ខៀវ ដាឡិច ម្ចាស់បទ “ប្រពន្ធលួចលាក់” របស់ផលិតកម្ម M នោះ ត្រូវបានគេចាត់ទុកថា នាងមានទឹកដមសំឡេងល្អម្នាក់ ក្នុងចំណោមអតីតតារាចម្រៀងរបស់ផលិតកម្ម Rock មុនពេលប្រកាសរំសាយ និងស្វែងរកទ្រនំរៀងៗខ្លួនអស់នោះ។ ប៉ុន្តែ ការជ្រកកោននៅ M របស់ខៀវ ដាឡិច ធ្វើឱ្យស្រីស្រស់មិនសូវមានបទចម្រៀងផ្ទុះនោះទេ ខណៈដែលប្រាក់ចំណូលក៏នៅមានកម្រិត ដោយសារតែមិនសូវបានបង្ហាញមុខតាមឆាកតន្ត្រីធំ ដូចអតីតតារាចម្រៀងរួមក្រុមដែលចូលទៅហង្សមាស ដូចជា នាងសួស វីហ្សា និងផន ស្រីខួច ជាដើមនោះ។
ទោះជាយ៉ាងណា ក្នុងជំនួបផ្ទាល់កន្លងមក នៅប៉ុស្តិ៍ទូរទស្សន៍អាស៊ីអាគ្នេយ៍ តារាចម្រៀងរាងស្វែលតូចច្រឡឹងនេះ បានទទួលស្គាល់ថា នាងមិនសូវបានច្រៀងតាមកម្មវិធីប្រគំតន្ត្រីច្រើនមែន ហើយបទចម្រៀងក៏ចេញមិនសូវគ្រប់គ្រាន់លើទីផ្សារដែរ តែពេលនេះ នាងនៅតែជាតារាចម្រៀងរបស់ផលិតកម្ម M នៅឡើយ ដោយគ្មានគំនិតថា ចង់ទៅណានោះទេ តែនៅពេលខាងមុខ គ្មានអ្នកណាមើលដឹងថា នឹងមានរឿងអ្វីកើតឡើងឡើយ។
អតីតអ្នកចម្រៀងផលិតកម្ម Rock នេះ ហាក់ស្ទាក់ស្ទើរក្នុងចិត្តនៅពេលដែលត្រូវសួរថា ចង់ចូលទៅហង្សមាស ដូចសួស វីសា ឬផន ស្រីខួច ដែរឬអត់នោះ ដោយមើលទៅពេលនេះ នាងមិនទាន់មានសញ្ញាភ្លើងខៀវណាមួយពីថៅកែហង្សមាសឡើយ ខណៈដែលដាឡិច ទទួលស្គាល់ថា ពេលនេះ កម្មវិធីប្រគំតន្ត្រីធំៗ ស្ថិតក្នុងកណ្តាប់ដៃរបស់ក្រុមហ៊ុនហង្សមាសមែន។
គេជឿថា នាងខៀវ ដាឡិច នឹងមានភាពលេចធ្លោជាងនេះជាមិនខាន ប្រសិនបើនាងដាច់កុងត្រានៅ M ហើយមានឱកាសចូលទៅហង្សមាស ដូចអតីតតារាចម្រៀង M នាងសុខ សីឡាលីន, ពេជ្រ សូលីកា និងតារាកូន១ ហ្សូណូ នោះ។ តែនាងដាឡិច ហាក់មិនជ្រួលជ្រើមខ្លាំងចំពោះការចូលទៅទ្រនំធំ ដែលមានអ្នកចម្រៀងឡើងគរជាន់ជើងគ្នាទៅហើយនោះយ៉ាងតក់ក្រហល់នោះទេ ខណៈពេលនេះ នាងបានពន្យាពេលចេញទៅច្រៀងសម្តែងនៅប្រទេសអូស្ត្រាលី ផងដែរ។
ខៀវ ដាឡិច បានព្យាយាមលាក់គូស្នេហ៍ជានិច្ច ដោយថ្ងូរថា អត់សង្សារ តែកន្លងមក គេឃើញតារាចម្រៀង M រូបនេះស្និទ្ធស្នាលប្លែកជាមួយតារាចម្រៀងប្រុស ឈ្មោះ “ឆៃ” ដូចជា ការជិះរថយន្តតែ២នាក់ នៅពេលរាត្រីជាដើម តែនៅពេលសួររឿងនេះ នាងដាឡិច បែរជាថា មិនដឹងឈ្មោះ “ឆៃ” មួយណាទៅវិញ៕
