តារាចម្រៀង និងសម្តែង នាងឆ័យលី ដាឡែន បានណាត់គ្នាជាមួយតារាសម្តែងលោកចាន់ស៊ី ណាវ៉ាត់ត្រា និងតារាមួយចំនួនទៀត ដើម្បីបង្កើតក្រុមសប្បុរសធម៌ ក្នុងគំរោងធ្វើបុណ្យចែកជាស្បៀងអាហារ, សម្លៀកបំពាក់, ភួយ និងរបស់របរផ្សេងៗទៀតជូនដល់ចាស់ៗ ដែលអត់ផ្ទះសម្បែងនៅ ដែលសម្រាកតាមផ្ទះគេ ឬតាមចិញ្ចើមថ្នល់។
កម្មវិធីសប្បុរសធម៌នេះ ឆ័យលី ដាឡែន បានប្រកូកប្រកាសស្វែងរកអ្នកឧបត្ថម្ភគាំទ្រ ដើម្បីឱ្យនាងមានលទ្ធភាពទិញជាសម្ភារៈទាំងនោះ ទៅចែកដល់ទុរគតជនដែលស្នាក់នៅគ្មានទីពឹងនៅរាជធានីភ្នំពេញ នេះ ដោយនាងបានកំណត់យកថ្ងៃទី០៩ ខែកញ្ញា ឆ្នាំ២០១៨ នេះ សម្រាប់ពាំនាំយកសម្ភារៈទាំងនោះ ទៅចែកដល់ដៃចាស់ៗជរា ដែលធ្វើចំណាកស្រុក គ្មានកន្លែងស្នាក់នៅពឹងលើសំយ៉ាបផ្ទះគេ និងយកចិញ្ចើមថ្នល់ជាកន្លែងគេងនោះ។
ដោយឡែក លោកចាន់ស៊ី ណាវ៉ាត់ត្រា បានអះអាងថា លោកពេញចិត្តក្នុងការធ្វើសប្បុរសធម៌ជាមួយរៀមច្បង ឆ័យលី ដាឡែន និងតារាផ្សេងៗទៀតដែលចូលរួម ព្រោះថា កន្លងមក លោកឃើញលោកយាយនិងលោកតា ដែលគេងតាមសំយ៉ាបផ្ទះគេនោះ គឺរន្ធត់ចិត្ត និងសែនអាណិតជាពន់ពេក ហើយពេលនេះ លោកអំពាវនាវឱ្យសប្បុរសជនទាំងឡាយជួយគាំទ្រ និងផ្តល់ថវិកាដល់កម្មវិធីសប្បុរសធម៌នេះផង។
ឆ័យលី ដាឡែន និងចាន់ស៊ី ណាវ៉ាត់ត្រា មានស្រុកកំណើតនៅខេត្តបាត់ដំបង ដូចគ្នាតែអ្នកទាំង២ មិនទាន់បានសម្តែង MV និងភាពយន្តរួមគ្នាឡើយ ទើបតែពេលនេះបានចាប់ដៃគ្នាដំបូង តាមរយៈការបង្កើតកម្មវិធីសប្បុរសធម៌ ចែកអាហារ និងសម្ភារៈផ្សេងៗទៀត នៅរាជធានីភ្នំពេញ ដែលភាគច្រើនគេឃើញលោកតាធាក់ស៊ីក្លូ ច្រើនតែគេងនៅលើស៊ីក្លូតាមចិញ្ចើមផ្លូវ នៅពេលយប់អធ្រាត្រនោះ ទើបធ្វើឱ្យពួកគេបង្កើតមូលនិធិនេះឡើង។
នេះជាកម្មវិធីសប្បុរសធម៌ និងជាគំរូដ៏ល្អមួយសម្រាប់តារាសិល្បៈ ក្នុងការចែករំលែកអាហារដល់ជនទីទាល់ក្រ ដែលមកផ្ញើវាសនានៅរាជធានីភ្នំពេញ ហើយគេជឿថា នឹងមានការគាំទ្រពីមហាជនជាមិនខានឡើយ៕
