ខេត្តព្រះសីហនុ ៖ ផ្ទះ ១ខ្នង ត្រូវបានម្ចាស់ចាក់សោទុកចោល រួចនាំគ្នាចាកចេញទៅឆេងម៉េង (សែនផ្នូរ) ស្រាប់តែអកុសលកើតមានករណីទុស្សេខ្សែភ្លើង ធ្វើឱ្យមានការឆាបឆេះបំផ្លាញផ្ទះខាងលើអស់ និងថែមទាំងឆេះរាលដល់ផ្ទះ ២ខ្នងសងខាង បណ្តាលឱ្យខូចខាតទៀតផង។
ហេតុការណ៍អគ្គិភ័យនេះ បានកើតឡើងកាលពីវេលាម៉ោង៣រសៀល ថ្ងៃទី០២ ខែមេសា ឆ្នាំ២០២៥ នៅក្បែរផ្សារលើទឹក ភូមិ១ សង្កាត់លេខ៤ ក្រុងព្រះសីហនុ។
ផ្ទះដែលរងការឆាបឆេះខាងលើ ជាប្រភេទសំណង់ សង់ពីឈើប្រក់ស័ង្កសី ត្រូវបានអគ្គិភ័យឆាបឆេះអស់ទាំង ស្រុង រួមទាំងទ្រព្យសម្បត្តិ នៅក្នុងផ្ទះទៀតផង។ ចំណែកផ្ទះ ២ខ្នងទៀត នៅសងខាង រងខូចខាតផ្នែកខ្លះៗតែប៉ុណ្ណោះ។
តាមប្រភពប្រជាពលរដ្ឋក្បែរខាង បានឱ្យដឹងថា មុនពេលកើតហេតុ ម្ចាស់ផ្ទះខាងលើ មិននៅផ្ទះទេ ដោយបានចាក់សោ ព្រោះរវល់ទៅសែនឆេងម៉េង នៅស្រុក។ ស្រាប់តែនៅវេលាម៉ោងខាងលើ កើតមានការឆ្លងចរន្តអគ្គិ សនី (ទុស្សេខ្សែភ្លើង) បង្កជាអគ្គិភ័យឆាបឆេះផ្ទះខាងលើខ្ទេចអស់តែម្តង និងថែមទាំងរាលឆេះផ្ទះអ្នកជិតខាង ចំនួន២ខ្នងទៀតផង គ្រាន់តែមិនធ្ងន់ធ្ងរ។
បន្ទាប់ពីកើតមានហេតុការណ៍ខាងលើភ្លាម ឃើញកម្លាំងសមត្ថកិច្ច បានចុះអន្តរាគមន៍ដល់ទីតាំងកើតហេតុភ្លាម ដោយបានបញ្ជូនរថយន្តពន្លត់អគ្គិភ័យ ចំនួន២គ្រឿង បាញ់ទឹកពន្លត់ភ្លាមៗដែរ ហើយគាប់ជួនសំណាងល្អ មេឃក៏បានធ្លាក់ភ្លៀង ១មេធំផង ទើបភ្លើងបានរលត់ និងធ្វើឱ្យផ្ទះសងខាងទាំង ២ខ្នង ឆេះរោលតែផ្នែកខ្លះៗប៉ុណ្ណោះ៕
