ភ្នំពេញ ៖ កម្លាំងនាយកដ្ឋាននគរបាលទេសចរណ៍ នៃអគ្គស្នងការដ្ឋាននគរបាលជាតិ បានចាប់ខ្លួនជនជាតិកាមេរ៉ូនម្នាក់ ក្រោយជំរិតទារប្រាក់ពីស្ត្រីជនជាតិឡាវ ជិត២០ម៉ឺនដុល្លារ ចំណែកបក្ខពួកមួយចំនួនទៀត កំពុងរត់គេចខ្លួន។
យោងតាមរបាយការណ៍របស់នាយកដ្ឋាននគរបាលទេសចរណ៍ បានឱ្យដឹងនៅថ្ងៃទី៣ ខែមេសា ឆ្នាំ២០២៥ ថា ករណីបទឆបោកនិងចាប់បង្ខាំង (ជំរិតទារប្រាក់) បានកើតឡើង កាលពីថ្ងៃទី២៦ ខែមីនា ឆ្នាំ២០២៥ នៅសង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ ក្នុងសណ្ឋាគារ Poulo Wai Hotel & Apartment។
ស្ត្រីរងគ្រោះ មានឈ្មោះ NOUTTHAVONG KHOUN អាយុ៣៧ឆ្នាំ ជនជាតិឡាវ។ ចំណែកជនល្មើសដែលត្រូវកម្លាំងសមត្ថកិច្ចជំនាញចាប់ខ្លួន មានឈ្មោះ ASHU GEORGE EBOT ជនជាតិកាមេរ៉ូន (CAMEROON)។
របាយការណ៍ដដែល បន្តថា កាលពីថ្ងៃទី២៤ ខែមីនា ឆ្នាំ២០២៥ ស្ត្រីជនជាតិឡាវ ខាងលើ បានប្រគល់លុយសុទ្ធ ចំនួន ១០ម៉ឺនដុល្លារ ឱ្យទៅបុរសជនជាតិស្បែកខ្មៅម្នាក់ ដែលស្ត្រីរងគ្រោះអះអាងថា ជាសង្សាររបស់ខ្លួន និងបក្ខពួក ដើម្បីយកទៅទិញឡាន ចំនួន២គ្រឿង នៅសណ្ឋាគារ POULO WAI HOTEL & APARTMENT សង្កាត់ផ្សារថ្មី៣ ខណ្ឌដូនពេញ។ ក្រោយពីបានទទួលប្រាក់ហើយ ស្ត្រីរងគ្រោះ ព្យាយាមទំនាក់ទំនងទៅបុរសដែលជាសង្សាររបស់ខ្លួន ប៉ុន្តែមិនអាចទាក់ទងបានទេ។ ក្រោយមក មានបុរសម្នាក់ ឈ្មោះ MIMBANG ROMEO AYUK ភេទប្រុស អាយុ៣៧ឆ្នាំ ជនជាតិកាមេរ៉ូន (CAMEROON) បានទាក់ទងមកស្ត្រីរងគ្រោះ ដោយប្រាប់ថា បុរសជាសង្សាររបស់នាង ត្រូវបានប៉ូលិសចាប់ខ្លួន និងបានប្រាប់ឱ្យស្ត្រីរងគ្រោះ រកលុយចំនួន ៧ម៉ឺនដុល្លារ ដើម្បីមកលោះបុរសជាសង្សារ ពីកន្លែងប៉ូលិស។
ស្ត្រីរងគ្រោះ បានឆ្លើយតបថា គ្មានប្រាក់ចំនួន ៧ម៉ឺដុល្លារទេ ស្រាប់តែជនសង្ស័យ ឈ្មោះ MIMBANG ROMEO AYUK បានឱ្យស្ត្រីរងគ្រោះ យកប្រាក់ចំនួន ៥ម៉ឺនដុល្លារ ដោយបានផ្ញើរូបភាពសង្សារជាប់ខ្នោះ តាមបណ្តាញទំនាក់ទំនងសង្គម (Telegram)។ តែតាមពិត ក្រុមជនល្មើសទាំងនេះ បានប្រឌិតរឿងទាំងអស់ថា សង្សាររបស់នាង ត្រូវចាប់ខ្លួន ដោយធ្វើជាដាក់ខ្នោះសង្សាររបស់នាង ដើម្បីភូតកុហកនាងប៉ុណ្ណោះ។
