កូនប្រុសទាំង៣ របស់ព្រាប សុវត្ថិ ប៉ះតារាល្បីថៃ ផ្អើលក្រុមអ្នកគាំទ្រឱបថើប

តារាចម្រៀងវ័យក្មេង៣ដួង របស់ផលិតកម្មរស្មីហង្សមាស ដែលជាកូនកំពូលតារាចម្រៀងព្រាប សុវត្ថិ លោកសុវត្ថិ មុនីនាថ, សុវត្ថិ មុនីនាគ និងសុវត្ថិ សិរីវុឌ្ឍ បានលេចមុខនៅក្នុងកម្មវិធីម្ពោធហាង Cafe Amazon គម្រប់0១០០សាខា កាលពីរសៀលថ្ងៃទី១៩ ខែសីហា ឆ្នាំ២០១៨ ដោយបុរសសង្ហាទាំង៣នាក់នេះ បានប៉ះជាមួយតារាសម្ដែងល្បីល្បាញរបស់ថៃ គឺលោកវៀរសុគន្ធ ឡៈវ៉ាត់ ដែលនាំឲ្យព្រឹត្តិការណ៍នេះទទួលបានការចាប់អារម្មណ៍ខ្លាំងពីសំណាក់អ្នកដើរផ្សារទំនើបអុីអន នេះ មកទស្សនាឡើងណែនណាប់ពេញផ្សារ។

សុវត្ថិ មុនីនាថ ,សុវត្ថិ មុនីនាគ និងសុវត្ថិ សិរីវុឌ្ឍ បាននិយាយស្របគ្នាថា មានមោទនភាពដែលបានចូលរួមច្រៀងសម្ដែងបទចម្រៀងថ្មីៗរបស់ខ្លួន​ក្នុងកម្មវិធីដ៏អស្ចារ្យនេះរបស់ Cafe Amazon នេះ ពិសេសគឺមានការចូលរួមគាំទ្រពីបងប្អូនដែលជាអតិថិជនរបស់អាម៉ាហ្សូន យ៉ាងច្រើនកុះករនេះ។

ដោយឡែក តារាល្បីល្បាញរបស់ថៃ លោកវៀរសុគន្ធ ថៈវ៉ាត់ ដែលជាដៃគូនាងបេឡា នោះ បន្ទាប់ពីច្រៀងសម្ដែងរួម ត្រូវបាន Fan ចាប់ឱបថើបរកតែរើរខ្លួនសឹងមិនចង់រួចឡើយ ហើយលោកបាននិយាយដោយអារម្មណ៍រំភើបថា មិននឹកស្មានថា នៅកម្ពុជា មាន Fan របស់លោកច្រើនយ៉ាងនេះសោះ ពិសេស ប្រទេសកម្ពុជា ពេលនេះមានការអភិវឌ្ឍន៍ច្រើន។

លោកវៀរសុគន្ធ ថៈវ៉ាត់ ក៏បានឲ្យដឹងដែរថា លោកជាអតិថិជនរបស់កាហេ្វអាម៉ាហ្សូន យូរហើយ ហេតុនេះលោកសូមឲ្យសាខាថ្មីទី១០០នេះ បានជោគជ័យ និងមានសាខាថ្មីៗបន្ថែមទៀត។

លោកវៀរសុគន្ធ ថៈវ៉ាត់ ដែលមានការផ្សាយថា លោកជាគូសង្សារស្រីស្អាតបេឡា បានឆ្លើយសំណួរនាងថន លក្ខិណា ថា តើមាននឹកបេឡា អត់ ពេលមកកម្ពុជា នោះ ថា ”ខ្ញុំនឹកបេឡា គ្រប់ពេលវេលាទាំងអស់។ ប៉ុន្ដែខ្ញុំមិនអាចមកទាំង២នាក់បានទេ គឺមកម្ដងៗម្នាក់។ កញ្ញាបេឡា​ គាត់ក៏ធ្លាប់មកកម្ពុជាម្នាក់ឯង អីចឹងខ្ញុំក៏មកម្នាក់ឯងដែរ មិនបាច់មកម្ដងទាំង២ក៏បានដែរ”។

