ភ្នំពេញ ៖ យុវជនម្នាក់ បានចូលទៅផឹកស៊ីក្នុងក្លឹបមួយកន្លែង រួចក៏ញ៉ែបាននារីវ័យក្មេងម្នាក់ សុំធ្វើជាសង្សារមួយយប់ លុះផឹកស៊ីចប់ ចេញមកវិញ ក៏ត្រូវនារីជាសង្សារថ្មោងថ្មីពឹងឱ្យជូនទៅផ្ទះ បានពាក់កណ្តាលផ្លូវ ក៏សុំខ្ចីម៉ូតូប្រុសជិះ ដោយសន្យាវិលវិញឱ្យថើប១ខ្សឺត ចំណែកខាងប្រុស ហេតុតែចង់ចំណេញបាន ថើបស្រី១ខ្សឺត ក៏យល់ព្រម ទីបំផុតនារីជើងល្អជិះម៉ូតូយកទៅបាត់ ធ្វើឱ្យយុវជនជាម្ចាស់ម៉ូតូ អង្គុយចាំថើបស្រីអស់រាប់ម៉ោង បានថើបតែខ្យល់ទើបភ្ញាក់ខ្លួនថា ចាញ់ល្បិចស្រីស្នេហ៍ហេងស៊យនោះ ហើយក៏រត់ទៅផ្ទះប្រាប់ឪពុកឱ្យជូនទៅដាក់ពាក្យបណ្តឹង។
ហេតុការណ៍ខាងលើនេះ បានកើតឡើងកាលពីវេលាម៉ោង៤ទៀបភ្លឺ ថ្ងៃទី១៣ ខែធ្នូ ឆ្នាំ២០១៧ នៅចំណុចរង្វង់មូលចោមចៅ ស្ថិតក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ។
យុវជនរងគ្រោះដែលត្រូវស្រីស្នេហ៍ហេងស៊យស៊ីដាច់ម៉ូតូបាត់នោះ មានឈ្មោះយ៉ាន យ៉ត អាយុ១៦ឆ្នាំ មុខរបរជាងដែក ស្នាក់នៅភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ និងមានស្រុកកំណើតក្នុងភូមិចាន់រ៉ា ឃុំស្ពឺ “ខ” ស្រុកបាភ្នំ ខេត្តព្រៃវែង។ ចំណែកម៉ូតូដែលស្រីស្នេហ៍ថ្មោងថ្មីឆបោកយកទៅបាត់ ម៉ាក ZOOMER-X ពណ៌ខ្មៅ ស៊េរីឆ្នាំ២០១៨ ពាក់ស្លាកលេខ ព្រៃវែង 1L-4532។ រីឯស្រីស្នេហ៍មិនស្គាល់ឈ្មោះ អាយុជាង១៥ឆ្នាំ ទើបតែស្គាល់គ្នាក្នុងក្លឹបមិនទាន់បាន១យប់ស្រួលបួលផង។
តាមសម្តីយុវជនខាងលើ បានរៀបរាប់ប្រាប់ថា នៅមុនពេលកើតហេតុ កាលពីវេលាម៉ោង៦ព្រលប់ ថ្ងៃទី១២ ខែធ្នូ ឆ្នាំ២០១៧ ក្រោយពេលចេញពីធ្វើការងារ រូបគេបានជិះម៉ូតូដើរ លេងជាមួយមិត្តភក្តិ២នាក់ទៀត ដោយជិះម៉ូតូ២គ្រឿង លុះដល់យប់ជ្រៅ ក៏នាំគ្នាចូលទៅផឹកស៊ីរាំលេងនៅក្នុងក្លឹបមីតណាញ ហើយនៅអំឡុងពេលកំពុងរាំលេងសប្បាយនោះ រូបគេក៏ញ៉ែបាននារីវ័យក្មេងល្ហក់ម្នាក់ (នារីសង្ស័យខាងលើ) រួចក៏ទាក់ទងគ្នាជាសង្សារចាប់ពីម៉ោងនោះមក និងបានអង្គុយផឹកស៊ីជុំគ្នា ព្រមទាំងរាំលេងយ៉ាងសប្បាយក្អាកក្អាយ។
យុវជនជាម្ចាស់ម៉ូតូ បានបន្តថា លុះមកដល់វេលាម៉ោង៤ទៀបភ្លឺ ថ្ងៃទី១៣ ខែធ្នូ ឆ្នាំ២០១៧ ពួកខ្លួនក៏នាំគ្នាចេញពីក្លឹបវិញ បំណងត្រឡប់ទៅផ្ទះវិញរៀងៗខ្លួន។ ពេលនោះ នារីជាសង្សារថ្មោងថ្មី ក៏បានសុំរួមដំណើរជាមួយរូបគេដែរ ដោយពឹងឱ្យរូបគេជួយជូននាងទៅផ្ទះផង លុះពេលធ្វើដំណើរមកដល់ចំណុចរង្វង់មូលចោមចៅ នារីសង្ស័យបានប្រាប់ឱ្យរូបគេ ឈប់ម៉ូតូសិន និងសុំខ្ចីម៉ូតូជិះទៅផ្ទះមិត្តភក្តិ ក្បែរនេះមួយភ្លែត ដោយថែមទាំងបានសន្យាថា ពេលនាងត្រឡប់មកវិញ នាងនឹងឱ្យរូបគេជាសង្សារថើប១ខ្សឺតទៀតផង។
យុវជនខាងលើ បានឱ្យដឹងទៀតថា នៅពេលស្តាប់ឮសម្តីស្រីស្នេហ៍ប្រាប់ថា នឹងឱ្យថើប១ខ្សឺតបែបនេះ ធ្វើឱ្យរូបគេយល់ឃើញថា ពិតជាចំណេញធំណាស់ គ្រាន់តែឱ្យនាងជិះម៉ូតូមួយភ្លែតបានថើប១ខ្សឺតរកឯណាបាន ទើបបានយល់ព្រមឱ្យនាងជិះម៉ូតូយកទៅ ចំណែករូបគេបាន អង្គុយចាំនៅចំណុចរង្វង់មូលចោមចៅ សំលៀង ច្រមុះចាំថើបស្រីស្នេហ៍។ លុះក្រោយពីអង្គុយ សំកុកចាំថើបស្រីអស់ជាច្រើនម៉ោងនៅតែមិនយល់ស្រមោលស្រីស្នេហ៍សោះ ទើបធ្វើឱ្យរូបគេភ្ញាក់ខ្លួនថា ចាញ់បោកនារីជើងល្អរូបនោះហើយ ទើបបានដើរទៅផ្ទះវិញ និងបានយករឿងរ៉ាវប្រាប់ឪពុកធ្វើឱ្យឪពុកឆេះដុំវ៉ៃកូនមិនកើត រួចនាំគ្នាទៅដាក់ពាក្យបណ្តឹងនៅប៉ុស្តិ៍នគរបាល ចោមចៅ៣ ដើម្បីឱ្យជួយស្រាវជ្រាវតាមរកម៉ូតូ និងតាមចាប់ខ្លួនស្រីស្នេហ៍ហេងស៊យខាងលើនោះ យកមកចាត់ការតាមច្បាប់៕