ភ្នំពេញ ៖ ប្តីប្រពន្ធមួយគូ ទើបនឹងរៀបការបាន ៣ឆ្នាំ ស្រលាញ់គ្នាល្អូកល្អិន ចាក់ទឹកមិនលិច ស្រាប់តែជួបរឿងហេតុអកុសល ដោយភាគីបុរសជាប្តី បានកើតមានជំងឺ ត្រូវវះកាត់ ពីរបីលើក មិនបានធូរស្រាល បែរជាដុនដាបខ្លាំងឡើង ដោយងាប់សរសៃ កម្រើកខ្លួននិងដៃជើងមិនរួចដេកស្តូកស្តឹងនៅលើគ្រែ ស្រាប់តែស្ត្រីជាប្រពន្ធ ប្រែ ចិត្តលែងសូវយកចិត្តទុកដាក់មើលថែ រហូតដល់ចេញទៅជួលផ្ទះស្នាក់នៅផ្សេង ដោយទុកឱ្យប្តីឈឺដេកកន្ទេល ក្រោមការមើលថែពីម្តាយចំណាស់។ លុះចុងក្រោយ ស្ត្រីជាប្រពន្ធ បាននាំមេធាវីមកបង្ខំប្តីផ្តិតមេដៃលែងលះគ្នា ធ្វើឱ្យបុរសជាប្តី ឈឺចាប់ស្ទើរក្អួតឈាមស្លាប់។
បុរសអភ័ព្វដែលឈឺធ្ងន់ ប្រពន្ធបង្ខំឲ្យផ្តិតមេដៃលែងលះ មានឈ្មោះធៀម ពុទ្ធី អាយុ៤៤ឆ្នាំ ស្នាក់នៅខុនដូមួយកន្លែង ក្នុងរាជធានីភ្នំពេញ។ ចំណែកស្ត្រីជាប្រពន្ធ មានឈ្មោះ ហម ស៊ីវន អាយុ ២៧ឆ្នាំ។
លោកធៀម ពុទ្ធី បានរៀបរាប់ប្រាប់ថា គាត់និងប្រពន្ធ ឈ្មោះ ហម ស៊ីវន បានរៀបការត្រឹមត្រូវតាមផ្លូវច្បាប់ អស់រយៈពេល៣ឆ្នាំ មកហើយ និងរួមរស់ដោយមានសេចក្តីសុខសុភមង្គលខ្លាំងណាស់ ស្រលាញ់គ្នាចាក់ទឹកមិនលិច។ ស្រាប់តែរយៈពេលប្រមាណ ៣ខែចុងក្រោយនេះ គាត់ចាប់ផ្តើមឈឺធ្ងន់ រហូតត្រូវដេកដួលនៅលើគ្រែ ដើរលែងរួច បែរជាប្រពន្ធដែលគាត់ស្រលាញ់ស្ទើរលេប ប្រែចិត្តលែងខ្វល់ខ្វាយមើលថែរូបគាត់ជាប្តី និងបានចាកចេញទៅជួលផ្ទះរស់នៅដាច់ដោយឡែក ទុកឱ្យគាត់ជាប្តី ឈឺដេកលើគ្រែតែឯង និងបានម្តាយបង្កើតជាអ្នកមក មើលថែ បម្រើរាល់ថ្ងៃទៅវិញ។
លោកធៀម ពុទ្ធី បានបន្តថា ក្រោយពីចេញទៅជួលផ្ទះនៅផ្សេង មិនរវល់មកជួយមើលថែជំងឺគាត់ជាប្តី អស់ជាច្រើនខែរួចមក ស្រាប់តែនៅថ្ងៃទី២៨ ខែមីនា ឆ្នាំ២០២៥ លេចមុខប្រពន្ធ ត្រឡប់មកវិញ ធ្វើឱ្យគាត់រំភើបចិត្តយ៉ាងខ្លាំង នឹកស្មានថាប្រពន្ធប្តូរចិត្តអាណិតប្តី ព្រមវិលមក មើលថែគាត់វិញ ដឹងអីបែរជាប្រពន្ធនាំមេធាវី មកបង្ខំឱ្យគាត់ជាប្តីផ្តិតមេដៃលែងលះគ្នាឱ្យដាច់ស្រេចទៅវិញ ធ្វើឱ្យគាត់ឈឺចិត្តស្អិតទ្រូង ស្ទើរគាំងបេះដូងស្លាប់។
លោកធៀម ពុទ្ធី បានឱ្យដឹងបន្តទៀតថា មុននេះ ប្រពន្ធរបស់គាត់ បានប្រាប់ថា បើចង់ឱ្យនាងមើលថែតទៅទៀត ទាល់តែផ្តិតមេដៃលែងលះគ្នា ដើម្បីនាងមានសេរីភាពធ្វើអ្វីបានតាមច្បាប់ ហើយនាងនឹងរកពេលមកមើលថែ។ ប៉ុន្តែគាត់មិនបានផ្តិតមេដៃឱ្យនោះទេ ព្រោះគាត់គ្មានកំហុស ដែលត្រូវលែងលះគ្នានោះទេ ហើយគួរណាស់ប្រពន្ធអាណិតប្តីដែលកំពុងមានជំងឺធ្ងន់ ដេកដួលតែមួយកន្លែងបែបនេះ មិនមែននាំមេធាវី មកបង្ខំឱ្យគាត់ផ្តិតមេដៃលែងលះគ្នាបែបនេះឡើយ។
