ភ្នំពេញ ៖ បុរសម្នាក់ បើករថយន្តទំនើប ១គ្រឿង ដឹកនារីវ័យក្មេងម្នាក់ សង្ស័យជាស្រីស្នេហ៍ ធ្វើដំណើរក្នុងល្បឿនយ៉ាងលឿន ស្រាប់តែបុកខឿនផ្លូវ បណ្តាលឱ្យខូចខាតបន្តិចបន្តួច រីឯរថយន្ត បែកយ៉ាន់ ដាច់កង់២គាប់ ទាំងមុខនិងក្រោយចំហៀងខាងឆ្វេង ទៅមុខលែងរួច។ ចំណែកស្រីក្មេង បានគេចខ្លួនពីកន្លែងកើតហេតុបាត់ភ្លាមៗ។
ហេតុការណ៍គ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង១០និង២០នាទីយប់ ថ្ងៃទី០២ ខែមេសា ឆ្នាំ២០២៥ នៅត្រង់ចំណុចផ្លូវភ្លោះលេខ១០០៧ ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ។
តាមប្រភពពីកន្លែងកើតហេតុ បានឱ្យដឹងថា មុនពេលកើតហេតុ គេឃើញរថយន្តទំនើប ១គ្រឿង ម៉ាកឡង់គ្រីសឺរ ពណ៌ស ពាក់ស្លាកលេខ ភ្នំពេញ 2BS-9108 បើកបរដោយបុរសម្នាក់រួមដំណើរជាមួយនឹងនារីម្នាក់ទៀត ធ្វើដំណើរតាមបណ្តោយផ្លូវលេខ១០០៧ ក្នុងទិសដៅពីត្បូងទៅជើង ដោយល្បឿនយ៉ាងលឿន លុះពេលបើកមកដល់ចំណុចកើតហេតុខាងលើ ស្រាប់តែរេចង្កូតមកខាងឆ្វេងដៃ ជ្រុលទៅបុកខឿនផ្លូវភ្លោះ បណ្តាលឱ្យខូចខាតតិចតួច ចំណែករថយន្តវិលមួយជុំ បណ្តាលឱ្យដាច់កង់ទាំងមុខទាំងក្រោយ ចំហៀងខាងឆ្វេង ទៅមុខលែងរួចតែម្តង។
ក្រោយកើតហេតុ នារីវ័យក្មេងដែលរួមដំណើរជាមួយ បានចាកចេញពីកន្លែងកើតហេតុបាត់ភ្លាមៗ នៅសល់តែអ្នកបើកបរនិងរថយន្ត ត្រូវសមត្ថកិច្ចជំនាញចុះមកធ្វើការវាស់វែង រួចអូសយករថយន្តទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីធ្វើការដោះស្រាយ តាមច្បាប់៕
