ទើបតែចូលប្រឡូកសិល្បៈរយៈពេលខ្លីសោះ ប៉ុន្តែតារាសម្ដែងលោកចាន់ស៊ី ស៊ីណាវ៉ាត់ត្រា មានរថយន្ដ២គ្រឿង និងថ្មីៗនេះ ទើបទិញដីបាន១ប្លង់ តម្លៃ២ម៉ឺនដុល្លារទៀត ទើបធ្វើឲ្យមានការសង្ស័យពីសំណាក់តារារួមអាជីពថា បុរសសង្ហាមកពីខេត្តបាត់ដំបង នេះ មានស្រីស្នេហ៍វ័យចំណាស់ជួយឧបត្ថម្ភជ្រោមជ្រែងនៅក្រោយខ្នង។
ប្រភពបានឲ្យដឹងថា តារាសម្ដែងវ័យក្មេងលោកចាន់ស៊ី ស៊ីណាវ៉ាត់ត្រា មានរថយន្ដផ្ទាល់ខ្លួន២គ្រឿង គឺម៉ាក Corolla និងកាមរីបាឡែន ហើយថ្មីៗនេះ ស្រាប់តែទៅទិញដីមួយប្លង់តម្លៃ២ម៉ឺនដុល្លារ នៅភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង ទៀតផង ខណៈដែលការងារសិល្បៈរបស់លោកហាក់មិនសូវប្រឡូកពេញទំហឹងផង ប៉ុន្តែបែរជាមានទ្រព្យកើនយ៉ាងឆាប់រហ័សបែបនេះ ទើបធ្វើឲ្យមានការលេចឮថា ទាំងតារាស្រីនិងប្រុស គឺឲ្យតែនៅក្មេងស្អាតសង្ហា គឺពួកគេមួយចំនួនមានអ្នកចិញ្ចឹមដូចៗគ្នា។
ទោះជាយ៉ាងណា នៅក្នុងជំនួបតាមទូរស័ព្ទ តារាសម្ដែងមានទឹកដីនៅខេត្តបាត់ដំបង រូបនេះ បានធ្វើការច្រានចោល ដោយអះអាងថា លោកគ្មានអ្នកណាជួយជ្រោមជ្រែងឡើយ គឺអ្វីៗកើតពីការតស៊ូប្រឹងប្រែងដោយកម្លាំងញើសឈាមផ្ទាល់ខ្លួន។
តារាកំព្រាលោកឪពុក តាំងពីទម្ងន់៥ខែ ក្នុងផ្ទៃម្ដាយ រូបនេះ បានឲ្យដឹងថា ”បើខ្ញុំមានវីឡា មាន Lexus LX 570 ទៅ ទើបថាសង្ស័យ ខ្ញុំមានគេជួយឧបត្ថម្ភ តែនេះគ្រាន់តែគ្នាមានឡានធម្មតា សម្រាប់ជិះទៅធ្វើការ និងទិញដីនៅខេត្តបាន១ប្លង់ ខ្ញុំអាចមានសមត្ថភាពទិញវាដោយខ្លួនឯងបាន មិនចាំបាច់មានអ្នកណាជួយទេ។ ប៉ុន្ដែចំពោះរឿងតារាផ្សេងៗទៀតនោះ ខ្ញុំមិនដឹងទេ។ ការងារសិល្បៈជាអាជីពដែលខ្ញុំស្រលាញ់ ហើយយើងចូលសិល្បៈ មិនមែនដើម្បីជាឈ្នាន់ទៅធ្វើអីផ្សេងៗក្នុងផ្លូវមិនល្អនោះទេ។ក្រៅពីការងារសិល្បៈ ខ្ញុំក៏មានការងារនៅក្រុមហ៊ុនមួយផ្សេងទៀតដែរ អ៊ីចឹងហើយយើងមិនពឹងលើសិល្បៈទាំងស្រុងនោះទេ។ ចំណែកការទិញដីនោះជាការពិត ព្រោះខ្ញុំយល់ថា ទិញដីមិនខុសទេ ថ្ងៃក្រោយនឹងអាចចំណេញ”។
តារាសម្ដែងចាន់ស៊ី ស៊ីណាវ៉ាត់ត្រា ដែលទើបតែថត MV បទ Original Songs ៣បទនោះ នៅដើមខែសីហា នេះ អ្នកសម្ដែងរូបនេះនឹងចេញថតបទថ្មីបន្ថែមទៀត បើទោះជាពេលនេះ លោកថាហាក់មានអារម្មណ៍ខ្វល់ខ្វាយដោយសារតែម្ដាយម្នាក់គត់ មានជំងឺត្រូវព្យាបាលយ៉ាងយកចិត្តទុកដាក់ក៏ដោយ។ ចំពោះការថតសម្ដែង MV នាពេលខាងមុខនេះ លោកចាន់ស៊ី សុីណាវ៉ាត់ត្រា បានឲ្យដឹងថា នឹងអាចប៉ះជាមួយ Ido lរបស់ខ្លួនពេញចិត្តជាយូរមកហើយ គឺកញ្ញានី មុនីនាថ ខណៈដែលមានផលិតកម្មមួយចំនួនបានហៅរូបគេឲ្យថតកុនដែរ តែលោកចាន់ស៊ី ថា ខ្លាចមិនមានពេលវេលាគ្រប់គ្រាន់ ទើបមិនទាន់ទទួលថតភាពយន្ដ។
ដោយឡែក ទាក់ទងគូស្នេហ៍វិញ តារាសម្ដែងដែលមានប្រវត្តិកម្សត់ធ្លាប់លក់នំកង ហើយថ្មីៗនេះបានចេញបទចម្រៀងត្រូវជីវិតផ្ទាល់ខ្លួន ”ជាតិក្រោយផ្សងជួបពុកម៉ែ” នេះថា មិនទាន់មានគូស្នេហ៍ឡើយ៕
