ភ្នំពេញ ៖ តារាសម្ដែងនី មុនីនាថ និងមេធាវីតំណាងដោយអាណត្តិ គឺ លោក រ៉ូ ប៊ីនណៃ ពុំបានចូលបំភ្លឺតាមដីកាកោះ របស់លោក អ៊ុក សុវណ្ណារិទ្ធ ចៅក្រមសាលាដំបូងរាជធានីភ្នំពេញ កាលពីរសៀលថ្ងៃទី២២ ខែវិច្ឆិកា ឆ្នាំ២០១៧ ពាក់ព័ន្ធនឹងបណ្តឹងទាមទារប្រាក់ជាង១០ម៉ឺនដុល្លារអាមេរិក របស់អតីតគូដណ្ដឹងឡើយ។
តាមប្រភពព័ត៌មាន បានឱ្យដឹងថា ការខកខានមិនចូលបំភ្លឺតាមដីកាកោះនោះ ដោយសារលោកមេធាវី រ៉ូ ប៊ីនណៃ ជាប់រវល់នៅខេត្ត ពុំទាន់បានសិក្សាសំណុំរឿង ទើបលោកមេធាវីស្នើសុំពន្យារពេលចូលបំភ្លឺទៅរសៀលថ្ងៃទី២៩ ខែវិច្ឆិកា ឆ្នាំ២០១៧ វិញ។
គួរបញ្ជាក់ថា លោកអ៊ឹង សូឡាង អតីតគូដណ្តឹងតារាសម្តែង នី មុនីនាថ បានដាក់ពាក្យបណ្តឹងចូលទៅកាន់អយ្យការអមសាលាដំបូងរាជធានីភ្នំពេញ ប្តឹងទាមទារឱ្យកញ្ញានី មុនីនាថ សងប្រាក់ចំនួន៧ម៉ឺនដុល្លារ និងប្រាក់ជំងឺចិត្តចំនួន៥ម៉ឺនដុល្លារ បន្ទាប់ពីអ្នកទាំងពីរបានភ្ជាប់ពាក្យជាមួយគ្នារួច លុះពេលធ្លាក់វីសា ត្រូវចេញទៅរស់នៅសហរដ្ឋអាមេរិក បែរជានី មុនីនាថ មិនព្រមទៅ និងសុំផ្តាច់ពាក្យ។
តាមពាក្យបណ្តឹងដែលចុះហត្ថលេខាដោយមេធាវីរបស់ លោក អ៊ឹង សូឡាង កាលពីចុងខែកញ្ញា បានឲ្យដឹងពីមូលហេតុនៃការទាមទារប្រាក់សំណងដល់ទៅ១២មុឺនដុល្លារ ពីមុនីនាថ គឺដោយសារការដែលបានស្គាល់គ្នា និងស្រឡាញ់គ្នា ពួកគេបានព្រមព្រៀងដោយច្បាស់លាស់ថា នឹងយកគ្នាជាប្តីប្រពន្ធនៅថ្ងៃអនាគត ទើបដើមចោទបានរៀបចំធ្វើពិធីភ្ជាប់ពាក្យ ដោយមានឪពុកម្តាយទាំងសងខាងយ៉ាងត្រឹមត្រូវ។
នៅថ្ងៃភ្ជាប់ពាក្យ មុនីនាថ បានទាមទារបំពាក់នូវគ្រឿងអលង្ការ ដូចជា ខ្សែកពេជ្រ, ចិញ្ចៀនពេជ្រ និងក្រវិលពេជ្រ មានតម្លៃ៣ម៉ឺន៧ពាន់ដុល្លារ។ ម្យ៉ាងទៀត ដោយសារដើមចោទជាអាណិកជនខ្មែរ រស់នៅសហរដ្ឋអាមេរិក ដើមចោទខិតខំព្យាយាមបំពេញបែបបទធានាយកគូដណ្តឹងទៅរស់នៅសហរដ្ឋអាមេរិក។
ប៉ុន្តែ នៅថ្ងៃទី១៦ ខែមីនា ឆ្នាំ២០១៧ បន្ទាប់ពីទទួលវីសាឱ្យទៅអាមេរិក បែរជាមុនីនាថ មិនទៅ ថែមទាំងលុបចោលការភ្ជាប់ពាក្យ ដោយលើកហេតុផលគូដណ្តឹង (ដើមចោទ) មិនចេះប្រើពាក្យផ្អែមល្ហែមជាមួយនាង។
បន្ទាប់ពីនាងរងការប្តឹងពីអតីតគូដណ្តឹងនោះមក នី មុនីនាថ បានពឹងពាក់អ្នកនាងចន ច័ន្ទលក្ខិណា ប្រធានសមាគមសិល្បករខ្មែរ ជួយរកមេធាវីការពារក្តីឲ្យនាង ហើយអ្នកនាងចន ច័ន្ទលក្ខិណា ក៏បានប្រគល់សិទ្ធិជូនលោកមេធាវី រ៉ូប៊ីនណៃ ជាមេធាវីតំណាងដោយអាណត្តិរបស់កញ្ញានី មុនីនាថ ក្នុងការតតាំងក្តីជាមួយអតីតគូដណ្តឹងនាង គឺលោកអុឹង សូឡាង តាមរយៈលិខិតប្រគល់សិទ្ធិរបស់សមាគមសិល្បករខ្មែរ លេខ០៤២សសខ ចុះថ្ងៃទី១៥ ខែវិច្ឆិកា ឆ្នាំ២០១៧៕