តេង លក្ខិណា ឡើងគីឡូខ្លាំង ព្យាយាមលាក់មុខ

តេង លក្ខិណា អស់សិទ្ធិធ្វើជាអ្នកចម្រៀងនៅផលិតកម្ម M ទៀតហើយ ដែលប្អូនប្រុសនាង តេង ឆេកូ ក៏របូតទៅតាមនាងដែរ ទើបធ្វើឱ្យស្រីស្អាតតូចតន់តែលតោលជាមួយរឿងស្នេហ៍ជាមួយថៅកែស្រីផលិតកម្មមួយ មិនទាន់ស្ងប់ផង ស្រាប់តែលេចឮថា មានប្រុសម្នាក់ចេញមុខធានាឱ្យលក្ខិណា រស់នៅដោយមិនចាំបាច់ពឹងលើអាជីពសិល្បៈទេ ហើយនាងនឹងសោយសុខលើគំនរទ្រព្យចាយមិនចេះអស់ឡើយ។

តើតេង លក្ខិណា នឹងអាចដើរតាមគន្លងតារាមួយចំនួនសម្ងំដេកលើទ្រព្យសាងស្នេហ៍ លួចលាក់លែងវិលរកអាជីពចាស់?

ខៀវ សុខារ៉ាវី, ពេជ្រ សិរីរ័ត្ន, ឌុច សុភា, ទាវ មុនីរ័ត្ន, VJ អាណូ, វ៉ាង ស្រីណូ និងវ៉ាន់ សម្ផស្ស ជាដើម សុទ្ធតែជ្រើសផ្លូវលាក់ខ្លួនមួយរយៈហើយលឹបលៗ ស្រាប់តែពួកគេក្លាយទៅជាសេដ្ឋីនីមានវីឡា រថយន្តទំនើប និងដេកសុទ្ធតែខុនដូទៀតផង។

ដោយឡែក នាងតេង លក្ខិណា ដែលកំពុងតែល្បីទាំងអាជីពពិធីការិនីនៅ MyTV និងសម្តែងខារ៉ាអូខេនោះ ស្រាប់តែពេលនេះបានលាក់ខ្លួនពួនអាត្មាដូចតារាមួយចំនួនខាងលើដែរ ប៉ុន្តែមានភាពខុសគ្នាត្រង់ថា លក្ខិណា បែរជាមិនលេចឮថា មានទ្រព្យស្តុកស្តម្ភជាងគេនោះទេ តែបែរជាមានព័ត៌មានថា នាងធ្លាក់ខ្លួនទៅវិញ ព្រោះថា ពេលនេះអស់តំណែងជាតារាចម្រៀងនៅផលិតកម្ម M ហើយថែមទាំងត្រូវគេខ្សឹបខ្សៀវគ្នាពេញចង្កោមអ្នកសិល្បៈថា នាងចូលណាហ្គា វើលដ៍ ជាប្រចាំទៀតផង ដែលធ្វើឱ្យអ្នកខ្លះសង្ស័យថា លក្ខិណា ទៅលេងល្បែង។

ប្រភពបន្ថែមថា ពេលខ្លះ គេឃើញតេង លក្ខិណា ជិះម៉ូតូឌុបចូលណាហ្គា និងពេលខ្លះទៀត នាងជិះរថយន្តមិត្តភក្តិជូនតែមិនមែនជាឡានទំនើបៗដូចមុនឡើយ។

តេង លក្ខិណា បានបិទទូរស័ព្ទ ទើបមិនអាចសុំការបញ្ជាក់ពីនាងបានឡើយកាលពីពេលថ្មីៗនេះ។

ដោយឡែក លោកអែន ឌី តារាដែលធ្លាប់ជិតស្និទ្ធ និងថតកៀកកើយជាមួយតេង លក្ខិណា នោះ និយាយការពារស្រីស្អាតរូបនេះថា “អូបង! ឮថា តេង លក្ខិណា គាត់រាងឡើងគីឡូបន្តិច ទើបមិនទាន់ចេញមុខវិញពេលហ្នឹង តែខ្ញុំក៏មិនដែលបានជួបគាត់ដែរបង។ ខ្ញុំមានបទចម្រៀងចង់ហៅគាត់ថត MV ដែរ តែឮថា គាត់ឡើងគីឡូ មិនទាន់ចង់ថត អ៊ីចឹងក៏មិនដែលបានទាក់ទងទៅគាត់ទេ។ ចំពោះរឿងថា គាត់ចូលណាហ្គា វើលដ៍ អី រឿងហ្នឹងខ្ញុំមិនបានដឹងទេ ព្រោះជារឿងឯកជនរបស់គាត់”។

