ភ្នំពេញ ៖ បុរសម្នាក់ ក្រោយពីផឹកស៊ីស្រវឹងខឹងស្រីស្នេហ៍របស់ខ្លួនពេក ក៏ជិះម៉ូតូតែម្នាក់ឯងក្នុងល្បឿនយ៉ាងលឿន រួចក៏ជ្រុលចង្កូតទៅបុកបង្គោលថ្មដាក់ច្រវាក់ ដែលជាចំណតសាលាបារាំង បណ្តាលឱ្យបាក់អស់៤បង្គោល ចំណែកអ្នកបើកម៉ូតូរងរបួសធ្ងន់ខ្លួន បង្កឱ្យមានការភ្ញាក់ផ្អើលឡើង កាលពីវេលាម៉ោង៤និង៣០នាទីទៀបភ្លឺ ថ្ងៃទី០៦ ខែកុម្ភៈ ឆ្នាំ២០១៨ នៅតាមបណ្តោយផ្លូវ៦១ ចំណុចក្បែរស្ថានទូតអាមេរិក ស្ថិតក្នុងសង្កាត់វត្តភ្នំ ខណ្ឌដូនពេញ។
បុរសដែលផឹកស៊ីស្រវឹងខឹងសង្សារជិះម៉ូតូលឿន រហូតជួបគ្រោះថ្នាក់ចរាចរណ៍នេះ មិនត្រូវបានស្គាល់អត្តសញ្ញាណនោះទេ គ្រាន់តែដឹងថា ជនរងគ្រោះជាអ្នករត់ម៉ូតូឌុប និងជិះម៉ូតូមួយគ្រឿងម៉ាកសង់កូរ៉េ ពណ៌ក្រហម អត់មានពាក់ស្លាកលេខ។
តាមប្រភពពីសាក្សីដែលឃើញហេតុការណ៍ បានឱ្យដឹងថា នៅមុនពេលកើតហេតុ គេបានឃើញបុរសរងគ្រោះខាងលើ ជិះម៉ូតូតែម្នាក់ឯង ក្នុងស្ថានភាពស្រវឹងជោគ ធ្វើដំណើរតាមបណ្តោយផ្លូវ៦១ បោះពួយក្នុងទិសដៅពីជើងទៅត្បូង ក្នុងល្បឿនយ៉ាងលឿន។ លុះពេលមកដល់ចំណុចកើតហេតុ ម៉ូតូជនរងគ្រោះក៏បានរេចង្កូត ទៅបុកបង្គោលថ្មដាក់ច្រវាក់ ដែលជាចំណតរបស់សាលាបារាំង បណ្តាលឱ្យបាក់អស់៤បង្គោល ចំណែកអ្នកបើកម៉ូតូរងរបួសធ្ងន់ ហើយភ្លាមៗនោះត្រូវបានរថយន្តសង្គ្រោះរបស់មន្ទីរពេទ្យកាល់ម៉ែត មកដឹកយកទៅព្យាបាល។
បើតាមសម្តីសន្តិសុខយាមនៅក្បែរកន្លែងកើតហេតុ បានឱ្យដឹងថា មុនពេលកើតហេតុជនរងគ្រោះខឹងស្រីស្នេហ៍ ទើបផឹកស៊ីស្រវឹង ហើយជិះម៉ូតូលឿន បណ្តាលឱ្យរេចង្កូតទៅបុកបង្គោលថ្មខាងលើរងរបួសបែបនេះតែម្តង។
ក្រោយពេលកើតហេតុ ម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌដូនពេញ៕
