នៅព្រឹកថ្ងៃទី១៨ ខែមិថុនា នេះ តារាសម្ដែងលោកញ៉ែម សុគន្ធ បានសម្រេចចិត្តភ្ជាប់ពាក្យជាផ្លូវការហើយ ជាមួយស្រីស្អាតម្នាក់ដែលមិនមែនជាអ្នកសិល្បៈឡើយ គឺកញ្ញា ងួន កែវមល្លិកា។ ពិធីសិរីសួស្ដីនេះបានរៀបចំនៅគេហដ្ឋានខាងស្រីនៅមុខទីស្នាក់ការកាកបាទក្រហមកម្ពុជា ដែលគេឃើញមានតារាសិល្បៈរួមអាជីពចូលរួម មានដូចជា លោកសាយ សៀរ៉ា , អាឡិច ចាន់ត្រា និងកញ្ញាថន លក្ខិណា ជាដើម ។
ក្នុងសម្លៀកបំពាក់ជាឈុតកូនកំលោះដ៏ស្រស់សង្ហានោះ បុរសចង្ការព្រែក លោកញ៉ែម សុគន្ធ ញញឹមបិទមាត់មិនជិតនោះទេ ដែលបានភរិយាក្មេងស្អាតមិនចាញ់តារាឡើយ ហើយលោកតាអាចារ្យសរសើរថា អ្នកទាំង២ពិតជាគូព្រេងពីអតីតជាតិដែលអាចស្រលាញ់គ្នាដល់ចាស់កោងខ្នង។
ញ៉ែម សុគន្ធ និយាយចំពោះមុខឪពុកម្ដាយខាងស្រីថា លោកនឹងមើលថែអនាគតភរិយាឲ្យបានល្អជាទីបំផុត ព្រោះខ្លួនស្រលាញ់ភរិយាខ្លាំងណាស់។
លោកសាយ សៀរ៉ា ដែលបានទៅចូលរួមកម្មវិធីភ្ជាប់ពាក្យលោកញ៉ែម សុគន្ធ បានឲ្យដឹងថា នោះគឺជាការភ្ជាប់ពាក្យយ៉ាងពិតប្រាកដមែន មិនមែនក្លែងក្លាយទេ តែលោកមិនដឹងថា កូនក្រមុំគេធ្វើការអីឡើយ។
លោកសៀរ៉ា ប្រាប់តាមទូរស័ព្ទថា ”អូបង! លោកញ៉ែម សុគន្ធ គាត់ភ្ជាប់ពាក្យមែនតើបង! ខ្ញុំមិនដឹងថា គូដណ្ដឹងគាត់ធ្វើការអីទេ គឺគ្រាន់តែថាមិនមែនជាអ្នកសិល្បៈទេបង”។
ការសម្រេចចចិត្តភ្ជាប់ពាក្យរបស់លោកញ៉ែម សុគន្ធ នៅពេលនេះ អាចជាការលាងជម្រះរឿងអាស្រូវស្នេហាតារាសម្ដែងល្បីឈ្មោះរូបនេះ ដែលមុននេះ ត្រូវបានក្មួយប្រុសរបស់លោកម្នាក់ ឈ្មោះសុវណ្ណរិទ្ធ បកអាក្រាតថា លោកសុគន្ធ ស្រលាញ់តែប្រុសៗ ដោយក្មួយប្រុសរូបនោះ ថែមទាំងដៀលលោកសុគន្ធ ទៀតផងថា បានសុំគេបង្ហាញប្រដាប់ភេទ តែលោកសុគន្ធ ច្រានចោល និងថា រឿងនោះកើតឡើងដោយសារក្មួយលោកដែលជាអ្នកញៀនថ្នាំមានការអាក់អន់ចិត្តជាមួយនិងលោកកន្លងមក។
គេជឿថា ញ៉ែម សុគន្ធ នឹងប្រញ៉ាប់ចូលរោងការឆាប់ៗជាមួយនាងងួន កែវមល្លិកា ក្នុងពេលឆាប់ខាងមុខជាមុនខានដើម្បីកប់ដានរឿងក្មួយប្រុសចោទប្រកាន់នោះ៕