ក្រៅពីកូនប្រុសព្រាប សុវត្ថិ ទាំង៣នាក់ ដែលអង្រួនពេញឆាកតន្ដ្រីនោះ ផ្អើលពេញផ្សារអ៊ីអន សែនសុខ ស្របពេលដែលលោកវៀរសុគន្ធ ថៈវ៉ាត់ ត្រូវ Fan ចោមរោមឱបរកតែដកខ្លួនមិនរួចនោះ ក៏មានការសម្ដែងពីក្រុមរាំមកពីថៃ និងក្រុម Freshie Girls & Boys របស់ក្រុមហ៊ុន BKA ផងដែរ ស្របពេលដែលអ្នកអត្ថាធិប្បាយ គឺនាងថន លក្ខិណា និងលោកទ្រី តារ៉ាវុធ។

លោក Auttapol Rerkpiboon ប្រធានគណៈកម្មការក្រុមប្រឹក្សាភិបាលនៃក្រុមហ៊ុន PTT ចំកាត់ បានថ្លែងថា “ប្រទេសកម្ពុជា ជាទីផ្សារសំខាន់របស់ PTT ហើយកាហ្វេអាម៉ាហ្សូន បានក្លាយជាទីពេញនិយមរបស់ប្រជាជនកម្ពុជា ដែលបើកសាខាដំបូងនៅច្បារអំពៅ ក្នុងឆ្នាំ២០១៣ និងបានពង្រីកសាខាជាបន្ដបន្ទាប់ រហូតដល់ពេលនេះ គម្រប់ទី១០០ នឹងមានគម្រោងពង្រីកចំនួន២២០សាខា នៅឆ្នាំ២០២០ផងដែរ”។

លោកសុធន ឈូធៀន អគ្គនាយកក្រុមហ៊ុន PTT Cambodia Limited បានឲ្យដឹងដែរថា “បច្ចុប្បន្នហាងកាហ្វេអាម៉ាហ្វូន  មាននៅប្រទេសកម្ពុជាទាំងអស់១០០សាខាហើយ ដោយបើកនៅក្នុងស្ថានីយប្រេង PTT ចំនួន៥០សាខា និងក្រៅស្ថានីយPTT ៥០សាខា ដោយមានប្រជាជនកម្ពុជា ជាម្ចាស់ហាងសរុបទាំងអស់ចំនួន៨៣សាខា និងផ្ដល់ការងារជូនប្រជាជនកម្ពុជា ចំនួន១២០០នាក់។ ដើម្បីថ្លែងអំណរគុណដល់អតិថិជនទាំងអស់ ក្រុមហ៊ុនបានធ្វើការផ្ដល់ការផ្សងសំណាងចំពោះអតិថិជន ដោយផ្ដល់នូវទូរស័ព្ទ IPhone X ចំនួន១០០គ្រឿង ដល់អតិថិជនដែលទិញកាហ្វេអាម៉ាហ្សូន រយៈពេល១០០ថ្ងៃ ចាប់ពីថ្ងៃទី២០ ខែសីហា ដល់ថ្ងៃទី២៦ ខែវិច្ឆិកា ឆ្នាំ២០១៨។

គួរកត់សម្គាល់ដែរថា ពេលនេះ កូនព្រាប សុវត្ថិ ទាំង៣ គឺសុវត្ថិ មុនីនាថ , សុវត្ថិ មុនីនាគ និងសុវត្ថិ សិរីវុឌ្ឍ ចាប់ផ្ដើមមានទីផ្សារចម្រៀងហើយ ដែលពួកគេបានលេចមុខជាបន្ដបន្ទាប់ តាមកម្មវិធីសម្ពោធក្រុមហ៊ុនផ្សេងៗ ដោយមានការសម្ដែងរួមគ្នាគួរឲ្យចាប់អារម្មណ៍ ព្រោះតារាវ័យក្មេងទាំង៣ មានក្បាច់រាំយ៉ាងរស់រវើក និងមានការតុបតែងខ្លួនបែបយុវវ័យ ដែលធ្វើឲ្យក្រមុំជ្រួលជ្រើម ពិសេសគឺរូបរាងសង្ហារបស់កូនច្បង ឈ្មោះសុវត្ថិ មុនីនាថ នោះ។ ដោយឡែក ឪពុករបស់ពួកគេ គឺលោកព្រាប សុវត្ថិ បានបន្ថែមអាជីពថ្មី ដោយងាកទៅរកស៊ីពុះដីឡូតិ៍លក់ និងបោះទុនជាច្រើនលានដុល្លារ ទៅលើផ្នែកវិនិយោគអចលនទ្រព្យ៕