តារាសម្តែង និងជាពិធីការិនីវ័យក្មេង នាងនៅ សុនិតា ដែលស្ថិតក្នុងចំណោមតារាមានទ្រព្យច្រើនរាប់សែនដុល្លារ ក្នុងកណ្តាប់ដៃនោះ ត្រូវបានបែកធ្លាយថា នាងមានលោកអភិបាលខណ្ឌម្នាក់ តាមអន្ទងស្នេហ៍ រហូតដល់ធ្វើឱ្យតារារួមអាជីពនាំគ្នាខ្សឹបខ្សៀវថា សុនិតា មានអ្នកធំនៅក្រោយខ្នងជុំវិញភាពហ៊ឺហាទាំងនោះ។
យ៉ាងណា មានដំណឹងដ៏រសើបថា ស្រីស្អាតនៅ សុនិតា ដែលខ្លាចៗអ្នកកាសែតនោះ មានមន្ត្រីធំដល់ទៅ 3រូប ព្យាយាមរាយអន្ទាក់ស្នេហ៍តារាស្រអែមស្រស់រូបនេះ ដែលធ្វើឱ្យនាងពិបាកគេច…។
លោកអភិបាលខណ្ឌ, ផ្កាយ3 និងលោកឧកញ៉ាម្នាក់ សុទ្ធតែត្រូវបានគេបង្ហើបឱ្យដឹងថា បានចូលខ្លួនមកព្រមគ្នាក្នុងការតាមសាសងស្នេហ៍នាងនៅ សុនិតា ហេតុនេះហើយ ពិតជាធ្វើឱ្យស្រីស្រស់រូបនេះ មិនងាយអាចគេចចេញដោយងាយស្រួលឡើយ ព្រោះថា ប្រុសទាំង3 សុទ្ធតែជាសេដ្ឋីដែលចាយលុយដូចក្រដាសអ៊ីចឹង។
តើនៅ សុនិតា នឹងជ្រើសយកប្រុសណាម្នាក់ ទៅធ្វើជាម្ចាស់ចិត្តបេះដូងនាង នៅពេលដែលមានជម្រើសដល់3 ក្នុងពេលតែមួយនេះ?
នៅ សុនិតា ហាក់ភ័យខ្លាចក្នុងការផ្តល់បទសម្ភាសន៍ជាមួយអ្នកកាសែត ដោយទូរស័ព្ទរាល់លើក ច្រើនតែត្រូវបានអ្នកផ្សេងលើកជំនួស ហើយប្រាប់ថា នាងជាប់រវល់ជានិច្ច ទើបមិនអាចសុំការបញ្ជាក់បានឡើយ។ ប៉ុន្តែមន្តស្នេហ៍តារារូបនេះធ្វើឱ្យអ្នកសិល្បៈមិនតិចនាក់ទេ ដែលស្ញប់ស្ញែងនាង ព្រោះថា ក្នុងចំណោមប្រុសទាំង3 បើសិនជាសុនិតា សម្រេចចិត្តជ្រើសយកបុរសណាម្នាក់នោះ មិនចាំបាច់គិតយូរទេ គឺនាងនឹងក្លាយទៅជាជំទាវជាមិនខាន ដែលពេលនោះមិនចាំបាច់ក្នុងការថតសម្តែងសិល្បៈហាលថ្ងៃទៀតទេ គឺចង់បានអ្វីក៏បានទាំងអស់ ឱ្យតែនាងហ៊ានប្រថុយ។
ប៉ុន្តែ គួរឱ្យស្តាយ តាមតារាដែលស្និទ្ធនឹងសុនិតា បានទម្លាយឱ្យដឹងថា ប្រុសទាំង3នាក់ ដែលប្រជែងគ្នាចង់ថ្នាក់ថ្នមកាយានាងសុនិតា នោះ គឺសុទ្ធតែមិនមែននៅទំនេរទាំងអស់ ហើយម្នាក់ៗចង់ស្នេហ៍នាងសុនិតា គ្រាន់តែជាកំណាន់ចិត្តប៉ុណ្ណោះ អ៊ីចឹងបានជាតារារូបនេះមិនចង់ជាប់អន្ទាក់ ធ្វើជាកំណាន់ចិត្តលួចលាក់របស់គេទេ ហើយនាងព្យាយាមគេចចេញតែម្តង។
យ៉ាងណា នៅពេលដែលអ្នកយកព័ត៌មានយើងសួរមិត្តភក្តិនៅ សុនិតា ថាតើប្រុសទាំង3នោះ ប្រុសម្នាក់ណាអាចមានសង្ឃឹមបានបេះដូងនាងសុនិតា? ត្រូវបានអ្នកសម្តែងរូបនោះខ្សឹបប្រាប់ថា គឺលោកអភិបាលខណ្ឌ ហើយអ្នកដែលតាមស្រលាញ់សុនិតា ខ្លាំងជាងគេ គឺជាលោកផ្កាយ3 កូនមន្ត្រីធំម្នាក់ ចំណែកលោកឧកញ៉ានោះ សុនិតា មិនចាប់អារម្មណ៍ទេ ព្រោះថា គាត់មានប្រពន្ធជាតារាសិល្បៈល្បីឈ្មោះម្នាក់ទៅហើយ។
