ភ្នំពេញ ៖ ប្តីប្រពន្ធ ២នាក់ ជិះម៉ូតូដឹកគ្នាតាមផ្លូវ សំដៅទៅផ្សារ ស្រាប់តែត្រូវជនសង្ស័យម្នាក់ ជិះម៉ូតូមកពីក្រោយ ធ្វើសកម្មភាពឆក់យកកាបូបពីស្ត្រីជាប្រពន្ធ ទៅបាត់ដោយសុវត្ថិភាព ដោយក្នុងនោះមានរបស់ទ្រព្យមានតម្លៃ សរុបជាទឹកប្រាក់ប្រមាណជាង ៥០០ដុល្លារ។
ករណីនេះ បានកើតឡើង កាលពីវេលាម៉ោង ១១និង៣០នាទីព្រឹក ថ្ងៃទី២២ ខែកក្កដា ឆ្នាំ២០២២ នៅចំណុចជិតអគ្គបញ្ជាការដ្ឋានកងទ័ពជើងគោក តាមបណ្តោយផ្លូវជាតិលេខ៤ ក្នុងសង្កាត់កន្ទោក ខណ្ឌកំបូល។
ស្ត្រីរងគ្រោះដែលត្រូវចោរឆក់កាបូប មានឈ្មោះផាន់ ចរិយា អាយុ៥៨ឆ្នាំ ស្នាក់នៅសង្កាត់ឃ្មួញ ខណ្ឌសែនសុខ។ ចំណែករបស់ដែលបាត់បង់ រួមមាន កាបូប ចំនួន១ ក្នុងនោះ មានទូរស័ព្ទម៉ាក oppo ចំនួន ៣គ្រឿង បន្តោងខ្សែកមួយ តម្លៃប្រហែល៤០០ដុល្លារ លុយ ចំនួន ១០ ០០០រៀល និងឯកសារមួយចំនួនទៀត។
តាមសម្តីជនរងគ្រោះ បានឱ្យដឹងថា មុនពេលកើតហេតុ រូបគាត់និងប្តី បានជិះម៉ូតូតាមបណ្តោយផ្លូវជាតិលេខ៤ ក្នុងទិសដៅពីលិច ទៅកើត បំណងទៅផ្សារ ដោយទុកកាបូបស្ពាយនៅរានខាងមុខ ខណៈធ្វើដំណើរមកដល់ចំណុចកើតហេតុខាងលើ ស្រាប់តែមានជនសង្ស័យម្នាក់ ជិះម៉ូតូ ១គ្រឿង មិនចាំម៉ាកនិងស្លាកលេខ មកពីក្រោយ រួចក៏ធ្វើសកម្មភាពឆក់យកកាបូបរបស់គាត់ បានសម្រេច រួចគេចខ្លួនបាត់ដោយសុវត្ថិភាព។
ក្រោយកើតហេតុ ជនរងគ្រោះបានត្រឹមតែទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលកន្ទោក ចៀសវាងជនសង្ស័យយកអត្តសញ្ញាណប័ណ្ណរបស់គាត់ទៅប្រើប្រាស់ក្នុងអំពើទុច្ចរិតអ្វីមួយ៕