តារាភាពយន្តក្លាយជាអ្នកចម្រៀងទេព បូព្រឹក្ស ដែលបោះបង់អាជីពសម្តែងកុនជិត៧ឆ្នាំមកហើយនោះ ស្រាប់តែពេលនេះ អ្នកចម្រៀងលេងក្បាច់រាំរូបនេះបង្ហើបថា នាងចង់ថតភាពយន្តឡើងវិញ នៅពេលដែលហង្សមាស បានរុញតារារបស់ខ្លួនឱ្យថតរឿងសឹងគ្រប់គ្នានោះ។
ទេព បូព្រឹក្ស ដែលអាក់ខានចេញទៅច្រៀងសម្តែងនៅសហរដ្ឋអាមេរិក កាលពីឆ្នាំមុននោះ ស្រាប់តែពេលនេះចោលលុយធំនៅប្រទេសអូស្ត្រាលីទៀត នៅឆ្នាំនេះ ដោយសារតែនាងបានអះអាងថា មិនហ៊ានចេញទៅច្រៀងសម្តែងនៅក្រៅស្រុកទេ ទោះជាបានប្រាក់ប៉ុនណាក៏ដោយ ដែលការតាំងចិត្តបែបនេះ ត្រូវបានអ្នកខ្លះសង្ស័យថា មកពីស្រីស្រស់ឆើតឆាយរូបនេះ រងគំនាបពីគូស្នេហ៍ថ្មី ដែលគេល្បីថា ជាប្រុសសង្ហាខ្ពស់ស្រឡះ ងួន ចាន់ដេវីត ខ្លាចប្រុសអូស្ត្រាលី ឆក់ស្នេហ៍…។
ទេព បូព្រឹក្ស ហៅស្រីនិច្ច ធ្លាប់ថតភាពយន្តតាំងពីនាងនៅតូចម៉្លេះ ព្រោះតែស្រីស្អាតរូបនេះ មានទេពកោសល្សខាងសម្តែងបានល្អ ទើបក្រុមគ្រួសារនាងជំរុញ។ ប៉ុន្តែ តាំងពីឈានចូលផលិតកម្មរស្មីហង្សមាស ឆ្នាំ២០១០មក បូព្រឹក្ស បានបោះបង់អាជីពសម្តែងចោល ដោយគ្មានអាល័យឡើយ ហើយកាលពីឆ្នាំមុននេះ អ្នកស្រីពាន់ ភួងបុប្ផា បានហៅនាងថតរឿង “បណ្តឹងខ្មោចស្រីទាំង៥” តែស្រីនិច្ច បែរជាអាក់ខានធ្វើជាតួឯកវិញ ដោយសារតែហង្សមាស បិទផ្លូវ។ ប៉ុន្តែថ្មីៗនេះ លេចឮថា ផលិតកម្មហង្សមាស បានដាក់ទេព បូព្រឹក្ស ស្ថិតក្នុងគម្រោងជាតួឯករឿងថ្មីរបស់ខ្លួននៅពេលខាងមុខនេះ ហើយតួឯកប្រុសដែលត្រូវប៉ះនាង គឺអាចជាលោកងួន ចាន់ដេវីត។
ក្នុងជំនួបផ្ទាល់ជាមួយតារាលេងសម្រស់រូបនេះ កាលពីរសៀលថ្ងៃទី១៨ ខែមិថុនា ឆ្នាំ២០១៧ បូព្រឹក្ស និយាយដោយសប្បាយរីករាយថា រូបនាងពេញចិត្តក្នុងការថតសម្តែងភាពយន្តថ្មីរបស់ហង្សមាស បើទោះជាឱ្យធ្វើជាតួអ្វីក៏ព្រមដែរ ព្រោះតែមិនអាចប្រកែកបានទេ។