បន្ទាប់មក ជនសង្ស័យឈ្មោះ MIMBANG ROMEO AYUK បានឱ្យស្ត្រីរងគ្រោះណាត់ជួប ដើម្បីប្រគល់ប្រាក់ ដោយឱ្យជនសង្ស័យឈ្មោះ ASHU GEORGE EBOT មកទទួលប្រាក់ជំនួសមុខឱ្យឈ្មោះ MIMBANG ROMEO AYUK នៅភោជនីយដ្ឋានតន្ត្រីភ្នំមាស៩៩ ស្ថិតនៅផ្លូវលេខ៤៣០ កែង៥០២ សង្កាត់ផ្សារដើមថ្កូវ ខណ្ឌចម្ការមន រាជធានីភ្នំពេញ ក៏ត្រូវបានកម្លាំងនគរបាលចាប់ខ្លួនបានតែម្តង ក្រោមការបញ្ជារបស់នាយឧត្តមសេ នីយ៍ ស ថេត អគ្គស្នងការនគរបាលជាតិ និងក្រោមការសម្របសម្រួលពីលោក ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ។
ជនល្មើសរូបនេះ ត្រូវបាននាយកដ្ឋាននគរបាលទេសចរណ៍ ចាប់បញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់ នៅថ្ងៃទី០៣ ខែមេសា ឆ្នាំ២០២៥។
សូមបញ្ជាក់ថា ឧក្រិដ្ឋជនរូបនេះ កាលពីថ្ងៃទី៣០ ខែវិច្ឆិកា ឆ្នាំ២០២០ ធ្លាប់ត្រូវបានកងរាជអាវុធហត្ថលើផ្ទៃប្រទេស ឃាត់ខ្លួនម្តងហើយ បន្ទាប់ពីបានទទួលបណ្តឹងពីជនរងគ្រោះ ពីបទ “ឆបោក និងលួចមានស្ថាន ទម្ងន់ទោស និងកំហែងយកមានស្ថានទម្ងន់ទោស” នៅក្នុងខណ្ឌ ជ្រោយចង្វា នៅក្នុងទំហំទឹកប្រាក់ប្រមាណ ៣៥ម៉ឺនដុល្លារ តែជនរងគ្រោះបានផ្ញើឱ្យពួកគេ ជិត៣០ម៉ឺនដុល្លារ។
ពេលដែលត្រូវបានចាប់ខ្លួនពីកម្លាំងអាវុធហត្ថលើផ្ទៃប្រទេសនោះ នៅថ្ងៃទី១៦ ខែធ្នូ ឆ្នាំ២០២០ ពោលមានរយៈ ពេល១៦ថ្ងៃ ទើបត្រូវបានលោកកេត សុជាតិ ចៅក្រមស៊ើបសួរសាលាដំបូងរាជធានីភ្នំពេញ ចេញដីកាឃុំខ្លួនជាបណ្តោះអាសន្ន ដាក់ពន្ធនាគារ ក្រោមការចោទប្រកាន់ ពីបទ “កំហែងយកមានស្ថានទម្ងន់ទោស (ប្រើប្រាស់អាវុធ) និងឆបោក” ប្រព្រឹត្តនៅរាជធានីភ្នំពេញ កាលពីចុងខែវិច្ឆិកា ដល់ដើមខែធ្នូ ឆ្នាំ២០២០ តាមបញ្ញត្តិមាត្រា៣៦៣ មាត្រា ៣៦៦ មាត្រា៣៧៧ និងមាត្រា៣៧៨ នៃក្រមព្រហ្មទណ្ឌ នៃព្រះរាជាណាចក្រកម្ពុជា។
ក្រោយការជាប់ឃុំនៅក្នុងពន្ធនាគារ បានរយៈពេល ១ឆ្នាំ ៦ខែ ត្រូវបានលោកសាយ ណូរ៉ា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចេញដីកាបង្គាប់ឱ្យដោះលែងវិញ នៅថ្ងៃទី១៦ ខែមិថុនា ឆ្នាំ២០២២៕