជីនពីង (Xi Jinping) ដើម្បីឈានដល់កិច្ចព្រមព្រៀងពាណិជ្ជកម្ម? លោកស្រី ឡេវីត្ត បាននិយាយថា ប្រសិនបើប្រទេសចិន បានទាក់ទងលោកស្រី លោកត្រាំ នឹងរីករាយ។ ប៉ុន្តែគាត់នឹងធ្វើការដើម្បីផលប្រយោជន៍ប្រជាជនអាមេរិក។
លោកស្រី ឡេវីត្ត ក៏បានលាតត្រដាងផងដែរថា ពេលនេះមានប្រទេសជិត៧០ ដែលមានទំនាក់ទំនងជាមួយសហរដ្ឋអាមេរិក ដើម្បីស្នើសុំការចរចាពាណិជ្ជកម្ម ខណៈដែលការសម្រេចចិត្តលើប្រទេសណាដែលនឹងទទួលបានការកាត់បន្ថយពន្ធ ត្រូវបានធ្វើឡើងនោះ វានឹងពឹងផ្អែកតែលើលោកប្រធានាធិបតី ដូណាល់ ត្រាំ តែប៉ុណ្ណោះ៕