លោកធៀម ពុទ្ធី បាននិយាយទាំងសំឡេងខ្សាវៗថា “ធម្មតាប្តីប្រពន្ធ រស់នៅរួមសុខរួមទុក្ខជាមួយគ្នា រមែងមានការឈ្លោះទាស់ទែង ប៉ះពាក្យសម្តីធ្ងន់ស្រាលខ្លះហើយ តែ ៣ខែចុងក្រោយនេះ ប្រពន្ធខ្ញុំប្រែប្រួលខ្លាំងណាស់ សូម្បីតែផ្ទះរបស់ខ្លួនឯង ក៏គាត់មិនបានគេងនៅដែរ ដោយចេញទៅជួលបន្ទប់គេងនៅផ្សេងពីខ្ញុំ ទោះខ្ញុំយំអង្វរគាត់ឱ្យនៅផ្ទះជាមួយគ្នា ក៏គាត់មិនព្រមដែរ បានត្រឹមតែព្រឹកឡើង មកដាក់ថ្នាំឱ្យខ្ញុំម្តង រួចក៏ត្រឡប់ទៅវិញបាត់…”។
លោកធៀម ពុទ្ធី បានបន្ថែមថា ដោយសារតែប្រពន្ធចេះតែបណ្តេញ ណាមួយគ្មានអ្នកមើលថែដិតដល់ផងនោះ ទើបម្តាយរបស់គាត់ បាននាំគាត់មកស្នាក់នៅផ្ទះប្អូនប្រុស នៅខេត្តកណ្តាល ក្រោមការមើលថែពីម្តាយវ័យ ចំណាស់ ដែលកំពុងមានជំងឺប្រចាំកាយថែមទៀតផង។
ស្ត្រីចំណាស់ ឈ្មោះលុក អន អាយុជាង៧០ឆ្នាំ ត្រូវជាម្តាយបង្កើតលោកធៀម ពុទ្ធី បានរៀបរាប់ប្រាប់ថា កូនប្រុសរបស់គាត់ និងប្រពន្ធ បានរៀបការអស់រយៈពេល ៣ឆ្នាំមកហើយ ហើយតាំងពីចាប់ដៃគ្នាមក គាត់ជាម្តាយ សង្កេតឃើញថា ប្តីប្រពន្ធពួកគេរស់នៅស្រលាញ់គ្នា ខ្លាំងណាស់ ទើបតែរយៈពេលប៉ុន្មានខែចុងក្រោយនេះ កូនប្រុសគាត់ បានចាប់ផ្តើមធ្លាក់ខ្លួនឈឺ រហូតត្រូវធ្វើការវះកាត់នៅឯមន្ទីរពេទ្យកាល់ម៉ែត ម្តងជាពីរដង តែអាការជំងឺរបស់កូនប្រុស ហាក់មិនបានធូរស្រាលសោះ បែរជាកាន់តែដុនដាបខ្លាំងឡើង រហូតដល់ត្រូវដេកដួលនៅលើគ្រែ ដើរលែងរួច ទើបកូនប្រុសបានហៅឱ្យគាត់ជាម្តាយ មកជួយមើលថែគេ នៅពេលយប់ គ្រាន់បានជួយសម្រាលបន្ទុកប្រពន្ធរបស់គេខ្លះ។
ស្ត្រីជាម្តាយ បានបន្តថា ក្នុងអំឡុងពេលដែលគាត់ចូលមកមើលថែកូនប្រុសនោះ គាត់បានសង្កេតឃើញថា ប្តីប្រពន្ធពួកគេចេះតែកើតរឿងរកាំរកូស ទាស់សម្តីគ្នាមិនឈប់ រហូតឈានដល់កូនប្រសាស្រី បានស្តីបណ្តេញកូនប្រុសរបស់គាត់ ដែលកំពុងមានជំងឺ ឱ្យចេញពីខុនដូទៀតផង។ ក្រោយពីរងការបណ្តេញនេះ ទើបនៅថ្ងៃទី២៨ ខែមីនា ឆ្នាំ២០២៥ រូបគាត់ជាម្តាយ ទ្រាំមិនបាន ក៏នាំកូនប្រុស ឈ្មោះធៀម ពុទ្ធី មកសុំផ្ទះកូនប្រុសរបស់គាត់ម្នាក់ទៀត នៅក្នុងខេត្តកណ្តាល ដើម្បីសម្រាកព្យាបាលបន្ត។ ស្រាប់តែមិនទាន់បានប៉ុន្មានផង កូនប្រសា ស្រីរបស់គាត់ បានទូរស័ព្ទមកប្រាប់គាត់ជាម្តាយក្មេកថា នៅម៉ោង ២រសៀល ថ្ងៃទី២៨ ខែមីនា ឆ្នាំ២០២៥ នាងនឹងនាំមេធាវីមកផ្តិតមេដៃលែងលះជាមួយប្តី (កូនប្រុសគាត់) ហើយ ធ្វើឱ្យគាត់ស្រឡាំងកាំង រកពាក្យអ្វីហាស្តីលែងចេញ មិននឹកស្មានថាកូនប្រសាស្រីគាត់ ដាច់ចិត្តចោលប្តី គ្មានក្តីអាសូរបែបនេះសោះ ខណៈដែលនាងដឹងហើយថា ប្តីនាងកំពុងមានជំងឺយ៉ាងធ្ងន់។
ជុំវិញការអះអាងរបស់បុរសជាប្តី និងស្ត្រីជាម្តាយក្មេក ខាងលើនេះ “នគរធំ” មិនអាចទាក់ទងសុំការបំភ្លឺពីភាគីស្ត្រីជាប្រពន្ធ ឈ្មោះ ហម ស៊ីវន បានទេ កាលពីម្សិលមិញ។ យ៉ាងណា យើងរង់ចាំទទួលការបកស្រាយបំភ្លឺពីគ្រប់ភាគីពាក់ព័ន្ធទាំងអស់៕