រឿង«មន្តស្នេហ៍លេខា» ជាប្រភេទរឿងមនោសញ្ចេតនាបែបរោលរាល នឹងចាក់បញ្ចាំង នៅគ្រប់ រោងភាពយន្តទំនើបៗ ចាប់ពីថ្ងៃទី ១៨ កញ្ញា ២០១៧នេះតទៅហើយ។ នេះជាវណ្ណកម្មថ្មី របស់ ផលិតកម្ម «មហាហង្ស» ដោយមានការវិនិយោគពីក្រុមហ៊ុន Sabay-MVP ក្រោមការចែកចាយ របស់ក្រុមហ៊ុន«ពូព្រហ្ម»។ អ្វីដែលពិសេសគឺភាពយន្តខ្មែរមួយនេះ រំលេច យុវតារាសម្តែងល្បីៗ ដូចជា៖ លោក យឹម សម្បត្តិ, លោក ហង្ស សំបើមស័ក្ខ, អ្នកនាង ភិន សុដាលីស កញ្ញា ធីវ៉ាន់ នីវ៉ា។
យឹម សម្បត្តិ
សម្តែងជាតួ«សេនី» មានចរិតជាព្រាននារី កំពូលផុតលេខ ពូកែញ៉ែស្រី ប៉ុន្តែមិនមែនជាមនុស្សពិសពុល។ លោកធ្លាប់សម្តែងក្នុងរឿង៖ នារីឆ្លាត, មួយថ្ងៃនៅជនបទ, តម្លៃស្នេហ៍, ព្យុះជីវិតចិត្តអ្នកលេង។ ជាពិសេសរឿង «តម្លៃស្នេហ៍»របស់លោកនឹងត្រូវចាក់បញ្ចាំង តំណាងប្រទេសកម្ពុជា ក្នុងមហោស្រពភាពយន្តអាស៊ាន (ASEAN Film Festival) ខាងមុខនេះ។
ភិន សុដាលីស
សម្តែងជាតួ«លក្ខិកណា» ជានារីស្មោះស្នេហ៍ ហ៊ានលះបង់អ្វីគ្រប់យ៉ាង ដើម្បីមនុស្សជាទីស្រលាញ់ និងមានភាពឆ្លាតវៃ។ អ្នកនាងធ្លាប់សម្តែងរឿង៖ រលកបោកខ្សាច់, ពេជ្រក្នុងបេះដូង, អច្ឆរិយៈស្នេហ៍ និងខ្មោចថតកុន ជាដើម។
កញ្ញា ធីវ៉ាន់ នីវ៉ា
សម្តែងរឿងជាតួ «ដារ៉ាវី» ជាមនុស្សស្រីពុតត្បុត លោភលន់ សម្លឹងមើលតែអ្នកមាន អាងសម្រស់ខ្លួនជ្រុល។ ធ្លាប់សម្តែងក្នុងខ្សែភាពយន្ត៖ បំភ្លេចមិនបាន, ព្យុះជីវិតចិត្តអ្នកលេង និងជាតារាថត ស្ប៉តពាណិជ្ជកម្ម ចម្រៀងកាយវិកា ជាពិធីករ និងមានអាជីពតារាម៉ូដែលផងដែរ។
ហង្ស សម្បើមស័ក្ខ
សម្តែងជាតួ «ចេតនា» ចរិតខាងក្រៅជាមនុស្សមិនសូវមាត់ក ប៉ុន្តែខាងក្នុងវិញ ពិសពុល សាវ៉ា គួរឱ្យខ្លាច។ លោកក៏ធ្លាប់សម្តែងក្នុងខ្សែភាពយន្តល្បីៗដូចជា: ផ្កាក្នុងផ្កា, ទឹកចិត្តប្រពន្ទ និងស្ប៉តពាណិជ្ជកម្ម ចម្រៀងកាយវិកា និងមានអាជីពជាពិធីករផងដែរ។
ចង់ដឹងថាតើតារាទាំងបួនដួង សម្តែងឈុតពិសេសៗ សមនឹងគ្នាយ៉ាងណទៅ សូមតាមដានទាំងអស់គ្នាចាប់ពីថ្ងៃទី១៨ កញ្ញានេះតទៅ!
រឿង«មន្តស្នេហ៍លេខា»ឆ្លុះបញ្ចាំងពីបុរសសំបូរស្នេហ៍វ័យ ៣២ឆ្នាំ សេនី ពោរពេញទៅដោយទ្រព្យសម្បត្តិ និងមានរូបរាងសង្ហារ មាននារីមិនតិចទេ ដែលលង់ស្នេហ៍សេនី ដោយសារតែភាពឡូយរបស់គេ។ តែធាតុពិត សេនី មិនមានចិត្តស្រឡាញ់លើនារីណាម្នាក់ទេ ដោយសារតែគេធ្លាប់មានវិបត្តិ ស្នេហាសង្សារការចោល ទើបធ្វើឱ្យកម្លោះសង្ហារម្នាក់នេះអស់ជំនឿចិត្តលើនារីគ្រប់រូប និង យកនារីៗធ្វើជាល្បែងកម្សាន្តប៉ុណ្ណោះ ហើយក៏គ្មាននារីណាម្នាក់អាចកែប្រែទម្លាប់របស់គេ បានដែរ។ ចុះតើនារីណាម្នាក់ទៅដែលមានឥទ្ធិពលអាចកែប្រែចរិតអាក្រក់របស់គេបាន?
គួរឲ្យដឹងផងដែរថា ពូព្រហ្ម អ៊ិនធើធេនម៉ិន (PuPrum Entertainment) ជាក្រុមហ៊ុនរួមសម្ព័ន្ធរវាង ក្រុមហ៊ុន ចែកចាយភាពយន្តធំៗ២ គឺ SABAY DIGITAL CORPORATION និង WESTEC MEDIA LIMITED។ ក្រុមហ៊ុនមានភារៈ ចែកចាយភាពយន្តដែលផលិតនៅកម្ពុជា និងជាក្រុមហ៊ុន ដែលផ្តល់អជ្ញាប័ណ្ណភាពយន្ត និងផ្តល់ខ្លឹមសាររឿងឈានមនុខគេ នៅប្រទេសកម្ពុជា។ ពូព្រហ្ម អ៊ិនធើធេនម៉ិន បានដាក់ខ្លួនជាក្រុមហ៊ុនចែកចាយជាតិ និងអន្តរជាតិ ដែលជំនាញ ខាងភាពយន្តខ្នាតវែងប្រកបដោយគុណភាព មកពីប្រទេសកម្ពុជា។ តាមរយៈបណ្តាញដៃគូ ចែកចាយ និងផ្សព្វផ្សាយទូលំទូលាយ ពូព្រហ្ម អ៊ិនធើធេនម៉ិន ចាត់ចែងសិទ្ធិដូចតទៅ៖ ចាក់ក្នុងរោងកម្សាន្ត តាមផ្ទះ ទូរទស្សន៍ និងវីឌីអូតាមតម្រូវការ។ ស្នាដៃកន្លងមករបស់ពូព្រហ្ម អ៊ិនធើធេនម៉ិន រួមមានភាពយន្តខ្មែរល្បីៗ និងជោគជ័យមួយចំនួន ដែលមានសក្តានុពលក្នុងតំបន់ និងលើឆាកអន្តរជាតិ៕