បូព្រឹក្ស ហៅស្រីនិច្ច វាចាថា “កន្លងមកមានផលិតកម្មមួយចំនួន បានហៅខ្ញុំឱ្យថតកុនវិញដែរ តែដូចបងដឹងហើយថា ខ្ញុំមានកុងត្រាជាមួយហង្សមាស អីចឹងមិនអាចចេះតែថតដោយគ្មានការអុនញ្ញាតពីក្រុមហ៊ុនទេ រួមទាំងស្ពតផង ក៏អីចឹងដែរ។ ថ្មីៗនេះ ហង្សមាស គាត់ផលិតភាពយន្ត សម្រាប់ប៉ុស្តិ៍គាត់ ហើយមានតារាចម្រៀងមួយចំនួន បានថតខ្លះហើយ តែខ្ញុំវិញ ខាងក្រុមហ៊ុន មិនទាន់ប្រាប់ទេ តែខ្ញុំដឹងថា នៅវគ្គក្រោយ ប្រាកដជាមានខ្ញុំដែរជាមិនខាន ហើយខ្ញុំរីករាយក្នុងការថតរឿងឱ្យ បើក្រុមហ‘នុតម្រូវនោះ ដោយមិនបាច់តែធ្វើជាតួឯកក៏បានដែរ និយាយឱ្យចំទៅ យើងកុងត្រាជាមួយផលិតកម្មអីចឹង គាត់ឱ្យជួយថតកុន យើងប្រាកដជាមិនអាចប្រកែកបានទេ ត្រូវតែថតឱ្យហើយ!”។
ទេព បូព្រឹក្ស បានចេញបទថ្មីៗរបស់ខ្លួន នៅរដូវធ្លាក់ភ្លៀងនេះ មានដូចជាបទ “ឯកោលើសដើម”, “ផ្លូវជីវិត”, “Hight” និងបទ “Make It Twerk”។ តារាចម្រៀងវ័យក្មេងរូបនេះ បានបញ្ចោញក្បាច់រាំកាន់តែសាហាវជាងមុន ជាមួយអ្នករាំអមដល់ទៅ១០នាក់ឯណោះ ខណៈដែលការបង្ហាញខ្លួនលើកនេះ គឺមិនមានដៃគូនាង លោកងួន ចាន់ដេវីត មកជាមួយឡើយ។
ប្រភពបានឱ្យដឹងថា ពេលនេះ ទេព បូព្រឹក្ស គឺជាគូស្នេហ៍លួចលាក់សម្ងាត់ជាមួយតារាចម្រៀងដេវីដ ដោយមានអ្នកសិល្បៈជាច្រើនបាននាំគ្នាខ្សឹបខ្សៀវរឿងនេះថា គូស្នេហ៍យុវវ័យរូបនេះ តែងឈ្លោះគ្នាជាញឹកញាប់ណាស់។
តារាហង្សមាស រូបនេះអះអាងថា “និយាយទៅ បើមើលពីខាងក្រៅទៅ គេថា ខ្ញុំនិងដេវីត មានការទាក់ទងគ្នាអីឯណា តាមពិតនោះ គ្រាន់តែជាការយល់ឃើញរបស់ពួកគាត់ទេ សម្រាប់ខ្ញុំ គឺអត់មានអីទាក់ទងគ្នាលើសពីធម្មតាផង ហើយបើនិយាយពីដៃគូ គឺចៀសមិនផុតទេពីការស្និទ្ធស្នាលគ្នានោះ អីចឹងបើគេសង្ស័យ យើងក៏មិនអាចឃាត់គេមិនឱ្យនិយាយបានដែរ។ ចំពោះការឡើងឆាកពេលខ្លះ ខ្ញុំច្រៀងជាមួយដេវីត ពេលខ្លះម្នាក់ឯងនោះ គឺធ្វើទៅតាមកម្មវិធីតម្រូវ ជួនកាលគេចង់ឱ្យយើងចាប់ដៃគូយើង ឡើង២នាក់ទៅ ពេលខ្លះគេចង់ឱ្យយើងច្រៀងម្នាក់ឯង ក៏គ្មានដៃគូទៅ ធម្មតាទេ គ្មានបញ្ហាអីទេ”។