នៅ សុនិតា ត្រូវបានគេសង្ស័យថា នាងមានគូស្នេហ៍កំបាំងមុខនៅក្រោយខ្នង នៅពេលដែលស្រីស្រស់រូបនេះក្លាយទៅជាម្ចាស់កម្មសិទ្ធិផ្ទះវីឡាយ៉ាងប្រណីតមួយ នៅក្បែរផ្សារទំនើបអ៊ីអន2 ដែលនឹងធ្វើការសម្ពោធនៅមុនពេលចូលឆ្នាំខ្មែរនេះហើយ តែពិធីការិនីរូបនេះមិនសប្បាយចិត្តទេ នៅពេលដែលត្រូវគេសួរថា បានលុយមកពីណាទិញវីឡានោះ ដោយនាងនិយាយខ្លីថា ទិញបង់រំលស់ និងទឹកប្រាក់មួយចំនួនបានមកពីនាងប្រមូលបានមកពីការច្រៀងសម្តែងនៅប្រទេសអូស្ត្រាលី ដែលបានចេញទៅ2លើកកន្លងមកនោះ។ ប៉ុន្តែការអះអាងរបស់សុនិតា នេះហាក់ផ្ទុយស្រឡះទៅនឹងអ្វីដែលអ្នកស្និទ្ធតារារូបនេះបានបង្ហើបប្រាប់នោះ ដោយពួកគេអះអាងថា វីឡារបស់សុនិតា នោះ គឺបើតាមធ្វើធម្មតា គឺរួចរាល់ជាយូរខែមកហើយ តែនាងសាងសង់ដោយសម្រិតសម្រាំងខ្លាំងណាស់ បើទាស់ត្រង់ណា វ៉ៃចូលភ្លាម។ ចំណែកការទិញនោះ មិនមែនជាការបង់រំលស់ដូចអ្វីដែលនាងបាននិយាយទេ គឺទិញផ្តាច់តែម្តង។
នៅ សុនិតា ដែលអស់តំណែងជាពិធីការិនីនៅប៉ុស្តិ៍លេខ5 នោះ បានហក់ចូល MyTV តែមិនសូវមានភាពលេចធ្លោឡើយ។ ថ្មីៗនេះដែរ ស្រីស្អាតរូបនេះឆក់បានតំណែងជាតួឯកស្រីក្នុងរឿងភាពយន្តខ្នាតធំ របស់ផលិតកម្មថោន រឿង “រៃមាស” ដែលប៉ះជាមួយលោកយ៉ែម សំអូន, អ៊ុន សុទ្ធា និងឌុច លីដា។
អតីតកញ្ញាឯកប៊្រីដស្តុន រូបនេះ ធ្លាប់ត្រូវម្តាយនាងតាមជាប់ស្អិតពេលប្រឡូកសិល្បៈដំបូង ទើបធ្វើឱ្យប្រុសៗទាំងឡាយ ពិបាកសាសងស្នេហ៍។ ប៉ុន្តែតាំងពីល្បីឈ្មោះមក សុនិតា មិនដែលយកម្តាយតាមការពារដូចលើកមុនទេ ហើយនាងមានទ្រព្យឆាប់រហ័សដូចផ្លេកបន្ទោរ ត្រូវបានតារាមួយចំនួនបានហៅនាងថា “ជំទាវតូច” ទៅហើយ។ ប៉ុន្តែការផ្តល់រហស្សនាមបែបនេះ មិនបានធ្វើឱ្យសុនិតា រំភើបឡើយ បែរជាធ្វើឱ្យនាងមិនសប្បាយចិត្តទៅវិញ ហើយនាងតែងតបទៅអ្នកដៀមដាមឱ្យនាងទាំងនោះថា បើសិនជាជំទាវមែន ចាំបាច់អីមកថតសិល្បៈ ហាលថ្ងៃ ដើរម៉ូដ បែកញើសធ្វើអី ម៉្លេះដេកចាយលុយទៅហើយ…។
មហាជនជាច្រើនបានលើកឡើងថា ការប្រឡូកសិល្បៈរបស់តារាស្រីស្អាតៗវ័យក្មេង សម័យនេះ គ្រាន់តែល្បីមួយភ្លែត សម្ញែងទ្រព្យ ហ៊ឺហាជិះឡានសុទ្ធតែទំនើបៗ10-20ម៉ឺនដុល្លារ ទិញវីឡា 30ទៅ40ម៉ឺនដុល្លារ។
ទោះជាយ៉ាងណា ទស្សនិកជនរង់ចាំមើលថា តើប្រុសសេដ្ឋីទាំង3រូបខាងលើ អ្នកណាជាមនុស្សពិសេសរបស់សុនិតា ដែលនាងនឹងបណ្តើរជាចំហឱ្យគេឃើញ ដើម្បីឱ្យអស់ការសង្ស័យ ក្នុងពេលខាងមុខនេះ?…៕