អាមេរិក៖អ្នកនាងអម្ពរ ទេវី បានប្រារពខួបកំណើតគម្រប់អាយុ៥១ឆ្នាំកាលពីថ្ងៃទី១៧ខែកក្កដាឆ្នាំ២០២១ ដោយនាងទទួលបានសារពីអ្នកគាំទ្រជាច្រើនជូនពរឲ្យនាងមានសុខភាពល្អនិងសម្រស់នៅតែស្រស់ស្អាតខណៈដែលស្វាមីថ្មីនាងដែលមានអាខោនហ្វេសបុកថាPauly Hap នោះបានបង្ហោះរូបភាពផ្អែមល្ហែមជាមួយញអ្នកនាងទេវី និងថារីករាយថ្ងៃខួបកំណើតប្រពន្ធដ៍អស្ចារ្យរបស់លោក។
ដោយឡែកអ្នកនាងកែវ កល្យាណ ដែលធ្លាប់រួមអាជីពជាមួយអ្នកនាងអម្ពរ ទេវី កាលពីឆ្នាំ១៩៨៧ ដល់២០០១នោះក៍បានផ្ញើរសារជូនពរអ្នកនាងអម្ពរ ទេវី នៅថ្ងៃពិសេសរបស់នាងដែរទើបធ្វើឲ្យអតីតកំពូលតារាសម្ដែងរូបនេះភ្ញាក់ផ្អើលនិងរីករាយជាខ្លាំង។អ្នកនាងកែវ កល្យាណ បានផ្ញើរសារទៅអ្នកនាងអម្ពរ ទេវី ថា”យើងសូមជូនពរ ថ្ងៃខួបកំណើតពួកម៉ាកអម្ពរ ទេវី សូមឲ្យពួកម៉ាកមានសម្រស់ស្អាតជានិច្ច មានក្ដីសុខក្នុងក្រុមគ្រួសារឲ្យប្ដីកាន់តែស្រលាញ់ថ្នាក់ថ្នមមើលថែរ រកស៊ីកាន់តែមានលុយច្រើនៗជាពិសេសមានសុខភាពល្អ ជៀសផុតជំងឺកូវីដចង្រៃនេះ”។
អ្នកនាងអម្ពរ ទេវី បានតបសារទៅអ្នកនាងកែវ កល្យាណ ថា”អរគុណ សម្លាញ់កែវ កល្យាណ ដែលនៅតែនឹករលឹកដល់ខ្ញុំ ថ្ងៃនេះខ្ញុំទេវី ចង់ប្រាប់ថា”ស្រលាញ់ពេញបេះដូង ស្រលាញ់ខ្លាំងណាស់”។
អម្ពរ ទេវី បានរៀបការជាមួយលោកពេជ្រ ភិរុណ កាលពីខែតុលាឆ្នាំ១៩៩២ ដោយទទួលបានកូន២នាក់កូនទី១ប្រុសឈ្មោះភិរុណ ឥទ្រ្ទបុត្រ និងកូនទី២ស្រីឈ្មោះភិរុណ លក្ស្ញីទេវី ហើយបានចែកផ្លូវគ្នាជាង១០ឆ្នាំមកហើយដែលអ្នកនាងអម្ពរ ទេវី ជ្រើសរើសគូស្នេហ៍ថ្មីជាបុរសអាណិកជនខ្មែរនៅអាមេរិកនិងទទួលបានកូនស្រីម្នាក់ទៀត។
ដោយឡែកលោកភិរុណ គ្មានគម្រោងយកប្រពន្ធថ្មីនោះទេតែលោកបានបន្ដរាប់អានគ្នាជាមួយអតីតប្រពន្ធដូចបងប្អូនបង្កើតដូចជាអំឡុងពេលដែលអ្នកនាងទេវី វិលមកថតភាពយន្ដឲ្យអ្នកស្រីពាន់ ផួងបុប្ផា “ទឹកចិត្តម្ដាយសម័យថ្មី”កាលពីឆ្នាំ២០១៦ នោះលោកភិរុណ បានសម្រិតសម្រាំងកាត់សម្លៀកបំពាក់ជូនភរិយាជិត១០កំបផ្លេរឯណ្ណោះដើម្បីថតឲ្យស្អាត។លោកភិរុណ ដែលមានអាយុ៦៧ឆ្នាំទៅហើយនោះធ្លាប់ប្រាប់អ្នកយកព័តមានយើងថាលោកសុខចិត្តលះបង់និងធ្វើអ្វីៗគ្រប់បែបយ៉ាងទាំងអស់ដើម្បីឲ្យតែកូនៗមានអនាគតល្អ៕