តេង លក្ខិណា ធ្លាប់ជិះរថយន្តទំនើបៗដ៏កំពូល មានដូចជា Lexus RX 330,BMW និង Range Rover ដែលធ្វើឱ្យអ្នកសិល្បៈរួមអាជីពស្ញប់ស្ញែងពីតារាតូចច្រឡឹងរូបនេះជាខ្លាំង ហើយពួកគេថែមទាំងសរសើរលក្ខិណា ថា ស្អាតមិនចាញ់តារាបរទេសឡើយ ក្រោយពេលដែលនាងបានទៅកែសម្រស់នៅប្រទេសកូរ៉េនោះ។ តែយ៉ាងណា តេង លក្ខិណា ជាតារាមែន តែគង់មានរាសីលេចអណ្តែតដូចមនុស្សធម្មតាដែរ គឺនៅពេលដែលមិត្តភក្តិអ្នកសិល្បៈរួមអាជីពជាមួយនាង កំពុងតែលេងម៉ូដឡាន និងវីឡាប្រជែងគ្នា កាន់តែច្រើននោះ បែរជាមានតែលក្ខិណា ម្នាក់ទេ ដែលធ្លាក់កូដហៅសឹងមិនឮឡើយ ពិសេស គឺការអស់តំណែងព្រមគ្នាទាំងនៅ MyTV និង M នោះ ធ្វើឱ្យស្រីស្អាតម្នាក់នេះព្យាយាមគេចមុខចេញពីមិត្តធ្លាប់រួមអាជីព ហើយតាមរយៈរូបភាពចុងក្រោយនោះ លក្ខិណា ច្រើនតែលេចមុខទៅកម្សាន្តបន្ធូរអារម្មណ៍នៅប្រទេសថៃ យ៉ាងស្រងូតស្រងាត់ ហើយមើលទៅស្រីស្រស់រូបនេះមានគីឡូឡើង ដូចលោកអែន ឌី ថាមែន។

ទោះជាតេង លក្ខិណា ហាក់បាត់កាលីបច្រើននៅឆ្នាំ២០១៨ មែន តែតារាដែលមានមន្តស្នេហ៍មិនធម្មតា រហូតធ្វើឱ្យទាំងស្រីទាំងប្រុសលង់សម្រស់នាងនេះ មានដំណឹងថា នាងកាន់តែត្រូវបានប្រុសៗអ្នកធំតាមស្នេហ៍កាន់តែច្រើនឡើងៗ  ក្រោយពេលដែលនាងលក្ខិណា ផ្តាច់ស្នេហ៍ពីលោកថៅកែស្រីម្នាក់ដោយចម្រូងចម្រាសនោះ។

ប្រភពបានឱ្យដឹងថា មានបុរសអ្នករកស៊ីធំម្នាក់ វ័យ៥០ស្តើង ដែលជិះរថយន្តទំនើបៗគ្រប់ម៉ាក ហើយតារាស្រីៗជាច្រើនតែងស្គាល់លោក ហើយហៅថា “មេៗ” នោះ បានចាំត្រងស្នេហ៍នាងលក្ខិណា ពីថៅកែស្រីផលិតកម្មមួយ ហើយថែមទាំងចង់ជះលុយឱ្យនាងយកទៅកែសម្រស់តាមចិត្តចង់ទៀតផង។ ប៉ុន្តែអ្នកជំនួញដែលសរសើរតេង លក្ខិណា ថាជាតារាស្រីស្អាតដាច់គេនោះ ត្រូវប្រឈមនឹងការប្រជែងស្នេហ៍ជាមួយថៅកែស្រីលក់ពេជ្រម្នាក់នៅម្តុំផ្សារធំថ្មី ហេតុនេះហើយបានជាពេលនេះ លក្ខិណា កាន់តែមានជម្រើសស្នេហ៍កាន់តែច្រើន ទោះជានាងធ្លាក់កូដកេរ្តិ៍ឈ្មោះបន្តិចមែន តែរឿងស្នេហា មិនអាចតារាណាខ្លាំងជាងនាងរឿងមានប្រុស និងស្រីណាតាមស្រលាញ់ច្រើនជាងនាងនោះឡើយ។

មជ្ឈដ្ឋានមហាជនរង់ចាំមើលថា តើតេង  លក្ខិណា នឹងជ្រើសផ្លូវមុខផ្តាច់ខ្លួនពីអាជីពសិល្បៈទាំងស្រុង ដោយផ្គាប់ចិត្តគូស្នេហ៍ដូចតារាល្បីៗមួយចំនួនទៀត ឬក៏អាចវិលត្រឡប់ទៅរកអាជីពសម្តែង និង M ជុំវិញនៅពេលដែលនាងកំពុងប្រឹងសម្រកទម្ងន់ឱ្យស្វែលដូចដើមវិញ នាពេលឆាប់ៗខាងមុខនេះ?៕