ភ្នំពេញ ៖ បុរសម្នាក់ ជាអ្នកខ្វៃជ្រូកលក់ បានទៅតថ្លៃតាក់ស៊ីជិះ ទៅស្រុកកំណើត ឯខេត្តកំពត លុះឆ្លៀតពេលតៃកុងតាក់ស៊ីរវល់ហៅម៉ូយ ស្រាប់តែបែកគំនិត បើករថយន្តនាំទាំងម៉ូយជិះក្នុងរថយន្តតាក់ស៊ីនោះទៅជាមួយ ធ្វើឱ្យម្ចាស់រថយន្តហៅម៉ូតូឌុបជិះ ដេញតាមចាប់ក្របួចជាប់ និងផ្អើលដល់ប្រជាពលរដ្ឋ ផ្ទុះហិង្សា ម្នាក់១ដៃ១ជើង ឡើងទ្រមខ្លួន ទើបរាយការណ៍ប្រាប់សមត្ថកិច្ច មកយកទៅចាត់ការតាមច្បាប់។
ហេតុការណ៍នេះ បានកើតឡើង កាលពីវេលាម៉ោង១និង៣០នាទីរសៀល ថ្ងៃទី៣១ ខែមីនា ឆ្នាំ២០២៥ នៅតាមបណ្តោយផ្លូវជាតិលេខ៣ ត្រង់ចំណុចគល់ស្ពានអាកាសចោមចៅ ស្ថិតនៅក្នុងភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ។
ជនសង្ស័យ មានឈ្មោះជេត វណ្ណ ភេទប្រុស អាយុ៣០ឆ្នាំ មុខរបរជាអ្នកខ្វៃជ្រូក ស្នាក់នៅបន្ទប់ជួលភូមិថ្មគោល១ សង្កាត់ចោមចៅទី២ ខណ្ឌពោធិ៍សែនជ័យ។ ចំណែករថយន្តដែលជនសង្ស័យប៉ុនប៉ងលួច ម៉ាកសាំងយ៉ុង ពណ៌ខៀវ ពាក់ស្លាកលេខ ភ្នំពេញ 2AK-7933 ជាកម្មសិទ្ធិរបស់ឈ្មោះជឿន ចាន់ណាក់ ភេទប្រុស អាយុ៣២ ឆ្នាំ មុខរបររត់តាក់ស៊ី មានលំនៅ ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ។
តាមសម្តីម្ចាស់រថយន្ត បានរៀបរាប់ប្រាប់ថា មុនពេលកើតហេតុ រូបគាត់បានឈប់រថយន្តនៅតាមបណ្តោយផ្លូវជាតិលេខ៣ ត្រង់ចំណុចគល់ស្ពានអាកាសចោមចៅ ស្ថិតនៅក្នុងភូមិថ្នល់បំបែក សង្កាត់ចោមចៅទី៣ ខណ្ឌ ពោធិ៍សែនជ័យ ដើម្បីហៅម៉ូយ ខណៈនោះរូបគាត់ទើបតែហៅបានម៉ូយជិះនៅក្នុងរថយន្តម្នាក់ប៉ុណ្ណោះ។ លុះដល់ពេលកើតហេតុ ឃើញជនសង្ស័យខាងលើ ដើរមកតថ្លៃរថយន្តគាត់ ជិះទៅកាន់តានី-ទូកមាស ខេត្តកំពត ហើយត្រូវរ៉ូវគ្នាក្នុងតម្លៃ៣ម៉ឺនរៀល រួចជនសង្ស័យបានឡើងទៅជិះក្នុងរថយន្ត នៅកៅអីខាងក្រោយ។
បុរសជាម្ចាស់រថយន្ត បានបន្តថា ខណៈនោះ គាត់មិនបានពន្លត់ម៉ាស៊ីនរថយន្តនោះទេ ដោយខ្លាចជនសង្ស័យ និងម៉ូយម្នាក់ទៀត ក្តៅស្អុះ ក៏បញ្ឆេះររថយន្តចោល រួចបានបានទៅហៅម៉ូយដាក់រថយន្តបន្តទៀត ស្រាប់តែជនសង្ស័យឆ្លៀតឱកាសបើករថយន្ត គេចខ្លួនតែម្តង ដោយនាំទាំងម៉ូយគាត់ម្នាក់ទៀត នៅក្នុងរថយន្ត ទៅជាមួយួផង។ ពេលឃើញបែបនេះ គាត់បានជួលម៉ូតូ ឌុបជិះដេញតាម រហូតដល់ត្រង់ចំណុចមុខខ្លោទ្វារវត្តជន្លង់ម្លូ ស្ថិតនៅតាមផ្លូវជាតិលេខ៣ ក្នុងភូមិទួលកី សង្កាត់ភ្លើងឆេះរទេះ ខណ្ឌកំបូល ទើបចាប់បាន ហើយប្រជាពលរដ្ឋដែលនៅជិតនោះ នាំគ្នាវាយទាត់ធាក់ម្នាក់ មួយដៃមួយជើង ទ្រមខ្លួន រួចទើបប្រគល់ទៅឱ្យប៉ូលិសប៉ុស្តិ៍ភ្លើងឆេះរទេះ នាំយកទៅសាកសួរ។
ក្រោយពីនាំទៅដល់ប៉ុស្តិ៍នគរបាលបានសាកសួរជនសង្ស័យ និងជនរងគ្រោះម្ចាស់រថយន្ត ទើបដឹងថា ទីតាំងកើតហេតុ ស្ថិតនៅភូមិថ្នល់បំបែក នៅសង្កាត់ចោមចៅទី៣ ខណ្ឌពោធិ៍សែនជ័យ ទើបនគរបាលប៉ុស្តិ៍ភ្លើងឆេះរទេះ ប្រគល់ជនសង្ស័យឱ្យនគរបាលប៉ុស្តិ៍ចោមចៅទី៣ ដើម្បីសាកសួរនិងចាត់ការបន្ត។ ប៉ុន្តែក្រោយមក ម្ចាស់រថយន្តខាងលើ សម្រេចមិនបានប្តឹងផ្តល់ជនសង្ស័យនោះទេ ដោយគ្រាន់ត្រឹមតែសំណូមពរដល់សមត្ថកិច្ចជួយធ្វើការអប់រំ និងធ្វើកិច្ចសន្យាទៅលើជនសង្ស័យប៉ុណ្ណោះ៕