ពេជ្រ សោភា បានជួយប្រុសក្មេងងួន ចាន់ដេវីត និងStep ល្បីក្នុងអាជីពចម្រៀងបានដូចបំណងនៅពេលដែលពួកគេចាប់ដៃគូច្រៀងជាមួយនាង។ប៉ុន្ដែសម្រាប់សង្សារបណ្ដូលចិត្តរបស់សោភា គឺប្រុសក្មេងរូបសង្ហារឆឹម សក្កដា ដែលក្លាយទៅជាតារាចម្រៀងថោន ជាង១ឆ្នាំទៅហើយនោះបែជានៅទ្រឹងមិនមានសន្ទុះនោះទេហើយសោភា ក៍ធ្វើព្រងើយកន្ដើយមិនព្រមលើកសង្សារឲ្យល្បីដែរឡើយ។
តើហេតុអ្វីបានជាពេជ្រ សោភា មិនព្រមជួយសង្សារឲ្យល្បីក្នុងអាជីពចម្រៀងនៅថោន?
ពេជ្រ សោភា ធ្លាប់ប្រាប់អ្នកយកព័តមានយើងថាសង្សារនាងលោកឆឹម សក្កដា មិនត្រឹមតែជាតារាសម្ដែងដ៍មានទេពកោសល្យម្នាក់នោះទេ តែទឹកដមសម្លេងអាចធ្វើជាអ្នកចម្រៀងអាជីពបាន។យ៉ាងណានាងថាគ្មានបំណងអន្ដរាគមន៍ឲ្យលោកសក្កដា ចូលហង្សមាសដូចដែលនាងធ្លាប់ធានារលោកងួន ចាន់ដេវីដ នោះឡើយ។
ការតាំងចិត្តបែបនេះរបស់ពេជ្រ សោភា គឺមិនត្រឹមតែនាងមិនអូសទាញឆឹម សក្កដា បានចូលច្រៀងនៅហង្សមាសនោះទេ ប៉ុន្ដែពេលដែលលោកសក្កដា ងាកទៅចូលថោននោះនាងក៍មិនជួយជ្រោមជ្រែងឲ្យសង្សារបានល្បីតាមរយៈការជួយធ្វើបទចម្រៀងឲ្យនោះឡើយ។ចំណែកលោកសក្កដា វិញធ្លាប់និយាយថាមានFanមួយចំនួនសួរលោកថាម៉េចបានមិនចូលហង្សមាសដូចគ្នា(សោភា)ដែរទៅ?ម៉េចច្រៀងបែកគ្នាអីចឹង?លោកសក្កដា ទទួលស្គាល់ថាទោះជាសោភា មិនដែលហុចបទចម្រៀងឲ្យលោកច្រៀងក្ដី ប៉ុន្ដែនាងក៍ជាអ្នកនៅពីក្រោយខ្នងឬឲ្យដំបូន្មានលោកល្អៗជាច្រើនទាក់ទងការចាប់អាជីពជាអ្នកចម្រៀងម្នាក់…។សោភា មិនត្រឹមតែជាទីផ្សារប្រឹក្សារផ្នែកចម្រៀងរបស់លោកសក្កដា យ៉ាងសម្ងាត់នោះទេ ប៉ុន្ដែនាងក៍ធ្លាប់ខ្សឹបដាក់ត្រចៀកលោកសក្កដា ដែរថា”កុំអាលគិតគូចង់រៀបការអី ចាំជោគជ័យសិន”។ពាក្យទាំងនេះធ្វើឲ្យលោកសក្កដា ស្ងប់ចិត្តខ្លះរឿងដែលលោករំអុកសោភា ចង់រៀបការនៅឆ្នាំ២០២២ ខាងមុខនេះ តែសោភា គ្មានអារម្មណ៍រំភើបនិងសំណើរនោះហើយថែមទាំងគ្មានចម្លើយតបឡើយ។
