ប្រទេសថៃ ៖ ករណីជំងឺអង់ត្រាក់ ឬពិសធ្យូង នៅប្រទេសថៃ មានការឆ្លង ចំនួន៤នាក់ ស្លាប់១នាក់ កំពុងព្យាបាល ៣នាក់។
តាមប្រភពបណ្តាញព័ត៌មានថៃ បានរាយការណ៍នៅថ្ងៃទី៧ ខែឧសភា ឆ្នាំ២០២៥ ថា ក្រុមការងារឆ្លើយតបបន្ទាន់កំពុងត្រួតពិនិត្យតាមដានរោគសញ្ញាជាបន្តបន្ទាប់ រយៈពេល ៦០ថ្ងៃ ខណៈក្រុមបសុសត្វ បានចុះស្រាវជ្រាវ ២ ប្រភព គឺទី១ ដីចម្ការកៅស៊ូ។ ទី២ គឺដីនៅតាមដងទន្លេមេគង្គ អាចចម្លងមេរោគពីទឹកជំនន់ដែលនាំមេរោគចូលទៅក្នុងតំបន់ ខេត្តមុក្តាហាន។
អ្នកភូមិ នៅតែតាមដានយ៉ាងដិតដល់អំពីស្ថានភាពនៃការរីករាលដាលនៃជំងឺអង់ត្រាក់ ឬពិសធ្យូងនេះ ។
តាមប្រភពក្រុមគ្រូពេទ្យ បានបង្ហើបថា ចំពោះអ្នកជំងឺថ្មី គឺស្ថិតក្នុងក្រុមដែលត្រូវតាមដាន និងរង់ចាំលទ្ធផលតេស្ត។ បច្ចុប្បន្ននេះ មិនមានអ្នកជំងឺទៀតទេ នៅក្នុងក្រុមដែលត្រូវតាមដាន។ចំពោះអ្នកសង្ស័យប៉ះពាល់ នៅសល់ចំនួន ៩៨នាក់ ពួកគេនឹងរួចផុតពីរយៈពេលតាមដានជំងឺនៅថ្ងៃទី៨ ខែឧសភា។
លោក សមស័ក្តិ ថេបសុធិន រដ្ឋមន្ត្រីក្រសួងសុខាភិបាល និងលោកវេជ្ជបណ្ឌិត អូភាស កានកវិនភុង រដ្ឋលេខា ធិការអចិន្ត្រៃយ៍ នៃក្រសួងសុខាភិបាល បានសង្កត់ធ្ងន់ថា ការតាមដានជាបន្តត្រូវតែធ្វើឡើងរហូតដល់រយៈ ពេល ៦០ថ្ងៃបានកន្លងផុតទៅ ហើយការសង្កេត ត្រូវតែធ្វើឡើងចំពោះរោគសញ្ញាមិនប្រក្រតីណាមួយ។ រោគសញ្ញាដែលត្រូវសង្កេត ដូចជា ៖ មានកន្ទួលខ្មៅនៅលើដៃ ចង្អោរ ក្អួត រាក ដកដង្ហើមខ្លី ក្អក ជាដើម បើមានចម្ងល់ សូមជូនដំណឹងទៅមន្ត្រីសុខាភិបាលសាធារណៈ។
ចំណែកខេត្តជិតខាង ដូចជា ខេត្តអំណាចចះរើន និងខេត្តកាឡស៊ីន នៅតែត្រូវប្រុងប្រយ័ត្នក្នុងការយកសាច់ពីស្រុកដនតាន ខេត្តមុក្តាហាន មកបរិភោគ ដោយមន្ត្រីជំនាញកំពុងតាមដាន យ៉ាងដិតដល់។
សូមបញ្ជាក់ថា ជំងឺអង់ត្រាក់ (Anthrax) ឬហៅថា ជំងឺពិសធ្យូង ឬក៏ជំងឺពិសខ្មៅ បង្កឡើង ដោយបាក់តេរី ដែលបង្កើតស្ព័រ (spore-forming bacillus anthracis)។ ជំងឺនេះ អាចកើតមានឡើងជាចម្បងលើសត្វពាហនៈ និងសត្វព្រៃ។ លក្ខណៈពិសេសនៃមេរោគអង់ត្រាក់ គឺអាចរស់នៅដោយស្រួល ក្រោមរូបភាពជាគ្រាប់ស្ព័រ ក្នុងបរិយាកាសខាងក្រៅ។ ស្ព័រ របស់បាក់តេរីអង់ត្រាក់ ធន់នឹងធាតុអាកាសខាងក្រៅបាន អាចសម្ងំដល់រាប់ឆ្នាំ (៣០-៤០ឆ្នាំ) នៅក្នុងដី សាកសពសត្វ និងលាមកសត្វ។ សត្វស៊ីស្មៅ មាន គោ ក្របី ចៀម ពពែ សេះ អាចឆ្លងមេរោគនេះ ចូលក្នុងខ្លួន បន្ទាប់មក គ្រាប់ស្ព័រ ក្លាយជាមេរោគមានចលនា ហើយបញ្ចេញពិសរបស់វា ដែលមានគ្រោះថ្នាក់ដល់សុខភាព។ ជំងឺអង់ត្រាក់ មានឱសថសម្រាប់ព្យាបាល និងវ៉ាក់សាំង សម្រាប់ចាក់បង្ការ។ រហូតមកដល់បច្ចុប្បន្ននេះ ជំនងឺនេះ ត្រូវបានរកឃើញនៅប្រទេសថៃ ចំនួន ៤ករណី (ស្លាប់១) ប៉ុន្តែមិនទាន់មានការរកឃើញជំងឺនេះ នៅព្រះរាជាណាចក្រកម្ពុជា នៅឡើយ៕
