ភ្នំពេញ៖អ្នកនាងស្រេង សុកាន់ដា ហៅខ្ញុង ដែលកំពុងតែឈឺក្បាលរឿងលុយតុងទីនយ៉ាងចម្រូងសម្រាសជាមួយអ្នកនាងសឿ សុធារ៉ា នោះស្រាប់តែថ្មីៗនេះសុកាន់ដា ត្រូវបានបុរសម្នាក់ដែលមានហ្វេសបុកឈ្មោះអឹម វុត្ថាត បង្ហោះរូបនាងនិងប្ដីនាយកៃដ ដោយភ្ជាប់ជាមួយលិខិតកិច្ចសន្យាខ្ចីលុយ២សន្លឹកផងដោយប្រុសនោះចោទខ្ញុង និងស្វាមីខ្ចីលុយហើយមិនព្រមសងតាមការកំណត់។បុរសដែលប្រើហ្វេសបុកឈ្មោះអឹម វុត្ថាត នោះថែមទាំងបានព្រមានអ្នកនាងខ្ញុង និងប្ដីថាលោកបានទុកឱកាសជាច្រើនលើកច្រើនសារមកហើយ តែរហូតមកដល់ពេលនេះអ្នកទាំង២នៅតែគ្មានឆន្ទៈក្នុងការដោះស្រាយលុយដែលបានខ្ចីចំនួន៣ម៉ឺនដុល្លារនោះទេ តែលោកមិនចង់មានរឿងនាំតែវែងឆ្ងាយនោះទេគឺសូមឲ្យតែអ្នកនាងខ្ញុង និងប្ដីព្រមសងលុយគឺចប់…។
អ្នកយកព័តមានយើងបានទូរស័ព្ទទៅអ្នកនាងស្រេង សុកាន់ដា ហៅខ្ញុង កាលពីរសៀលថ្ងៃទី១៥ខែតុលា ហើយត្រូវបានអតីតតារាកំប្លែងCtnរូបនេះនិយាយយ៉ាងខ្លីថាអ្នកនាងបានធ្វើការLive ពីរឿងរ៉ាវទាំងនេះហើយ។ប៉ុន្ដែនៅពេលសួរថាអ្នកនាងខ្ញុង បំភ្លឺរឿងនេះនៅពេលណាអ្នកនាងសុកាន់ដា បែជាថាបើនាងចង់បកស្រាយគឺអាចLiveដោយខ្លួនឯងមិនចាំបាច់បំភ្លឺតាមសារព័តមាននោះទេ។អ្នកនាងសុកាន់ដា ថាសម័យនេះអ្នកណាក៍ជួបរឿងដូចនាងដែរ គេចមិនផុតទេ អីចឹងក្រោយមានគេចោទប្រកាន់មកលើរូបនាងបែបនេះមកនាងថាមិនបារម្ភរឿងថាប៉ៈពាល់ដល់កេរ្ដិ៍ឈ្មោះឬកិត្តិយសឡើយ។តែមុនផ្ដាច់ទូរស័ព្ទអ្នកនាងខ្ញុង ថាសុំអធ្យាស្រ័យដែលនាងកំពុងតែជាប់រវល់ជាមួយភ្ញៀវមិនអាចនិយាយរឿងនេះបានជាមួយអ្នកកាសែត។
បើតាមលិខិតកិច្ចសន្យាខ្ចីលុយគឺពិតមានការយល់ព្រមតាមល័ក្ខខណ្ឌបានចែងរហូតដល់ទៅ៦ប្រការឯណ្ណោះក្នុងនោះដែរក៍មានការផ្ដិតមេរដៃពីភាគីទាំង៣រវាងអ្នកនាងស្រេង សុកាន់ដា ,លោកអ៊ុំក្សត្រា ដែលជាភាគី”ខ”ជាអ្នកជំពាក់ប្រាក់និងភាគី”ក”ជាម្ចាស់ប្រាក់លោកអឹម វុត្ថាត ពមទាំងលោកមេធារីចៅ តុលា ដែលបានធ្វើកិច្ចសន្យាកាលពីថ្ងៃទី៣ខែកុម្ភៈឆ្នាំ២០២១ ។ប៉ុន្ដែពេលនេះបែជាលោកអឹម វុត្ថាត បានទម្លាយថាអ្នកនាងខ្ញុង និងស្វាមីមិនព្រមសងលុយតាមការសន្យាព្រមទាំងទម្លាយរឿងនេះតាមបណ្ដាញសង្គមធ្វើឲ្យមហាជនភ្ញាក់ផ្អើលទៅវិញ។