ទេព បូព្រឹក្ស ធ្លាប់លេចឮថា នាងមានទំនាក់ទំនងស្នេហ៍ជាមួយកូនឧកញ៉ាល្បីឈ្មោះម្នាក់ ហើយពួកគេតែងទៅដើរលេងនៅក្រៅប្រទេស ជាមួយគ្នាតែ២នាក់ញឹកញាប់ទៀតផង តែស្របពេលជាមួយគ្នានេះដែរ បូព្រឹក្ស ដែលទើបទិញវីឡាតម្លៃ១៤ម៉ឺនដុល្លារ នៅបុរីប៉េង ហួត និងទិញ Toyata Tundra តម្លៃជាង៤ម៉ឺនដុល្លារនោះ ស្រាប់តែលេចឮថា ស្រីស្រស់បានបោះបង់ស្នេហ៍ជាកូនអ្នកមាននោះ ទៅភ្ជាប់ស្នេហ៍ថ្មីលោកផ្កាយ៤ ល្បីឈ្មោះម្នាក់ ដែលមានប្រពន្ធជាអតីតពិធីការិនីល្បីឈ្មោះ និងមានកូន២នាក់ទៅហើយ។ ប៉ុន្តែដំណឹងនេះត្រូវបានបូព្រឹក្ស ប្រកែកថា នាងគ្មានប្រុសណាឧបត្ថម្ភវីឡា និងឡានឱ្យនាងនោះឡើយ គឺប្រាក់បានមកពីកម្លាំងញើសឈាមនាងសុទ្ធសាធ។
ប្រភពបានបន្ថែមថា ការមានឡានទំនើបនិងវីឡាប៉ុណ្ណេះ មិនទាន់គ្រប់តម្រូវការរបស់នាងស្រីនិច្ច ឡើយ ព្រោះតារាលេងក្បាច់រាំនេះ ចង់ទិញរថយន្តថ្មី Lexus Lx 570 ឆ្នាំ២០១៧ តម្លៃជាង២០ម៉ឺនដុល្លារ ដើម្បីកុំឱ្យមានតារាណាអាចប្រជែងជាមួយនាងបាន។
ទេព បូព្រឹក្ស និយាយលាយឡំសំណើចថា “ឥឡូវខ្ញុំបានរើអីវ៉ាន់ទៅនៅផ្ទះវីឡាថ្មីហ្នឹងហើយ តែសួរថា ខ្ញុំមានអីគ្រប់គ្រាន់ឬនៅ? ចង់មានអីថែមទៀតអត់? ខ្ញុំអាចនិយាយថា មនុស្សយើងមិនចេះមានសេចក្តីត្រូវការគ្រប់គ្រាន់ទេ ហើយពេលនេះ ខ្ញុំចង់ប្តូរឡានថ្មីទៀត (សើច)។ ខ្ញុំចង់លក់ឡាន Tundra ហ្នឹងចេញ ហើយរកទិញអាខ្ពស់ៗជិះទៀតដែរ។ ចំពោះថា ខ្ញុំស្រលាញ់ឡាន Lexus Lx 570 អត់? ខ្ញុំប្រាកដជាស្រលាញ់ តែបើច្រៀង គឺគ្មានលទ្ធភាពទិញវាបានជិះទេ បានតែស្រលាញ់ហ្នឹង មានអ្នកណាគេជួយយើង?”។
ទេព បូព្រឹក្ស ដែលអាក់ខានចេញទៅច្រៀងសម្តែងនៅអាមេរិក កាលពីឆ្នាំមុនជាមួយលោកនៅ ស៊ីនឿន នោះ ក៏មានបណ្តា Sponsor នៅប្រទេសផ្សេងៗទៀត ទាក់ទងឱ្យនាងទៅច្រៀងនៅក្រៅប្រទេសដែរ ពិសេស គឺនៅអូស្ត្រាលី តែបូព្រឹក្ស មិនព្រមទៅឡើយ ទើបមានអ្នកខ្លះថា បូព្រឹក្ស គូស្នេហ៍ថ្មីបិទច្រក មិនឱ្យនាងទៅប្រទេសអូស្ត្រាលី ព្រោះខ្លាចកន្លង់នៅអូស្ត្រាលី ឆក់ស្នេហ៍ទៅបាត់ដូចអតីតស្រីស្អាតមួយចំនួន ដែលឱ្យទៅអូស្ត្រាលីហើយ គឺច្រើនតែជាប់ទ្រុងស្នេហ៍ប្រុសអូស្ត្រាលី តែម្តង។
ជាមួយគ្នានេះ មានការសង្ស័យថា គូស្នេហ៍ថ្មីទេព បូព្រឹក្ស ដែលហួងហែង នាងមិនឱ្យទៅរកលុយនៅបរទេសនោះ មានដល់ទៅ២នាក់ គឺលោកធំផ្កាយ៤ និងងួន ចាន់ដេវីត៕