យោធាមីយ៉ាន់ម៉ាកាត់ទោសប្រហារជីវិតសកម្មជនប្រជាធិបតេយ្យបួននាក់

យោងតាមប្រព័ន្ធផ្សព្វផ្សាយរដ្ឋមីយ៉ាន់ម៉ា​The Global New Light Of Myanmar ចេញផ្សាយកាលពីថ្ងៃចន្ទទី២៥ កក្កដា​២០២២បានអោយដឹងថាអាជ្ញាធរយោធាមីយ៉ាន់ម៉ាបានកាត់ទោសប្រហារជីវិតសកម្មជនប្រជាធិបតេយ្យបួននាក់ពីបទចោទប្រកាន់អំពើភេរវកម្មធ្ងន់ធ្ងរ​។

កាសែតខាងលើនេះបាន​និយាយ​ថា សកម្មជន​ទាំង​នោះ​ត្រូវ​បានចោទប្រកាន់ពីបទដឹកនាំអំពើភេរវកម្មដ៏ព្រៃផ្សៃនិង អមនុស្សធម៌។ជាការកត់សម្គាល់នេះគឺជាការប្រហារជីវិតលើកដំបូងដែលបានធ្វើឡើងក្នុងរយៈពេល ជាច្រើនទសវត្សរ៍នៅក្នុងប្រទេសអាស៊ានមួយនេះ។

ការ​ប្រហារ​ជីវិត​នៅ​មីយ៉ាន់ម៉ា​កន្លង​មក​ត្រូវ​បាន​អនុវត្ត​ដោយ​ការ​ព្យួរក។

សមាគមជំនួយអ្នកទោសនយោបាយ (AAPP) បាននិយាយថា ការកាត់ទោសប្រហារជីវិតចុងក្រោយនៅក្នុង ប្រទេសមីយ៉ាន់ម៉ាបានកើតឡើងនៅចុងទសវត្សរ៍ឆ្នាំ១៩៨០។

មនុស្សដែល​ត្រូវ​ប្រហារ​ជីវិត​ទាំងនោះ​រួម​មាន​សកម្មជន​ប្រជាធិបតេយ្យលោក Kyaw Min Yu និង​អតីត​សមាជិក​សភា និង​ជា​សិល្បករ​លោក Phyo Zeya Thaw។

លោកThawគឺជាសមាជិកសភាមកពីគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) របស់លោកស្រី អ៊ុងសាន ស៊ូជី ដែលត្រូវគេបណ្តេញចេញពីដំណែង។ចំណែកឯបុរស​ដែល​ត្រូវ​គេ​ប្រហារ​ជីវិត​ពីរ​នាក់​ទៀត​គឺ Hla Myo Aung និង Aung Thura Zaw។

អ្នកទាំងបួនត្រូវបានចោទប្រកាន់ក្រោមច្បាប់ប្រឆាំងភេរវកម្ម និងក្រមព្រហ្មទណ្ឌហើយការដាក់ទណ្ឌកម្មត្រូវបាន ធ្វើឡើងតាមនីតិវិធីរបស់ពន្ធនាគារ។

គួររំឭកថាអ្នក​ទាំង​បួន​ត្រូវ​បាន​កាត់​ទោស​ប្រហារ​ជីវិត​កាល​ពី​ខែ​មករាក្នុង​សវនាការ​បិទ​ទ្វារ។ ពួកគេ​ត្រូវ​បាន​គេ​ចោទ​ប្រកាន់​ថា​បាន​ជួយ​កងជីវពល​ដើម្បី​ប្រយុទ្ធ​នឹង​កងទ័ព​ដែល​បាន​ដណ្តើម​អំណាច​ក្នុង​រដ្ឋប្រហារ​កាលពី​ឆ្នាំ​មុន។

អ្នក​ជំនាញ​អង្គការ​សហ​ប្រជាជាតិ​ពីរ​រូប​បាន​ហៅ​ការ​ប្រហារ​ជីវិត​ដែល​បាន​គ្រោង​ទុក​ថា​ជា​ការ​ប៉ុនប៉ង​ដ៏​អាក្រក់​ក្នុង​ការ​បណ្ដុះ​បណ្ដាល​ការ​ភ័យ​ខ្លាចមកលើ​ប្រជាជន។

អាជ្ញាធរ​មីយ៉ាន់ម៉ា​បាន​ចូល​រួម​ក្នុង​ការ​បង្រ្កាប​យ៉ាង​ឃោរឃៅ​ដើម្បីបង្រ្កាបការតវ៉ាប្រឆាំងនឹងរដ្ឋប្រហារ។ក្រុមសកម្មជនសមាគមជំនួយអ្នកទោសនយោបាយ (AAPP) បាននិយាយថា មនុស្សចំនួន២១០០នាក់ត្រូវបាន សម្លាប់ដោយកងកម្លាំងសន្តិសុខចាប់តាំងពីរដ្ឋប្រហារនិងរាប់ពាន់នាក់ត្រូវបានចាប់ឃុំខ្លួន៕