ភ្នំពេញ ៖ ស្រ្តី២នាក់បងប្អូន ត្រូវបានអាជីវករផ្សារពោធិ៍ចិនតុង ចាប់ឃាត់ខ្លួនប្រគល់ឲ្យប៉ូលីស ប៉ុស្តិ៍កាកាប កាលពីវេលាម៉ោង១១ព្រឹក ថ្ងៃទី១០ ខែកក្កដា ឆ្នាំ២០១៧នេះ បន្ទាប់ពីយកក្រវិលក្រឡៃបន្លំប្តូរយកក្រវិលពិត បានសម្រេចម្តងរួចមកហើយ កាលពីវេលាម៉ោង៨ព្រឹក ថ្ងៃទី០៩ ខែកក្កដា លុះមកដល់ព្រឹកថ្ងៃទី១០ ខែកក្កដានេះ លេចមុខមកសារជាថ្មី បន្លំក្តាប់យកក្រវិលពិតប្រាកដ ប៉ុនប៉ងយកសារជាថ្មីម្តងទៀត មានទាំងលុយដុល្លារសែនខ្មោច ក្រដាស១០០ដុល្លារ ២ សន្លឹកថែមទៀត ហើយត្រូវបានម្ចាស់អ្នកលក់ចាប់ឃាត់ខ្លួនប្រគល់ឲ្យប៉ូលីសតែម្តង ។
ស្រ្តីសង្ស័យទាំង២នាក់ ទី១. ឈ្មោះឈាន សុខលី ភេទ ស្រី អាយុ៣៨ឆ្នាំ មុខរបរមិនពិតប្រាកដ មានទីលំនៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ទី២. ឈ្មោះឈាន សម្បត្តិ ហៅច្រឹប អាយុ៤៥ឆ្នាំ មុខរបរមិនពិតប្រាកដ ត្រូវជាបងប្អូននឹងគ្នា មានទីលំនៅជាមួយគ្នា ។ ហើយសម្ភារៈដកហូតបានក្រវិលក្រឡៃ២គូ លុយដុល្លារសែនក្រដាស១០០ ចំនួន២សន្លឹក ។ ចំណែកជនរងគ្រោះ ឈ្មោះសួង ដានី ភេទស្រី អាយុ៣៦ឆ្នាំ មុខរបរលក់ដូរគ្រឿងអលង្ការ និងដូរលុយ នៅក្នុងផ្សារពោធិ៍ចិនតុង មានទីលំនៅផ្ទះលេខបេ១១ ផ្លូវលំ ក្រុម២ ភូមិដីថ្មី សង្កាត់ភ្នំពេញថ្មី ខណ្ឌសែនសុខ ។ រីឯសម្ភារៈបាត់បង ក្រវិលមាស ២ជី ។
តាមសម្តីស្រ្តីរងគ្រោះ បានឲ្យដឹងថា កាលពីព្រឹកថ្ងៃទី០៩ ខែកក្កដា ស្រ្តីសង្ស័យ២នាក់ខាងលើ បានមកបន្លំយកក្រវិលពិតប្រាកដ ចំនួន២ជីម្តងរួចមកហើយ ស្រាប់តែមកដល់ព្រឹកថ្ងៃទី១០ ខែកក្កដានេះ ស្រាប់តែលេចមុខស្រ្តីសង្ស័យទាំង២នាក់ មកសួររកទិញក្រវិលមាស២ជី សុំមើលហើយ ពេលហុចឲ្យវិញ បែរជាឲ្យវិលក្រឡៃ លុះសាកសួរជជីករករបស់ពិត ទើបស្រ្តីសង្ស័យប្រគល់ឲ្យវិញ ។ ទង្វើប៉ុនប៉ងបន្លំយកគ្រឿងអលង្ការខាងលើ ឆែកឃើញមានលុយដុល្លារសែនខ្មោច ១សន្លឹក នៅនឹងខ្លួនទៀតផង ទើបនាំគ្នាឃាត់ខ្លួនប្រគល់ឲ្យប៉ូលីសប៉ុស្តិ៍កាកាប ។
ជនសង្ស័យទាំង២នាក់ ក្រោយឃាត់ខ្លួន បាននាំទៅសាកសួរនៅប៉ុស្តិ៍កាកាប ដើម្បីកសាងសំណុំរឿងបញ្ជូនទៅផ្នែកជំនាញអធិការដ្ឋានចាត់ការបន្តទៅតាមនីតិវិធី ៕
