ក្រៅពីអាជីពចម្រៀងពេជ្រ សោភា បានបន្ថែមមុខរបរក្រៅពីសិល្បបន្ថែមទៀត ដូចជា ការលក់ជើងមាន់ និងឡេតាម Online ជាដើម ដែលរកប្រាក់បង់ថ្លៃសាលារៀនឱ្យក្មួយស្រីរបស់នាងបន្តការសិក្សា ខណៈដែលកាលពីឆ្នាំមុន សោភា ក៏បានទិញម៉ូតូ១គ្រឿង ឱ្យក្មួយស្រីជាការលើកទឹកចិត្ត ដើម្បីឱ្យខិតខំរៀនសូត្រ។ តែការលក់ជើងមាន់ដែលសោភា អះអាងថា ឆ្ងាញ់ណាស់នោះ ត្រូវបានតារាចម្រៀងជើងចាស់ហង្សមាស រូបនេះ អះអាងថា មិនមែនជាមុខរបរផ្ទាល់របស់នាងទេ គឺជាការរកស៊ីរបស់បងស្រីនាង ហើយនាងគ្រាន់តែជួយ Live វីដេអូឱ្យអ្នកគាំទ្រនាងជួយទិញប៉ុណ្ណោះ។ ចំណែកការលក់ផលិតផលរក្សាសម្រស់ឱ្យនៅក្មេងជាងវ័យនោះ គេឃើញសោភា ទើបតែដាក់លក់កាលពីពេលថ្មីៗនេះទេ បន្ទាប់ពីតារាចម្រៀងរួមក្រុម នាងប៉ាច គីមមួយ និងទេព បូព្រឹក្ស បានលក់ផលិតផល Cosmetic នេះ មុនសោភា បន្តិច។
ពេជ្រ សោភា ត្រូវបានគេកោតសរសើរថា នាងជាអ្នកចម្រៀងម្នាក់ដែលបានបាត់បង់ទីផ្សារសិល្បៈម្តងរួចទៅហើយ កាលពីឆ្នាំ២០១៤ និង២០១៦ ដោយពេលនោះ សោភា ច្រៀង១កម្មវិធី ស៊ីថ្លៃត្រឹម១ពាន់ដុល្លារទេ ហើយក៏មិនសូវមានអ្នកហៅច្រៀងដែរ។ ប៉ុន្តែក្រោយលែងប្តីអាណិកជនខ្មែរ នៅអាមេរិក លោកឡៅ ឆលី កាលពីឆ្នាំ២០១៦ នោះមក សោភា ក៏ស្ទុះងើបឡើងវិញ ហើយនៅឆ្នាំ២០១នេះ តម្លៃខ្លួនតារាដុះស្លែនៅហង្សមាស រូបនេះ ឡើស្មើឱក សុគន្ធកញ្ញា គឺច្រៀង១កម្មវិធី ស៊ីថ្លៃ៣ពាន់ដុល្លារ។ ដោយឡែក ការថតស្ពតពាណិជ្ជកម្មវិញ សោភា ឡើងថ្លៃស្មើកំពូលតារាចម្រៀងព្រាប សុវត្ថិ ដែរ គឺការចុះកុងត្រា១ឆ្នាំ លើស្ពតធំមួយ ថ្លៃ៥ម៉ឺនដុល្លារ។
មហាជនបានមើលឃើញថា ពេលនេះ ពេជ្រ សោភា ជោគជ័យតែអាជីពសិល្បៈទេ តែរឿងស្នេហាវិញ នាងនៅតែបរាជ័យ មិនអាចរកបានបុរសល្អម្នាក់ថ្នមបំពេបេះដូងទេ ក្រោយលែងប្តីមក សោភា ងាកទៅសាងស្នេហ៍ “ក្លែងក្លាយ” ជាមួយប្រុសក្មេងរូបសង្ហា លោកឆឹម សក្កដា ហើយពួកគេបង្ហាញភាពផ្អែមល្ហែមស្នេហ៍ដូចមែនទែន រហូតធ្វើឱ្យលោកសក្កដា ល្បីឈ្មោះយ៉ាងរហ័ស ព្រោះតែសារព័ត៌មានច្រើនចុះផ្សាយភ្ជាប់ជាមួយតារាចម្រៀងល្បីរបស់ហង្សមាស រូបនេះ៕
