តារាចម្រៀងដួង វីរៈសិទ្ធ មិនបានសម្ដែងក្ដីបារម្ភថាកេរ្ដិ៍ឈ្មោះរបស់លោកមានការប្រែប្រួលប្រឈមធ្លាក់ចុះក្រោយចេញពីផលិតកម្មធំហង្សមាសទៅជ្រកនៅទ្រនុំថ្មីរាម នោះឡើយដោយលោកយល់ថាទោះជានៅឬចេញពីហង្សមាសគឺធម្មតាដូចមុនដដែលព្រោះនៅផលិតកម្មចាស់ឬថ្មីលោកក៍នៅតែបន្ដធ្វើទំនុកច្រៀងនិងMelody ដោយខ្លួនឯង។ប៉ុន្ដែលោកថាពេលដែលលោកឈនៅផលិតកម្មរាម នេះបើប៉ុស្ដិ៍ទូរទស្សន៍ហង្សមាសហៅឡើងច្រៀងគឺលោកនឹងទៅច្រៀងសម្ដែងដូចមុន ព្រោះមុនលោកចេញបានជម្រាបលាថៅកែត្រឹមត្រូវគ្មានរឿងវិវាទជាមួយគ្នាឡើយ។
ដួង វីរៈសិទ្ធ បានចូលរាម ជិត៧ខែទៅហើយនិងក្លាយទៅជាដៃគូរបស់តារាចម្រៀងសំនៀងផ្អែមមាស សុខសោភា ព្រមទាំងនិពន្ធបទចម្រៀងឲ្យសោភា ច្រៀងទៀតផង។អតីតតារាហង្សមាសរូបនេះថាលោកនៅមិនទាន់សម្រេចក្ដីប្រាថ្នាធំនោះទេ ព្រោះក្ដីស្រម៉ៃចង់បើកហាងរក្សារសម្រស់ផ្ទាល់ខ្លួននៅពេលខាងមុខនេះ តែគម្រោងនេះមិនទាន់ចេញជារូបរាងបានឆាប់ៗនេះឡើយព្រោះត្រូវការពេលវេលានិងដើមទុន។យ៉ាងណាលោកថាពេលនេះក៍ចាប់ផ្ដើមចេញលក់ផលិតដូចរៀមច្បងមាស សុខសោភា និងតារាផ្សេងៗទៀតផង ដោយសាររដូវកូវីដនេះមិនសូវរវល់ជាមួយការងារសិល្បៈច្រើនឡើយ។
តាមរយៈការប្រឹងសន្សំលុយដើម្បីបើកហាងលក់ផលិតផលផ្ទាល់ខ្លួននោះបញ្ជាក់ថាដួង វីរៈសិទ្ធ កំពុងតែដើរតាមផ្លូវមាស សុខសោភា ពោលគឺទៅរាម ដើម្បីច្រៀងផងរកស៊ីផង ហើយគេជឿរថាមិនយូទេវីរៈសិទ្ធ នឹងសម្រេចក្ដីបំណងនេះជាមិនខានក្រោមការជួយជ្រោមជ្រែងពីសំណាក់ថៅកែស្រី ព្រោះលោកជាតារាចម្រៀងស្នូលរបស់ផលិតកម្មនេះជាមួយមាស សុខសោភា ។
ដោយឡែកមហាជនវិញមើលឃើញថាលោកម៉ម វាសនា ហៅដួង វីរៈសិទ្ធ ជាអ្នកចម្រៀងវ័យក្មេងដែលមានសម្ថភាពអាចនិពន្ធទំនុកច្រៀងនិងMelodyនិងMixបានដោយខ្លួនឯង ហេតុនេះហើយឱកាសនៃការសាងស្នាដៃនៅរាម ស្ថិតនៅលើកណ្ដាប់ដៃលោកគ្រប់ពេលហើយការចាប់ដៃជាមួយតារាចម្រៀងជើងខ្លាំងមាស សុខសោភា នោះប្រាកដជាធ្វើឲ្យអតីតម្ចាស់ពានI Am A Singer Cambodia រដូវកាលទី១រូបនេះនឹងមានទីផ្សារទូលាយជាងមុនជាមិនខានព្រោះពេលនេះវីរៈសិទ្ធ គឺជាតួឯក ដែលខុសពីនៅហង្សមាសលោកបានត្រឹមធ្វើជាតួរងដោយសារតែខេមរៈ សិរីមន្ដ និងឱក សុគន្ធកញ្ញា គឺជាតួឯក៕
