ភ្នំពេញ ៖ បុរសម្នាក់ក្នុងចំណោមបក្សពួក៤នាក់ បានជិះម៉ូតូរកដេញវាយបក្ខពួកម្ខាងទៀត នៅតាមផ្លូវ តែពេលនោះ នគរបាលប៉ុស្តិ៍ទំនប់ទឹកឃើញហេតុការណ៍ បានចូលទៅឃាត់ បែរជាបុរសម្នាក់បានចង្អុលមុខរកវាយសមត្ថកិច្ចថែមទៀតផង បង្កឲ្យមានការភ្ញាក់ផ្អើល នៅវេលាម៉ោង១០យប់ ថ្ងៃទី៣ ខែកក្កដា ឆ្នាំ២០១៧ ក្រោយមន្ទីរពេទ្យមិត្តភាពខ្មែរ-សូវៀត ហៅមន្ទីរពេទ្យរុស្សី ផ្លូវ១៩៣ កែងផ្លូវ៤៣០ សង្កាត់ទំនប់ទឹក ខណ្ឌចំការមន។
បុរសដែលរករឿងសមត្ថកិច្ច ពាក់អាវយឺតដៃខ្លី ពណ៌លឿង សក់ពណ៌ទង់ដែងរូបនោះ មិនបានឲ្យស្គាល់ឈ្មោះនោះទេ។
តាមសម្ដីសមត្ថកិច្ចប៉ុស្តិ៍នគរបាលទំនប់ទឹក បានឲ្យដឹងថា មុនពេលកើតហេតុ កម្លាំងសមត្ថកិច្ចរបស់លោកបានល្បាតក្នុងមូលដ្ឋាន ដើម្បីទប់ស្កាត់បទល្មើសផ្សេងៗ និងការពារសន្តិសុខជូនប្រជាពលរដ្ឋនៅកំណាត់ផ្លូវ៤៣០ ខណៈពេលនោះក៏ប្រទះឃើញមនុស្សប្រុសចំនួន៨នាក់ បានជិះម៉ូតូចំនួន៤គ្រឿង ដោយម្ខាងៗមានគ្នា៤នាក់ស្មើគ្នា បានជិះម៉ូតូប្រដេញតាមរករឿងវាយគ្នានៅតាមផ្លូវ៤៣០ ឃើញហេតុការណ៍ដូច្នេះ កម្លាំងសមត្ថកិច្ចបានដេញតាម ដើម្បីឃាត់សួរនាំកុំឲ្យរករឿងគ្នា ស្រាប់តែបុរសម្នាក់ដែលពាក់អាវលឿងរូបនោះ បានចង្អុលមុខ ព្រមទាំងស្ទុះទៅវាយសមត្ថកិច្ចថែមទៀតផង ។
ប្រភពពីសមត្ថកិច្ចបានបន្តទៀតថា ដោយឃើញសភាពការណ៍ដូច្នេះ រូបគាត់បានហៅតាមវិទ្យុទាក់ទង ឲ្យកម្លាំងមកជួយអន្តរាគមន៍បន្ថែមទៀត លុះដល់កម្លាំងសមត្ថកិច្ចបានមកដល់ច្រើនគ្នា បុរសដែលពាក់អាវពណ៌លឿងដែលមានអាកប្បកិរិយាស្រវឹងផង បានដឹងខ្លួនខុស រួចហើយក៏បានសុំទោសសមត្ថកិច្ច ដើម្បីបញ្ចប់រឿង ៕
