តារាចម្រៀងខេម បាននាំកំពូលស្នេហ៍អ្នកនាងស្រីកា ទៅដើរលេងនៅក្រៅស្រុករយៈពេលជិត២ខែទៅហើយនឹងមិនទាន់កំណត់ថ្ងៃវិលវិញនោះទេ។តំណើរកម្សាន្ដរបស់លោកប៉ុន សុណារិន ហៅខេម ពេលនេះឈានទៅដល់៣ប្រទេសទៅហើយគឺបារាំងដែលជាទឹកដីទី២របស់អ្នកនាងស្រីកា ហើយអ្នកទាំង២បានដើរលេងជាច្រើនថ្ងៃនៅទីក្រុងប៉ារីសក្នុងនោះមានទាំងការទស្សនាដោយផ្ទាល់ប្រកួតរបស់ក្រុមParis Saint – Germain ផងដែរ។
ដោយឡែកថ្មីៗនេះខេម បានដឹកដៃអ្នកនាងកា ទៅកម្សាន្ដបង្ហួសដល់ប្រទេសអាឡឺម៉ង់ និងស្វីសទៀតផង ដែលភាពសប្បាយរីករាយជិត២ខែនេះប្រាកដជាធ្វើឲ្យចំណងស្នេហាខេម និងស្រីកា កាន់តែរឹងមាំជាងនេះថែមទៀតជាមិនខានបន្ទាប់ពីថ្មីៗនេះគេសង្ស័យថាលោកសុណារិន ហៅខេម មានកូនប្រុសម្នាក់អាយុ២ឆ្នាំទៅហើយជាមួយអ្នកនាងកា ព្រោះសុខៗខេម បានទម្លាយរូបថតក្មេងប្រុសម្នាក់ក្នុងថ្ងៃខួបកំណើតដែលមើលទៅក្មេងនោះមុខមាត់ស្រៀងគ្នានិងខេម ។
តាមរយៈការកំពុងជក់តំណើរនៅក្រៅស្រុកនេះបញ្ជាក់ថាខេម ឆ្នាំនេះគ្មានបានថតបទថ្មីៗសម្រាប់ពិធីបុណ្យភ្ជុំបិណ្ឌនោះទេហើយដោយសារតែកំពុងរីករាយជាមួយប្រពន្ធខ្លាំងពេកខេម មិនទាន់ចង់វិលវិញឆាប់ៗឡើយ។តែយ៉ាងណាក្នុងជំនួបកន្លងមកខេម ថាជារៀងរាល់ឆ្នាំលោកតែងតែមានតំណើរកម្សាន្ដនៅក្រៅស្រុក១ឆ្នាំម្ដងដែលមានរយៈពេល១ខែឬលើសនេះតិចតួច។ចំពោះចំណងស្នេហាជាមួយអ្នកនាងកា វិញខេម ថាបានភ្ជាប់ស្នេហ៍នេះជាង៥ឆ្នាំទៅហើយតែលោកមិនទាន់ហ៊ានកំណត់ថ្ងៃរៀបការឡើយ។
ខេម មិនសូវមានភាពលេចធ្លោខ្លាំងដូចកាលនៅថោន ឡើយអំឡុងពេលដែលតារាចម្រៀងសំនៀងស្អករូបនេះបានទៅជ្រកនៅGalaxyជាង១ឆ្នាំមកនេះព្រោះកំពូលតារាចម្រៀងព្រាប សុវត្ថិ នៅតែមានឥទ្ធិពលខ្លាំងជាងទើបខេម ធ្លោយមាត់និយាយថាអ្នកខ្លះនិយាយថារូបលោកចាត់ទុកលោកព្រាប សុវត្ថិ ជាឆ្អឹងទទឹងក តែតាមពិតគ្មានរឿងបែបនោះឡើយ។តាមព័តមានថាខេម មានប្រាក់ខែបើកនៅGalaxy ជារៀងរាល់ខែ ហេតុនេះហើយទោះជាគ្មានConcerts ច្រៀងនៅខេត្តដូចមុន ឬលោកទៅដើរលេងក្រៅស្រុកប៉ុន្មានខែក៍នៅតែទទួលបានប្រាក់ជាប្រចាំខែតាមចំនួនដែលបានចុះកុងត្រានោះដែរ។ប៉ុន្ដែនៅរដូវកូវីដនេះខេម ក៍ប្រឈមខាតលុយធំដែរព្រោះតែហាងផឹកស៊ីដែលលោកបានបើកនៅក្បែរក្លោងទ្វារវត្តសំរោងអណ្ដែតអស់លុយជាង២០ម៉ឺនដុល្លារនោះតំណើរការមិនរលូនឡើយ ទើបលោកសុណារិន នាំប្រពន្ធទៅលំហែអារម្មណ៍នៅក្រៅស្រុកលើកនេះយូថ្ងៃជាងទៅលើកមុនៗ៕