ខេត្តបន្ទាយមានជ័យ ៖ ប្រជាពលរដ្ឋខ្មែរ ដែលចេញទៅធ្វើការងារនិងរកស៊ីនៅឯប្រទេសថៃ បានសម្រុកវិលចូលមកកម្ពុជាវិញ ដើម្បីចូលរួមពិធីបុណ្យចូលឆ្នាំថ្មីប្រពៃណីជាតិ តាមច្រកទ្វារអន្តរជាតិប៉ោយប៉ែត ក្រុងប៉ោយប៉ែត ក្នុងរយៈពេល២ថ្ងៃ (គិតត្រឹមថ្ងៃទី២ ខែមេសា ឆ្នាំ២០២៥) មានចំនួនប្រមាណជិត៤ពាន់នាក់ ក្នុងនោះពលករ មានចំនួនប្រមាណជាង ២ពាន់នាក់។
លោកវ៉ាន់ ដារ៉ាន់ ប្រធានស្នាក់ការច្រកទ្វារអន្តរជាតិប៉ោយប៉ែត បានបញ្ជាក់ថា ក្នុងរយៈពេល២ថ្ងៃនេះ មានប្រពលរដ្ឋខ្មែរ ដែលត្រឡប់ពីប្រទេសថៃ ចូលមកកម្ពុជា វិញ ក្នុងឱកាសបុណ្យចូលឆ្នាំថ្មីប្រពៃណីខ្មែរ មានចំនួន ៣៨២៤នាក់ (ស្រី១៨១៩នាក់) ក្នុងនោះមានពលករ ចំនួន២៣៤០នាក់ (ស្រី១០៥៦នាក់)។
លោកវ៉ាន់ ដារ៉ាន់ បានបញ្ជាក់ថា ក្រោយរាជរដ្ឋាភិបាលថៃ បានឯកភាពតាមសំណើរបស់ក្រសួងការងារថៃ លើកលែងតម្លៃសេវាការអនុញ្ញាតចេញ-ចូលប្រទេសថៃ ដល់ពលករខ្មែរអំឡុងពេលបុណ្យចូលឆ្នាំថ្មីប្រពៃណីជាតិ ចាប់ពីថ្ងៃទី០១ ខែមេសា ឆ្នាំ២០២៥ ដល់ថ្ងៃទី១៥ ខែឧសភា ឆ្នាំ២០២៥ ការលើកលែងតម្លៃសេវានេះ គឺផ្តល់ចូនតែមួយដង់គត់ ដល់ពលករខ្មែរដែលមានលិខិតឆ្លងដែន លិខិតធ្វើដំណើរពលករកម្ពុជា ទៅធ្វើការនៅបរ ទេស (TD) និងមានទិដ្ឋាការការងារដែលមានសុពលភាពលើសពីថ្ងៃទី១៥ ខែឧសភា ឆ្នាំ២០២៥ ការលើកលែងនេះក៏បូករួមទាំងកូនក្រោមអាយុ១៨ឆ្នាំ ដែលទទួលបានវាយត្រាប្រភេទក្នុងបន្ទុក និងមានលិខិតអនុញ្ញាតឲ្យស្នាក់នៅក្នុងប្រទេសថៃ លើសថ្ងៃទី១៥ ខែឧសភា ឆ្នាំ២០២៥។
លោកវ៉ាន់ ដារ៉ាន់ បានបញ្ជាក់ថា ពលករខ្មែរដែលត្រឡប់ពីប្រទេសថៃ ចូលមកកម្ពុជា តាមច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ ត្រូវបានក្រុមការងារស្នាក់ការត្រួតពិនិត្យច្រកទ្វារអន្តរជាតិប៉ោយប៉ែត បានធ្វើការសម្របសម្រួលដល់ពលករខ្មែរ ឱ្យបានលឿន និងឆាប់រហ័ស ហើយមានអាហារសម្រន់សម្រាប់ចែកជូនដល់ពលករម្នាក់ ទទួលបានក្រមា១ នំប៉័ង១ និងទឹកសុទ្ធ ១ដប៕