លោកអ៊ុំ ក្សត្រា ហៅនាយកៃដ បានប្រាប់យ៉ាងខ្លីតាមទូរស័ព្ទនៅថ្ងៃដដែលនេះថារឿងនោះមិនមែនជារឿងធំដុំនោះទេ។លោកថាដោយសារតែលោកកំពុងតែជាប់រវល់ជាមួយភ្ញៀវទើបលោកមិនអាចនិយាយរឿងរ៉ាវនេះបានទេហើយលោកបានបង្វែរឲ្យអ្នកយកព័តមានទៅសួរព័តមាននេះទៅភរិយាលោកឬទៅម្ចាស់ប្រាក់លោកអឹម វុត្ថាត វិញ។ដោយឡែកលោកអឹម វត្ថាត អ្នកយកព័តមានយើងមិនអាចទាក់ទងបានទេព្រោះគ្មានលេខ។
គូរបញ្ជាក់ថាមុនត្រូវប្រុសម្នាក់ឈ្មោះអឹម វុត្ថាត តាមទារលុយផ្អើលពេញហ្វេសបុកនេះអ្នកនាងខ្ញុង ក៍មានរឿងលុយតុងទីនជាមួយអ្នកនាងសឿ សុធារ៉ា យ៉ាងរញ៉េរញៃផងដែរ។ចំណែកនៅលើបណ្ដាញសង្គមរបស់អ្នកនាងស្រេង សុកាន់ដា ថ្ងៃទី១៥ខែតុលានេះបានបង្ហោះសារថា”មានតែពាក្យថាខំ ព្រោះពេលយើងជួបទុក្ខលំបាកអស់ប្រយោជន៍ ក៍លែងមានតម្លៃ ហើយក៍លែងមានអ្នកស្គាល់ ព្រោះសម័យនេះគេរាប់អានតែអ្នកមានប៉ុណ្ណោះ”។
គូរំលឹកថាអ្នកនាងស្រេង សុកាន់ដា ហៅខ្ញុង ដែលជាមេម៉ាយកូន២បានដឹកដៃលោកអ៊ុំ ក្សត្រា ហៅនាយកៃដ ដែលជាពោះម៉ាយរៀបការកាលពីថ្ងៃទី៨ខែសីហាឆ្នាំ២០១៩ ហើយនាងបានសម្រាលកូនប្រុសថ្ងៃទី១៩ខែមិថុនាឆ្នាំ២០២០ ដោយដាក់ឈ្មោះថាត្រា សិរីមង្គល ។ក្រោយខ្ញុង-កៃដ ចាប់ដៃគ្នាអ្នកទាំង២បានងាកទៅរកស៊ីផ្នែកអចលនទ្រព្យ ហើយខ្ញុង ក៍ជាអ្នកលក់តាមOnline ម្នាក់ផងដែរ។ប៉ុន្ដែនៅចុងខែកក្កដាឆ្នាំ២០២១ ខ្ញុងបែជាប្រកាសលាឈប់ពីអាជីពកំប្លែងនៅCtnទៅវិញទើបធ្វើឲ្យអ្នកគាំទ្រនាង មានការសោកសា្ដយជាខ្លាំង។នាយកៃដ ធ្លាប់ប្រាប់ថាទោះជាប្រពន្ធលោកចាកចេញពីអាជីពកំប្លែងនៅCtnមែន តែមិនមែនផ្ដាច់ខ្លួនទាំងស្រុងពីសិល្បៈនោះទេ ។ចំណែករូបនាយ វិញ មានការមមាញឹកខ្លាំងខាងលក់ដីធ្លីមុនផ្ទុះកូវីដ តែពេលនេះមិនសូវកាក់កបឡើយ ប៉ុន្ដែនៅបន្ដហើយគាំទ្រមុខរបរភរិយាតាមOnline។នៅពេលដែលខ្ញុង និងស្វាមីមានការងាររកស៊ីផ្សេងៗគ្នាដែលមើលទៅលុយចូលរាល់ថ្ងៃ បែជាត្រូវគេតាមទារលុយនោះធ្វើឲ្យមហាជនស្រឡាំងកាំង តែនាយកៃដ បែជាថាគ្មានអ្វីធំដុំ ខណៈខ្ញុង ថាអ្នកណាក៍ធ្លាប់ជួបរឿងនេះដែរ៕
