ភ្នំពេញ៖ បុរសម្នាក់ជាព្រូរថយន្ត ត្រូវតៃកុងរថយន្តនាំទៅដេកផ្ទះសំណាក់ ហើយតៃកុងរថយន្តទៅជួបស្រីស្នេហ៍បាត់ ទុកឲ្យដេកក្នុងបន្ទប់តែម្នាក់ឯង ផឹកស្រាស្រវឹងខ្លាចខ្មោចលង ក៏បានរត់ចេញពីផ្ទះសំណាក់ ផ្លោះរបងចូលក្នុងរោងចក្រ ត្រូវសន្តិសុខឃាត់ខ្លួន បង្កឲ្យមានការភ្ញាក់ផ្អើល កាលពីវេលាម៉ោង២និង៣០នាទីរំលងអាធ្រាត្រ ឈានចូលថ្ងៃទី១០ ខែកក្កដា ឆ្នាំ២០១៧ នៅចំណុចរោងចក្រខ្វាន់ទុង ខ្លូស៊ីន ខេមបូឌា លីមីធីត ស្ថិតនៅភូមិជ្រៅកោង សង្កាត់ចោមចៅ ខណ្ឌពោធិ៍សែនជ័យ។
ជនសង្ស័យមានឈ្មោះសេត ស៊ូ ភេទប្រុស អាយុ២០ឆ្នាំ មុខព្រូរថយន្ត រស់នៅភូមិតំបែរ ឃុំតំបែរ ស្រុកតំបែរ ខេត្តត្បូងឃ្មុំ ។
បើតាមការសារភាពពីជនសង្ស័យខាងលើ បានសារភាពថា ពីមុនគាត់ជាកម្មករសំណង់ ទើបតែធ្វើជាព្រូរថយន្តឲ្យអ្នកភូមិជាមួយគ្នាបាន១ថ្ងៃ ហើយមិនស្គាល់អ្វីទេ នៅយប់កើតហេតុ តៃកុងឡានបាននាំចូលដេកផ្ទះសំណាក់ នៅជិតកន្លែងកើតហេតុ បន្ទាប់មកតៃកុងរថយន្តបានចេញទៅរកស្រីស្នេហ៍ នៅឯម្តុំស្ពានជ្រោយចង្វារ ដោយបានទុករូបគេឲ្យនៅតែម្នាក់ឯង ។ លុះពេលតៃកុងរថយន្តទៅបាត់ រូបគេបានផឹកស្រាស្រវឹង ហើយមិនហ៊ាននៅក្នុងផ្ទះសំណាក់ខ្លាចលង ក៏៏បានរត់ចេញពីផ្ទះសំណាក់ ចេញមកផ្លូវវេងស្រេង ស្រាប់តែមានយុវជន២នាក់ ជិះម៉ូតូមួយគ្រឿង មិនចាំម៉ាក មកដល់បានចង្អុលមុខគាត់ ពេលនោះគាត់ភ័យខ្លាចពេក បានរត់ឡើងរបងរោងចក្រខាងលើតែម្តង ។
ប្រភពដដែលបានបន្តទៀតថា នៅពេលគាត់រត់ចូលក្នុងរោងចក្រ ខាងក្រុមសន្តិសុខបានប្តឹងសមត្ថកិច្ចឲ្យមកអន្តរាគមន៍ភ្លាមៗផងដែរ។ លុះនៅវេលាប្រហែល១ម៉ោង ស្រាប់តែតៃកុងរថយន្តខាងលើ បានមកហើយ បាត់រូបគាត់បានដើររកដល់កន្លែងកើតហេតុ ឃើញរូបគាត់ត្រូវគេឃាត់ខ្លួន ។
តាមប្រភពព័ត៌មានពីសន្តិសុខនៅរោងចក្រខាងលើ បាននិយាយថា នៅពេលកើតហេតុ ពួកគាត់ឃើញជនសង្ស័យលោតផ្លោះរបងចូលរោងចក្រ ហើយរត់ បន្ទាប់មកពួកគាត់នាំគ្នាដេញតាមចាប់បានភ្លាមៗ ។
ក្រោយពេលកើតហេតុជនសង្ស័យខាងលើ ត្រូវបានតៃកុងរថយន្តបានធ្វើការធានា ហើយនគរបាលប៉ុសិ៍ចោមចៅ បានអប់រំ ហើយឲ្យត្រឡប់ទៅវិញភ្លាមៗផងដែរ ៕