ពេជ្រ សោភា ជាតារាចម្រៀងម្នាក់ដែលមានឧបករណ៍តន្រ្ដីនៅផ្ទះរបស់នាងជាច្រើនមុខ ហើយនាងមានStudioថតបទចម្រៀងដោយខ្លួនឯងទៀតផងដែលនៅរដូវកូវីដនេះនាងថាភាគច្រើនធ្វើការងារសិល្បៈពីផ្ទះទៅព្រោះមិនចង់ឲ្យមានការជួបជុំគ្នាច្រើននៅក្រុមហ៊ុន។តារាចម្រៀងដែលចេះនិពន្ធទំនុកច្រៀងនិងMelody ដោយខ្លួនឯងនេះថាក្នុង១យប់នាងអាចសរសេរបទចម្រៀងបាន២បទ ហើយនៅរដូវកូវីដនេះនាងសល់បទក្នុងដៃដែលធ្វើរួចតែមិនចង់ចេញមានដល់ទៅជិត៣០បទឯណ្ណោះ។សោភា ថាតាមទស្សនៈរបស់នាងនៅរដូវកូវីដនេះគ្មានតារាណាល្បីជាងអ្នកណាទេគឺស្ងាត់ដូចតែគ្នា។ម្យាងទៀតនាងយល់ថាបើមានបទចម្រៀងផ្ទុះក៍មិនដឹងយកទៅច្រៀងនៅឯណាដែរព្រោះតែConcertsធំៗតាមខេត្តបឹទអស់ទៅហើយអីចឹងនាងមានតែផ្អឹបទុកមួយរយៈសិនតែអាចចេញ១ៗកុំឲ្យស្ងាត់ពេក។
ពេជ្រ សោភា ស្ថិតក្នុងចំណោមតារាដែលស្នេហាតែប្រុសក្មេងៗមានដូចជានាងប៉ាច គីមមួយ,រ៉ាប៊ី ,សុខ សោម៉ាវត្តី និងហ៊ិន ច័ន្ទនីរ័ត្ន ជាដើម។ក្រោយសោភា លែងប្ដីអាណិកជនខ្មែរនៅអាមេរិកលោកឡៅ ឆលី កាលពីឆ្នា២០១៦ នោះក្នុងជីវិតជាស្រ្ដីមេម៉ាយជាង៤ឆ្នាំនេះសោភា ថាជីវិតនាងរស់នៅពោពេញទៅដោយសិទ្ធិសេរីភាពគ្មានអ្នកណាតាមហួងហែងឡើយ។នាងយល់ឃើញខុសពីស្រី្ដមួយចំនួនដែលខ្លាចរឿងលែងប្ដីនោះដោយថាមេម៉ាយមានអីមិនល្អទៅ?មេម៉ាយស្រួលគ្មានអ្នកណារំខានទេ…។
គេកត់សម្គាល់ថានៅឆ្នាំ២០២១នេះពេជ្រ សោភា ស្ថិតក្នុងចំណោមតារាដែលមានទ្រព្យច្រើនក្រោយនាងចាប់ផ្ដើមលេងខ្លួនតាមរយៈការជិះរថយន្ដទំនើបៗមានដូចជាMercedes ,Bmw ,Porsche ,Audi និងRange Rover ជាដើម ស្របពេលដែលគ្រាន់តែនាឡិការដៃ១គ្រឿងសោភា ហ៊ានពាក់តម្លៃស្មើតម្លៃផ្ទះ១ល្វែងដូចជាម៉ាកRichard Mille និងRolex។ការលេងខ្លួនជាមួយសម្ភារៈថ្លៃៗនេះធ្វើឲ្យគេសង្ស័យថាសោភា មានជម្រើសស្នេហ៍ផ្សេងពីប្រុសក្មេងសក្កដា តែសោភា នៅតែប្រកាន់ជំហថាស្នេហានាងនិងសក្កដា មានចាស់ទុំទាំងសងខាងដឹងឮអស់ហើយមិនមែនលំៗទេ…៕ ហ៊ឹម វិចិត្រ
