កាលពីថ្ងៃចន្ទទី៦ធ្នូ២០២១មេដឹកនាំរុស្ស៊ីនិងឥណ្ឌាបានចុះហត្ថលេខាលើកិច្ចព្រមព្រៀងពាណិជ្ជកម្ម ចំនួន ២៨ និងសព្វាវុធ ក្នុងទំហំទឹកប្រាក់ដ៏ច្រើន នៅក្នុងដំណើរទស្សនកិច្ចរបស់ប្រធានាធិបតី វ្ល៉ាឌីមៀ ពូទីន ទៅកាន់ទីក្រុង ញូវដេលី ដើម្បីពិភាក្សា ជាមួយនាយករដ្ឋមន្ត្រី ឥណ្ឌាលោកនរិន្ទ្រ មូឌីរួមទាំងគម្រោងមួយដែលនឹងឃើញឥណ្ឌាផលិតកាំភ្លើង Kalashnikov ជាង 600000 ដើមផងដែរ ។នេះបើយោងតាមការចេញផ្សាយរបស់បណ្តាញសារព័ត៌មានស៊ីអិនអិន។ ប្រធានាធិបតី រុស្ស៊ីបំពេញ ទស្សនកិច្ចនៅប្រទេសឥណ្ឌា ចំពេលទំនាក់ទំនងកាន់តែតានតឹងរវាងរុស្ស៊ី និងសហរដ្ឋអាមេរិកដែលជាសម្ព័ន្ធ មិត្តដ៏សំខាន់ របស់ឥណ្ឌា ។
លោកពូទីនបានធ្វើដំណើរទៅប្រទេសឥណ្ឌាអមដំណើរដោយរដ្ឋមន្ត្រីការពារជាតិនិងរដ្ឋមន្ត្រីការបរទេសដែលជាដំណើរទស្សនកិច្ចដើម្បីពង្រឹងទំនាក់ទំនងរបស់ពួកគេជាមួយនឹងកតិកាសញ្ញាសហប្រតិបត្តិការយោធានិងបច្ចេកទេសរហូតដល់ឆ្នាំ 2031 និងសន្យាជំរុញពាណិជ្ជកម្មប្រចាំឆ្នាំដល់ 30 ពាន់លានដុល្លារនៅឆ្នាំ 2025។សេចក្តីថ្លែងការណ៍រួមដែល ចេញផ្សាយបន្ទាប់ ពីកិច្ចពិភាក្សាបាននិយាយថា រុស្ស៊ី និងឥណ្ឌាបាន បញ្ជាក់ជាថ្មីអំពីចេតនារបស់ពួកគេក្នុង ការពង្រឹងកិច្ចសហប្រតិបត្តិការ លើវិស័យការពារជាតិរួមទាំងការអភិវឌ្ឍន៍រួមគ្នានៃការផលិតឧបករណ៍យោធា។បន្ថែមពីលើកិច្ចព្រមព្រៀងសម្រាប់ ឥណ្ឌា ក្នុងការផលិតកាំភ្លើងAK2-03 រុស្ស៊ីបាននិយាយថាខ្លួនចាប់អារម្មណ៍ក្នុងការបន្តផ្តល់ប្រព័ន្ធមីស៊ីលការពារដែនអាកាស S-400 ដល់ឥណ្ឌាផងដែរ ។
រដ្ឋមន្ត្រីការបរទេសឥណ្ឌាលោក Harsh Vardhan Shringla បាននិយាយថាប្រទេសទាំងពីរបានចុះហត្ថលេខាលើកិច្ចព្រមព្រៀង វិនិយោគចំនួន 28 រួមទាំងកិច្ចព្រមព្រៀងលើដែកថែប ការកសាងនាវា ធ្យូងថ្ម និងថាមពល។ លោកបានបន្ថែមថា កិច្ចសន្យាឆ្នាំ 2018 សម្រាប់ប្រព័ន្ធមីស៊ីល S-400 បច្ចុប្បន្នកំពុងត្រូវបានអនុវត្ត។លោកបានមានប្រសាសន៍ថា៖ ការផ្គត់ផ្គង់បានចាប់ផ្តើមក្នុងខែនេះ ហើយនឹងបន្តកើតឡើង។
កិច្ចព្រមព្រៀងជាមួយទីក្រុងមូស្គូធ្វើឱ្យឥណ្ឌាប្រឈមមុខនឹងការដាក់ទណ្ឌកម្មពីសហរដ្ឋអាមេរិកនៅក្រោមច្បាប់របស់សហរដ្ឋអាមេរិកឆ្នាំ2017ដែលមានគោលបំណងរារាំងប្រទេសនានាពីការទិញផ្នែករឹងយោធារបស់រុស្ស៊ី។ក្រុមហ៊ុនប្រេងរុស្ស៊ី Rosneft បាននិយាយថា ខ្លួនបានចុះហត្ថលេខាលើកិច្ចសន្យាជាមួយក្រុមហ៊ុន Indian Oilដើម្បីផ្គត់ផ្គង់ប្រេងរហូតដល់2លាន តោនដល់ ប្រទេសឥណ្ឌានៅចុងឆ្នាំ 2022 ៕
